InfoHub Logo

ادامدار نە سەبەپپەن الەۋمەتتىك جەلىلەرگە ءوز سۋرەتتەرىن سالادى؟ بۇل تۋرالى بلوگەر لەو باباۋتا (Leo Babauta) وي-تولعاپ، بىرنەشە قىزىقتى بولجام ۇسىنعان ەكەن. ءبىز ونىڭ جازباسىن اۋدارىپ، ءبىرىنشى جاقتا بايانداپ وتىرمىز.

تانىمال امەريكالىق بلوگەر جانە جازۋشى. قازىرگى تاڭدا پروكراستيناسيا جانە زياندى ادەتتەردەن ءوز بەتىنشە ارىلعانىن كوپشىلىككە ۇلگى ەتىپ، تاجىريبەسىمەن ءبولىسىپ ءجۇر.

جاقىندا مەن وركەنيەتتەن قالىس قالعان سەررا-نيەۆادا تاۋ جوتاسىندا بولدىم. بۇل جەردىڭ تابيعاتى وتە ادەمى. تابيعات كورىنىسىنىڭ تاماشاسى سونداي، سۋرەتكە ءتۇسىرۋ ءۇشىن قولىم ەرىكسىز سمارتفونعا جۇگىرە بەردى. بار ويىم وسى اسەمدىكتى دوستارىما كورسەتۋ ەدى.

ءبىراق مەن بۇل جەردە ءبىر ماسەلەگە تاپ بولدىم. مەن تاۋدا ەدىم. ينتەرنەت دەگەن اتاۋىمەن جوق. ماعان وسى سۇلۋلىققا ءوز بەتىمشە تامسانۋدان باسقا امال قالمادى. مىنە، وسى ساتتە مەن ويلانىپ قالدىم.

مەن دە وزگەلەر سياقتى سۋرەتتەرىممەن بولىسۋگە قۇمارمىن. مەنىڭ Instagram-دا دا، Facebook-تە دە اككاۋنتىم جوق، ءبىراق مەن وتباسىممەن جانە دوستارىممەن WhatsApp نەمەسە Snapchat سياقتى قوسىمشالاردا قىزىقتى سۋرەتتەرمەن بولىسكەندى ۇناتامىن.

ءدال سول سەبەپتى مەن ءومىرىنىڭ جارقىن ساتتەرىن سۋرەتكە ءتۇسىرىپ، الەممەن بولىسكىسى كەلەتىن ادامداردى سوكپەيمىن. سوكپەيمىن، ويتكەنى ولاردى جاقسى تۇسىنەمىن. ءوزىمىز دە ارا-تۇرا الەۋمەتتىك جەلىلەرگە دەمالىستا تۇسكەن سۋرەتتەرىمىزدى، ءۇي جانۋارلارىنىڭ ءتاتتى قىلىقتارىن نەمەسە زور ىقىلاسپەن جاساعان تاعامىمىزدى جاريالايمىز.

ءبىراق بۇلاي ىستەۋگە بىزگە نە تۇرتكى بولادى؟ سۋرەتپەن بولىسۋگە دەگەن قۇمارلىق قايدان پايدا بولادى؟ ءبىز بۇل پروسەستى سانالى تۇردە باسقارا الامىز با؟

قاراعاي ورماندى قاق جارىپ، قوناق ۇيگە جەتكەنشە، باسىما مىنا ويلار مازا بەرمەدى:

• بىرەۋمەن بولىسۋگە اسىقپاي-اق، نەگە جاي عانا وسى ساتتەن ءلاززات الۋعا بولمايدى؟

• مەن بىرەۋلەردىڭ الدىندا ماقتانعىم كەلە مە، الدە مەنىڭ ىس-ارەكەتىمنىڭ استارىندا قانداي دا ءبىر الترۋيستىك نيەت بار ما؟

• جالپى نەگە مەنى وسى تاقىرىپ مازالايدى؟

مەن ءوز پروبلەمامدى ناقتى ءتۇسىندىم: بەيسانالى تۇردە ءاردايىم بىرەۋلەرگە سۋرەتتەرىممەن بولىسكىم كەلىپ تۇرادى. تاۋدا ساياحاتتاعان ەكى كۇنىمدە بۇل ىنتام ءبىر ساعاتتا ەكى رەت مازالاپ تۇردى. مەن بۇل پروسەستى بارىنشا سانالى باسقارۋعا بەل بۋدىم.

وسىلايشا، مىنانى ءتۇسىندىم.

1. تەلەفوندى پايدالانۋعا وزىڭە تىيىم سالۋ كەرەك.

ادەمى بىردەڭە كورگەن سايىن قولىم تەلەفونعا قاراي جۇگىرە بەرەدى. مەن بۇل جابىسقاق قالاۋىممەن نە ىستەرىمدى بىلمەدىم جانە ءوزىمدى تاۋەلدى ءارى دارمەنسىز سەزىندىم. سول كەزدە مەن ءوزىمدى شەكتەي باستادىم.

