InfoHub Logo

كوكتەم كەلىپ، جۋاننىڭ جىڭىشكەرىپ، جەڭىشكەنىڭ ۇزىلەتىن شاعىندا دارۋمەن جەتىسپەۋشىلىگى كىم ءۇشىن بولماسىن وزەكتى تاقىرىپقا اينالادى. اعزامىز دارۋمەن تاپشىلىعىن سەزىنسە، السىرەپ، كەز-كەلگەن ۆيرۋستى وڭاي جۇقتىرامىز.

بىلە بىلسەڭىز، اعزاڭىزعا دارۋمەن جەتىسپەيتىنىن ايناعا قاراپ-اق بىلە الادى ەكەنسىز. سەنبەيسىز بە؟ ولاي بولسا، ايناعا قاراپ، تەكسەرىپ كورىڭىز.

تەرىنىڭ بوزارۋى

قىس ءبىتىپ، كوكتەم كەلگەن ۋاقىتتا كەز-كەلگەنىمىز كۇنگە كۇيگەن تەرىمىزدىڭ سۇلۋلىعىمەن ماقتانا المايمىز. ال ءبىراق تەرىڭىز تىم بوزارىپ كەتسە، مۇنداي بەلگى ۆ12 دارۋمەنىنىڭ جەتىسپەۋشىلىگىن اڭعارتۋى مۇمكىن. بۇل دارۋمەنسىز ءبىز ءوزىمىزدى جابىرقاڭقى ءارى شارشاڭقى سەزىنەمىز. ال ونىڭ ورنىن تولتىرۋ ءۇشىن، ەت جانە تەڭىز ونىمدەرىمەن ءجيى اۋقاتتانىڭىز.

شاشتىڭ قۇرعاۋى

قۇرعاق، سىنعىش، قايىزعاقتى شاش بيوتين، ياعني ۆ7 دارۋمەنىنىڭ جەتىسپەۋشىلىگىن ءبىلدىرۋى ىقتيمال. اعزاڭىزداعى مۇنداي وزگەرىس ادەتتە انتيبيوتيكتەر قابىلداعاننان كەيىن بايقالادى. ۆ7 دارۋمەنىنىڭ اعزاڭىزداعى مولشەرىن ارتتىرۋ ءۇشىن، ەت، بالىق، كوكونىستەر مەن جەمىستەر، ساڭىراۋقۇلاق، بۇرشاقتى ونىمدەرمەن تاماقتانىڭىز. سونىمەن قاتار ءبىراز ۋاقىتقا ەمدامدى ۇمىتقانىڭىز ابزال.

كوزدىڭ ءىسىنۋى

ەگەر كوزىڭىز جانە اياق-قولىڭىز ىسىنسە، اعزاڭىزعا يود جەتىسپەۋى مۇمكىن. ال كوپشىلىككە كەڭ تاراعان يود كوزى – يودتالعان تۇز. سونىمەن قاتار يود تەڭىز ونىمدەرىنىڭ (اسشايان، بالدىر، لوبستەر)، ءسۇت ونىمدەرىنىڭ جانە ناننىڭ قۇرامىندا كەزدەسەدى.

ەرىننىڭ تۇسسىزدەنۋى

بوزارعان ەرىن اعزاداعى تەمىر جەتىسپەۋشىلىگىنەن بەلگى بەرۋى ىقتيمال. ەگەر ءجيى تۇماۋراتىپ، قان قىسىمىڭىز تومەن بولسا، بۇل بەلگىلەر جوعارىداعى دياگنوزدى قۋاتتاي تۇسەدى. دەسە دە تەمىر جەتىسپەۋشىلىگىنەن ارىلۋ قيىن ەمەس. ول ءۇشىن ءجيى ەتپەن اۋقاتتانىپ، قۇرامىندا كالسيي كوپ مولشەردە كەزدەسەتىن تاعامداردان ۋاقىتشا باس تارتقانىڭىز جەتكىلىكتى.

قىزىل يەك قاناۋى

قىزىل يەكتىڭ قاناۋىمەن بايلانىستى قيىندىق – اعزاڭىزعا س دارۋمەنى جەتىسپەۋشىلىگىنىڭ بەلگىسى. ونىڭ اعزاداعى مولشەرىنىڭ تومەندەۋى يممۋنيتەتتىڭ السىرەۋىنە، بۇلشىق ەت جانە سۇيەك اۋرۋلارىنا، تىسكە بايلانىستى قيىندىقتارعا الىپ كەلەدى. س دارۋمەنى سيترۋستى جەمىستەر مەن قىزىل بۇرىش قۇرامىندا كوپتەپ كەزدەسەدى.

جوعارىدا اتالعان سىرقات بەلگىلەرى دارۋمەندەردىڭ جەتىسپەۋشىلىگىنەن پايدا بولۋى مۇمكىن جاناما بەلگىلەر ەكەندىگىن اتاپ وتكەنىمىز ءجون. ەگەر بويىڭىزدان اتالعان نىشانداردىڭ بىرەۋىن بايقاساڭىز، ناقتى دياگنوز قويۋ ءۇشىن، دارىگەرگە قارالعانىڭىز ابزال.

---