InfoHub Logo

ءبىلىم سالاسىندا بارلىق ماسەلەلەردى شەشۋگە قاۋقارلىمىز. بۇگىن استانادا «ۇزدىك پەداگوگ» رەسپۋبليكالىق بايقاۋىنىڭ جەڭىمپازدارىن قۇتتىقتاۋ سالتاناتتى جيىنىندا  ق ر پارلامەنتى سەناتىنىڭ دەپۋتاتى داريعا نازاربايەۆا وسىلاي ءمالىم ەتتى.

«وسى جولدا ءبىز ءبىر جاقتان ەكىنشى جاققا اۋىتقىعان ساتتەرىمىز بولعانى راس. جانە اعارتۋ سالاسى دا كەيدە ويلانباي جاسالعان رەفورمالاردان كوپ قيىندىقتار كوردى. دەسەك تە، تاجىريبە - ومىردەگى ەڭ قىمبات نارسە ەكەندىگىن ۇمىتپايىق. ءقازىر تاجىريبە بار. قولدان كەلگەنشە جاقسارىپ كەلەمىز، بارلىق ماسەلەنى شەشۋگە بولادى. سوندىقتان، كەلەر ۇرپاق «وتە جاقسى» دەگەن باعا قويۋ ءۇشىن ءبارىن ىستەۋگە ءتيىسپىز. مۇمكىن، «ءتورت» دەگەن باعا قويار، كىم ءبىلسىن...»، - دەپ توقتالدى داريعا نازاربايەۆا.

سالتاناتتى شارا بارىسىندا سەنات دەپۋتاتى ۇستازدارعا ءوز قۇتتىقتاۋىن جەتكىزدى.

«قۇرمەتتى ءبىلىم بەرۋ سالاسىنىڭ ەڭبەككەرلەرى، ۇستازدار، اعارتۋشىلار، تاربيەشىلەر، پەداگوگتار! مەرەكەلەرىڭىز قۇتتى بولسىن! امان-ساۋ جانە باقىتتى بولىڭىزدار، قىمباتتى ۇستازدار!» - دەدى سەنات دەپۋتاتى.

ايتا كەتەيىك، ەلىمىزدىڭ ەڭ ۇزدىك مۇعالىمدەرىن انىقتاعان بايقاۋعا رەسپۋبليكانىڭ بارلىق وڭىرلەرىنەن مەكتەپكە دەيىنگى جانە ورتا ءبىلىم سالالارىندا قىزمەت ەتىپ جۇرگەن ۇستازدار، سونداي-اق، تەحنيكالىق جانە كاسىپتىك ءبىلىم سالاسىنىڭ ينجەنەرلىك-پەداگوگيكالىق ماماندار قاتىستى.

---