تەلەفوندى قولىما العىم كەلگەن سايىن، وزىمنەن: تەلەفوندى نە ىستەيمىن، ءقازىر قانداي سەزىمدەمىن، ونى پايدالانا الماعانىم ءۇشىن نەگە بويىمدا ىڭعايسىزدىق تۋىنداپ جاتىر،  بارىنە سۋرەتتى جىبەرسەم قانداي سەزىمدە بولامىن؟ بۇل سۇراقتارعا جاۋاپ تابا المادىم. مەن قىزىعۋشىلىعىما ودان ءارى بوي الدىرىپ، ەكسپەريمەنتتى جالعاستىردىم.

2. ءبىز ءوزىمىزدى جاقسى جاعىمىزدان كورسەتكىمىز كەلەدى.

ادام جانى الەۋمەتپەن تىعىز بايلانىستى. وزگەنىڭ كوزىندە ءبىز باقىتتى كورىنگىمىز كەلەتىنى قالىپتى دۇنيە. ءبىز اينالامىزداعى ادامدارعا تولىققاندى ءومىر ءسۇرىپ جاتقانىمىزدى، ەل كورىپ، جەر كورىپ جۇرگەنىمىزدى، وسى ومىردەن قانداي دا ءبىر ماعىنا كورىپ جۇرگەنىمىزدى كورسەتكىمىز كەلەدى، سولاي ويلاعانىن قالايمىز. سۋرەتتەرىمىزبەن ءبولىسۋ – بۇل ءبىزدىڭ ءتىرى ەكەنىمىزدى جانە بىردەڭەگە لايىق ەكەنىمىزدى الەمگە كورسەتۋ.

باسقالاردىڭ كوزىندە جاقسى كورىنگىمىز كەلەتىن ارەكەتتى بىرەۋلەر سياقتى مەن ەش سوكپەيمىن. مەنىڭشە، بۇل قالىپتى جاعداي.

ەگەر شىنايى بەت-بەينەمىزدەن الدەقايدا جاقسى كورىنگىمىز كەلەتىن بەيسانالى تالپىنىسىمىز بولماسا ءبىز وز-وزىمىزگە ادال بولماس ەدىك.

مەن مۇندايعا ءمان بەرمەيمىن دەيتىندەر، شىن مانىندە الدايدى. جالپى ءوزىڭنىڭ قانداي تاماشا ادام ەكەنىڭدى كورسەتۋدىڭ قانداي ايىبى بار؟

كوپ جاعدايدا بىزگە مۇنىڭ ەش قاجەتى جوق ەكەنىن ۇعاتىن دەڭگەيدەمىز. الەۋمەتتىڭ قولداۋىنسىز-اق ءبىز باقىتتى بولا الامىز. ارينە، مەن بۇعان ونشا سەنبەيمىن، ايتپەسە مىنا ماقالانى جازباس ەدىم. ؛)

3. ءبىز جاقىندارىمىزبەن قۋانىشىمىزدى بولىسۋگە ىنتىقپىز.

سەبەبى ولار دا تۋرا ءبىز سياقتى تاڭعاجايىپ اشىلۋلار مەن اسەرلى ساتتەردەن ءلاززات العانىن قالايمىز. مىنە، مىسالى تاڭعاجايىپ دۇنيە كوردىك، بۇل ءبىزدى قالاي شابىتتاندىرسا وزگەلەردى دە سولاي شابىتتاندىرعانىن قالايمىز. بۇل ولاردىڭ ءومىرىن جارقىن ەتە تۇسەدى دەپ، ءبىر سىلكىنتەدى دەپ ەسەپتەيمىز. سۋرەتتەرمەن ءبولىسۋ تاۋەلدىلىگىنىڭ بۇل جاعىمدى جاعى بولىپ تابىلادى. ءبىراق كەرى جاعى دا بار.

اينالاسىنداعى ادامداردىڭ ءتۇرلى وقيعالارىنان، ساياحاتتارىنان، شىتىرمان وقيعالارىنان شابىت الاتىن كوپتەگەن ادامداردى تانيمىن. ولار ادامداردىڭ ۇسىنعان كەڭەستەرىنە قۇلاق ءتۇرىپ، ءوز پايداسىنا اسىرادى. ولاردىڭ ءجۇرىپ وتكەن جولدارىن قايتالاۋعا تىرىسادى، نەمەسە بىرەۋلەردىڭ كەڭەسى بويىنشا كوزدەرى تۇسكەن مەيرامحاناعا بارادى.

