InfoHub Logo

ۇستازدار قوعامداعى ەڭ قاجەتتى ماماندىق يەسى. بۇگىن استانادا «ۇزدىك پەداگوگ» رەسپۋبليكالىق بايقاۋىنىڭ جەڭىمپازدارىن قۇتتىقتاۋ سالتاناتتى جيىنىندا  ق ر پارلامەنتى سەناتىنىڭ دەپۋتاتى داريعا نازاربايەۆا وسىلاي ءمالىم ەتتى.

«ءوزىمىز ءجۇرىپ وتكەن جولعا قاراساق، كىمدەردى ەسكە الۋىمىز مۇمكىن؟ ارينە، ەڭ الدىمەن اتا-انامىزدى ويلايمىز. ەڭ جاقىن ادامداردى دا ءجيى ويلايمىز. كوپ جاعدايدا ءوز ۇستازدارىمىزدى ويلايتىنىمىز راس. ولار ءاربىر جاننىڭ ەڭ جاقىن دەگەن ادامدارىنىڭ قاتارىنا جاتادى. ۇستازدار ءوزىنىڭ جىلى وتباسىندا الاڭسىز جۇرگەن بالاقايدى قابىلداي وتىرىپ، ونى اسا قامقورلىقپەن قولىنان جەتەلەپ، ءبىلىم، عىلىم، ونەر جانە سپورت سالاسىنا اكەلەدى. سونىمەن بىرگە بالالارعا ءومىردىڭ  قاراما-قايشىلىقتارى، قيىنشىلىقتارى مەن سىناقتارى  بولاتىنىن دا تۇسىندىرەدى. ەلىمىزدە جىل سايىن مەكتەپ ءبىتىرۋشى تۇلەكتەرگە مامىر ايىندا سوڭعى قوڭىراۋ سوعىلادى. بۇل كۇنى تۇلەكتەردىڭ دە، ولاردىڭ اتا-انالارىنىڭ دا كوزدەرى جاسقا تولادى. بۇل -   سىزدەردىڭ ەڭبەكتەرىڭىزگە، بالا تاربيەلەۋدەگى ەرلىكتەرىڭىزگە،  كۇن سايىن العىس كۇتپەي-اق ۇلكەن ءىس تىندىراتىن جۇمىستارىڭىز ءۇشىن العىسقا تولى كوز جاسى. سىزدەر ءبىزدىڭ قوعامداعى ەڭ قاجەتتى ماماندىق يەسى بولاسىزدار، ءقادىرلى ۇستازدار!» - دەدى سەنات دەپۋتاتى.

سونىمەن قاتار داريعا نازاربايەۆا ەلىمىز تاۋەلسىزدىكتىڭ 25 جىلدىعىن اتاپ وتەتىن وتە ماڭىزدى قادامعا جاقىنداپ كەلە جاتقانىن،  شيرەك عاسىردا ومىرگە كەلگەن بالالار، ياعني تاۋەلسىزدىكتىڭ قۇرداستارى وسى ۋاقىتتا ەر جەتىپ، ءبىلىم العانىن، ماماندىققا يە بولىپ، كوبى اتا-انا بولىپ ۇلگەرگەنىن اتاپ ءوتتى.

«شىندىعىن ايتقاندا، وسى 25 جىل جاي جىلدار ەمەس. نەشە ءتۇرلى جاعدايلار بولدى. ول تۋرالى مەن ايتپاسام دا بولادى. ءبىراق ونى ءبارىمىز ۇمىتپاۋىمىز كەرەك. الايدا وسى قيىنداۋ بولعان شيرەك عاسىرلىق جولدا قىركۇيەك ايىنىڭ باسىندا  العاشقى قوڭىراۋ،  مامىر ايىنىڭ سوڭىندا سوڭعى قوشتاسۋ قوڭىراۋى سوعىلماي قالعان جىل جوق. مەكتەپ بالى دا ەشقاشان وتپەي قالعان ەمەس، تۇلەكتەر تاڭنىڭ العاشقى ساۋلەسىن كۇتىپ الادى، ۇل بالالاردى ەشقاشان ەشقانداي سوعىسقا الىپ كەتكەن جوق. سەبەبى، سوعىس دەگەن بولعان جوق. حالىق دانالىعى مەن سول حالىقتى باسقارىپ وتىرعان ەلباسىنىڭ اقىلدىلىعى بەيبىتشىلىك پەن بىرلىكتى ساقتاۋعا ىقپال ەتتى. وسىنداي اسا باعالى جەتىستىكتە سىزدەردىڭ ءاربىرىڭىزدىڭ  ۇلكەن ۇلەستەرىڭىز، جانقيار ەڭبەكتەرىڭىز بار، قىمباتتى ءبىزدىڭ ۇستازدارىمىز! سول ءۇشىن سىزدەرگە باس يەمىز!» -دەدى دەپۋتات. 

---