InfoHub Logo

اقىسىز كاسىبي-تەحنيكالىق ءبىلىم مەكتەپتەن كەيىن وقۋ ورىندارىنا تۇسپەگەن جاستارعا ۇسىنىلادى. بۇل تۋرالى بۇگىن استانادا وتكەن باسپا ءسوز ءماسليحاتىندا ەڭبەك جانە حالىقتى الەۋمەتتىك قورعاۋ ۆيسە-مينيسترى ءبىرجان نۇرىمبەتوۆ ءمالىم ەتتى.

نۇرىمبەتوۆ جاڭا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ جاڭا باعدارلاماسىندا سۇرانىسقا يە كاسىپتەر مەن كاسىپكەرلىك قاعيداتتارىنا جاپپاي وقىتۋ مەن داعدىلاردى ۇيرەتۋ، جاپپاي كاسىپكەرلىككە جاعداي جاساۋ، جۇمىسقا ورنالاسۋعا ارەكەتتەسۋ مەن ەڭبەككە جۇمىلۋدى قولداۋ ارقىلى ەڭبەك نارىعىن دامىتۋ قادامدارى قامتىلعانىن جەتكىزدى.

«باعدارلامانىڭ ءبىرىنشى باعىتى اياسىندا 2،5 جىلعا دەيىنگى وقۋ مەرزىمىمەن كوللەدجدەر اۋقىمىندا تەگىن كاسىبي-تەحنيكالىق ءبىلىم الۋ ۇيىمداستىرىلىپ، مۇندا بارىنەن بۇرىن مەكتەپتى اياقتاعاننان كەيىن، وقۋ ورىندارىنا تۇسپەگەن جاستارعا نازار اۋدارىلادى. بيىل تەحنيكالىق جانە كاسىبي وقىتۋدا 21 مىڭنان استام جاس قازاقستاندىقتى قامتۋ جوسپارلانىپ وتىر. وسىمەن بىرگە، كوللەدجدەر، «اتامەكەن» ۇكپ وقۋ ورتالىقتارى جانە كاسىپورىنداردىڭ وقۋ ورتالىقتارى شەڭبەرىندە كاسىبي وقىتۋعا ارنالعان قىسقامەرزىمدى كۋرستار وتكىزىلەدى (1-6 اي ارالىعى). بۇل وقۋ تۇرىندە 26 مىڭ ادامدى قامتۋ كوزدەلۋدە»، - دەپ مالىمدەدى ۆيسە-مينيستر.

باعدارلامانىڭ ەكىنشى باعىتىندا، اۋىلمەن قاتار، قالالاردا دا جاپپاي كاسىپكەرلىكتى ىنتالاندىرۋ مەن دامىتۋعا جاعداي جاسالادى.

«وتەۋ مەرزىمى 7 جىل نەسيەنىڭ جىلدىق مولشەرلەمەسى 6% دەڭگەيدە ساقتالا وتىرىپ، 18 ميلليون تەڭگە مولشەرىندە ۇسىنىلادى. نەسيەنىڭ قولجەتىمدىلىگىن كەڭەيتۋگە ارنالعان كەلەسى ءبىر تىڭ شارا- نەسيەنى كەپىلدەندىرۋ تەتىگى ەنگىزىلەدى: بيزنەسىن ەندى باستاعاندارعا 85%-عا دەيىن جانە جۇمىسى ءجۇرىپ تۇرعان كاسىپكەرلەرگە 50%-عا دەيىن. اۋىل مەن شاعىن قالالالارداعى نەسيەلەۋ، شاعىن قارجى ۇيىمدارىن قوسقاندا، اۋىل شارۋاشىلىعىن قارجىلاي قولداۋ قورى ارقىلى جۇرگىزىلەدى. قالالاردا شاعىن نەسيەلەۋ، اۋىلدىق جەرلەرگە ارنالعان شارتتارداعىداي، ەكىنشى دەڭگەيلى بانكتەر مەن شاعىن قارجى ۇيىمدارى ارقىلى جۇزەگە اساتىن بولادى. ۇستىمىزدەگى جىلى 10 مىڭنان استام ادامعا شاعىن نەسيە بەرۋ جوسپارلانۋدا»، - دەپ بايىپتادى ءبىرجان نۇرىمبەتوۆ.

كاسىپكەرلىك نەگىزدەرىنە وقىتۋ، ارنايى ترەنەرلەر مەن تابىستى دا تاجىريبەلى كاسىپكەرلەردى تارتقان رايدا، ۇلتتىق كاسىپكەرلەر پالاتاسىنداعى «باستاۋ-بيزنەس» جوباسى ارقىلى قولعا الىنادى. اعىمداعى جىلى وقۋمەن 15 مىڭ ادام قامتىلماق.

---