الايدا وسىنداي زاتتاردان ءبىرشاما قىڭىرايىپ قالاتىن ادامدار دا بار. ولار بەيسانالى تۇردە مۇنداي سۋرەتتەردەن قۇيتىرقۇلىق ىزدەيدى، ماقتانشاقتىققا بالايدى، قىزعانىشقا بولەنىپ، كورەالماۋشىلىققا بوي الدىرادى. الەۋمەتتىك جەلىلەرگە جاريالانعان سۋرەتتەر مىنە، وسىنداي كوپتەگەن قاراما-قايشى سەزىمدەر تۋدىرادى.

4. وسى ساتتەن ءلاززات الۋ كەرەك.

ءسىز تاماشا تابيعاتتى كورىپ تۇرسىز. ونىڭ تاماشا بولعانى سونشا، ونى بىرەۋمەن بولىسكىڭىز كەلەدى. نەگە؟ نە ءۇشىن؟ ادەمى كورىنىستى تاماشالاۋدان وزگە، ونى سۋرەتكە ءتۇسىرۋ، بىرەۋگە جىبەرۋ ءۇشىن ابىگەرگە ءتۇسۋدىڭ قاجەتى قانشا؟ مەن وسى جايلى كوپ ويلادىم جانە بۇرىن اينالامداعى ادەمى كورىنىستەن جاي عانا ءلاززات الا العانىمدى، ونى بىرەۋمەن بولىسۋگە مۇقتاج بولماعانىم ەسىمە ءتۇستى. ياعني بۇل ابدەن مۇمكىن.

ءبىز ەشكىممەن بولىسپەي-اق ادەمى ساتتەن ءلاززات الا الامىز. ءبىز سۇلۋلىقتى باعالاي الامىز جانە بىرەۋدىڭ ماقۇلداعانىنا ءزارۋ ەمەسپىز.

كەيبىرەۋلەر بۇلاي ىستەمەسە ءوزىن تولىققاندى سەزىنبەيتىنىن ايتۋى مۇمكىن، ءبىراق ولاي ەمەس. تاماشا ساتتەن جالعىز ءلاززات الۋعا دا بولادى. جانە بۇل وتە تاماشا.

5. سۋرەتتەرمەن الماسۋ – تولقۋدى باسۋ امالى.

كۇن باتاردا تاۋلار قانداي عاجايىپ كورىنىسكە يە بولاتىنىن ەلەستەتىڭىزشى. مۇنداي كورىنىستىڭ عاجاپتىعى سونشا، بويىڭدا ءتۇرلى سەزىمدەر اسىپ-تاسىپ جاتادى. ءبىز وسى سەزىمدەرىمىزبەن بولىسكىمىز كەلەدى. سول ءۇشىن دە سۋرەتتەرمەن الماسامىز. وسىلايشا سەزىمدەرىمىزدى اۋىزدىقتاعىمىز كەلەدى. سەزىمدەرىمىزبەن بولىسە المايتىن بولساق، قۋانىشتان شىڭعىرا باستايمىز.

ءبىراق بۇرىن ونداي مۇمكىندىك بولمايتىن. ءبىز جاي عانا ءلاززات الاتىنبىز. قۋانىش پەن تامسانۋ سەزىمدەرى ءبىزدى جاڭا زەرتتەۋلەر مەن اشىلۋلارعا يتەرمەلەيتىن، ولار ءبىزدى ىشتەي نارلەندىرەتىن جانە ءارى قاراي دامۋعا كۇش بەرەتىن. ال ءقازىر ءبىز سەزىمدەرىمىزدى باسقالارمەن ءبولىسۋ ارقىلى اسەرلى پىكىرلەرىمىزبەن ونى باسىپ تاستايمىز.

بىردەڭەنى باسقا بىرەۋگە جىبەرەمىز، كورسەتەمىز دەپ كوپتەگەن تاماشا ەموسيالارىمىزدى ءوز قولىمىزبەن تۇنشىقتىرامىز، تاماشا ساتتەردەن اسەر الۋدان قالامىز. كوپتەگەن ادام مۇنى تۇسىنەدى، ءبىراق جاعدايدى وزگەرتۋگە قۇلىقسىز. بەكەر.

ءبىز ءوز سەزىمدەرىمىزدى باسقارا الامىز جانە دۇرىس جولعا باعىتتاي الامىز. ءبىز سەزىمدەرىمىزدى ءوز بەتىمىزشە اۋىزدىقتاي الامىز جانە ءوز بەتىمىزشە باستان وتكەرە الامىز. ءبىراق بۇل جىگەرلىكتى قاجەت ەتەدى.

مەن سىزدەرگە قازىردەن باستاپ الەۋمەتتىك جەلىلەرگە سۋرەت جاريالاۋدى دوعارىڭىزدار دەمەيمىن. مەن قارىشتاپ دامۋ مەن تەحنولوگياعا قارسى ەمەسپىن. مەن جاي عانا سۋرەتتەرمەن ءبولىسۋ پروسەسىن كىشكەنە بولسىن سانالى تۇردە باسقارۋدى ۇسىنامىن.

---