اباي – ءبىزدىڭ ۇلتتىق يدەولوگيامىز
اسىل ءسوزدى ىزدەسەڭ،
ابايدى وقى، ەرىنبە.
دانالىقتى كوزدەسەڭ
جات، توقىپ ال كوڭىلگە،- دەپ سۇلتانماحمۇت تورايعىروۆ بابامىز جىرلاعانداي، اباي ءبىر عانا ادبيەتتىڭ اۋقىمىنا سىيمايدى.
اباي الەمى، اباي تابيعاتى، اباي ءۇنى مۇلدەم بولەك. اباي شىعارمالارىنىڭ باسقا اقىن جازۋشىلاردىڭ شىعارماشىلىعىنان ەرەكشەلىگى – ونىڭ ەسكىرمەيتىندىگى، ماڭگى جاسايتىندىعى ەدى. بابامىزدىڭ: «اتاڭنىڭ بالاسى بولما، ادامنىڭ بالاسى بول» نەمەسە «ءبىرىڭدى قازاق ءبىرىڭ دوس، كورمەسەڭ، ءىستىڭ ءبارى بوس» دەگەن قاسيەتتى دە قۇدىرەتتى سوزدەرى قاي زامان بولماسىن بارشا ادامزات بالاسىنىڭ ورتاق تاعىلىمى ىسپەتتەس.
اقىن ەل اراسىندا بولاتىن كوپتەگەن جاعىمسىز ارەكەتتەر: كورسەقىزارلىق، ءىشتارلىق، الاۋىزدىق، سونداي – اق اۋىزى اققا تيسە، بيلىكتى كوتەرە الماي، بىر-بىرىنە ىرىلىك كورسەتىپ، باس-باسىنا بي بولىپ، از اعايىندى سان-ساققا، جان-جاققا ءبولىپ، ۇرپاققا ۇلگى كورسەتپەك تۇگىلى قارا باسىن ارەڭ الىپ جۇرگەن مىنا حالىقتىڭ بەرەكەسىز تىرشىلىگىن كۇنى بۇرىن كورىپ تۇرعانداي اشىق تا ايقىن سۋرەتتەپ، تەرەڭنەن باياندايدى.
تۋىسقانىڭ، دوستارىڭ – ءبارى ەكى ۇشتى،
سول سەبەپتى دوسىڭنان دۇشپان كۇشتى.
سۇيسە – جالعان، سۇيمەسە – ايانباعان،
بۇل نە دەگەن زامانعا ءىسىم ءتۇستى؟!
اباي – ۇلى اقىن عانا ەمەس، سونىمەن قاتار حالقىنىڭ وي-ساناسىنىڭ دامۋىنا ۇلكەن ۇلەس قوسقان تەرەڭ ويشىل ءارى فيلوسوف. ول ءوزىنىڭ فيلوسوفيالىق تراكتاتتارىن ەلۋ جاسقا جاقىنداپ، ابدەن تولىسىپ، كەمەلدەنگەن كەزىندە جازدى. ابايدىڭ قارا سوزدەرى جاي ادەبي شىعارما عانا ەمەس، فيلوسوفيالىق ەڭبەك. وسى تۇرعىدان قاراعاندا اباي – ۇلى اقىن عانا ەمەس، ءوز زامانىنان وزىق تۋعان عۇلاما. الەم ادەبيەتىنىڭ توم-توم كىتاپتارىنا ارەڭ سىيعان ويلاردى اباي ءداندى قاۋىزىنا سىيدىرعانداي ەكى – اق اۋىز سوزگە سىيدىرا ءبىلۋىنىڭ ءوزى – اقىننىڭ وزگەلەردەن ەرەكشەلىگىن اڭعارتسا كەرەك.
قورىتا كەلە، اباي – بۇكىل ءبىر ەلدىڭ مادەني رەزونانسىن جاساپ كەتكەن تۇلعا. مادەنيەتتىڭ ىشىنە اقىل-وي، ادەبيەت پەن ونەر، ءان مەن كۇي كىرەدى دەسەك، وسىلاردىڭ ءبارىن اباي تۋعىزباسادا جاڭادان تۇلەتتى، جاڭعىرتتى، بۇرىنعى شىقپاعان بيىگىنە شىرقاتتى، اسپاعان اسۋىنا جەتكىزدى. تولەن ابدىكوۆ اتامىزدىڭ: «اباي – حالقىمىزدىڭ ماقتانىشى عانا ەمەس، ءبىزدىڭ ۇلتتىق ۇرانىمىز، ۇلتتىق يدەولوگيامىز. ونىڭ ولمەس مۇراسىن الدىمەن ءوزىمىز تانىپ، سوسىن الەمگە تانىتۋ – ءبىزدىڭ عۇمىرلىق پارىزىمىز. ويتكەنى ابايدى الەمگە تانىتۋ – الەمگە قازاقتى تانىتۋ» ،-دەپ ايتقان ويى ەرىكسىز ويعا ورالا بەرەدى. وسىنداي ماڭگى جاسىل ءنارلى مۇرانىڭ اسىلىن قانىپ ءىشىپ، ومىرىنە قاجەتتى دۇنيەلەردى بويىنا جيا بىلگەن ءاربىر جاس – نۇرلى بولاشاقتىڭ يەسى.
احينا نۇريللا ەلەۋسىز قىزى
ءال-فارابي اتىنداعى قازۇۋ
جۋرناليستيكا فاكۋلتەتى
2-كۋرس ستۋدەنتى
You Might Also Like
-
ابدۋللا م. تۇران ۋنيۆەرسيتەتى
-
سپورتتىڭ ادام ومىرىندە الاتىن ورنى ەرەكشە. سپورتپەن اينالىسقان ادامنىڭ دەنساۋلىعى مىقتى، شىدامدى، شىمىر بولادى. ءبىزدىڭ اتا- بابالارىمىز «ءتانى ساۋدىڭ — جانى ساۋ» نەمەسە «ءبىرى...
