InfoHub Logo

وقۋشىنى ۇرعان ۇستاز باس بوستاندىعىنان ايرىلۋى مۇمكىن. الماتى وبلىسىندا 20 جىلدان ارتىق ەڭبەك ءوتىلى بار حيميا ءپانىنىڭ ءمۇعالىمى شاكىرتىن جەلكەلەيمىن دەپ ءىستى بولىپ جاتىر دەپ حابارلايدى كتك ارناسى.

7ء-شى سىنىپ وقۋشىسىمەن بولعان ارەكەتتى باسقا بالالار ۇيالى تەلەفونعا ءتۇسىرىپ، عالامتورعا تاراتىپ جىبەرگەن ەكەن. وسىدان كەيىن ۇلدىڭ اتا-اناسى ءىس قوزعاۋدى تالاپ ەتىپ، پوليسياعا ارىز تۇسىرگەن.

ءىستىڭ نەدەن باستالعانى تاسپاعا تۇسپەي قالسا دا، اشۋلى ۇستازدىڭ وقۋشىنى شاپالاقپەن ۇرىپ جاتقانى انىق كورىنەدى. كەيىن جەتكىنشەككە داۋىس كوتەرىپ، جۇلقىلاۋعا كىرىسكەن. سويتسە ول، ىلە اۋدانى بايسەركە اۋىلىنداعى مەكتەپتە حيميا ءپانىنىڭ ءمۇعالىمى ەكەن.

وقيعا جاڭا جىل الدىندا 7ء-شى سىنىپتا بولىپتى. ساباق ۇستىندە ءمۇعالىم وقۋشىلاردى جالعىز قالدىرىپ كەتكەن. سول كەزدە جەتكىنشەكتەر ءبىر-بىرىن رەنجىتىپ، ارتىنشا قىز مەكتەپتە ىستەيتىن اناسىنا شاعىمداعان.

"ماماسى سىنىپقا كىرىپ كەلىپ بالانى ۇرعان. بۇل حاباردى مەن اتا-اناسىنان ەستىدىم. 24ء-ى كۇنى ءتيىستى شارا قولداندىم. مامەدالييەۆا ميرا – ۇرعان حيميا ءپانىنىڭ ءمۇعالىمى ستاتيامەن جۇمىستان بوساتىلدى. ونىڭ ءتۇسىندىرۋى بويىنشا، ول انا رەتىندە بارىپتى ول جەرگە. ياعني قىزىنىڭ جىلاپ كەلگەنى ءۇشىن. قىزىنىڭ جاعىنان ۇرىپ جىبەرگەن عوي بالا"، - دەيدى مەكتەپ ديرەكتورى عابيدوللا نۇرمۇحانبەتوۆ.

ءمۇعالىمنىڭ 20 جىلدان ارتىق ەڭبەك ءوتىلى بار ەكەن. ءبىراق، بالاعا قول كوتەرگەنى ءۇشىن وعان قارامادىق دەيدى ديرەكتور. ۇستاز ەندى ءتىپتى قىلمىستىق جازاعا تارتىلۋى مۇمكىن.

"2003 جىلعى ۇلىنىڭ مەكتەپتە ءمۇعالىمنىڭ قول كوتەرگەندىگىنە ارىزدانادى. ارىز ىلە اۋداندىق ىشكى ىستەر باسقارماسىنا تىركەلىپ، قىلمىستىق كودەكستىڭ 107-بابىنا سايكەس ءىس قوزعالدى. قازىرگى تاڭدا سوتقا دەيىنگى تەرگەۋ جۇمىستارى جۇرگىزىلۋدە"، - دەيدى الماتى وبلىستىق ءىىد رەسمي وكىلى ايمان مىرزەكوۆا.

عالامتوردا قىزۋ تالقىلانىپ جاتقان وسى وقيعا بويىنشا وقۋشىلاردى قاراۋسىز قالدىرعان سىنىپ جەتەكشىسى دە قاتاڭ سوگىس الىپتى.

حيميا ءپانىنىڭ ءمۇعالىمى ەندى زاڭ بويىنشا بەرىسى ايىپپۇل تولەپ قۇتىلادى، ارىسى 2 جىلعا دەيىن باس بوستاندىعىنان ايىرىلۋى مۇمكىن. ال ءتارتىپ ساقشىلارى ونىڭ جازاسىن جەڭىلدەتەتىن نەمەسە اۋىرلاتاتىن جاعدايلاردى ەسكەرەتىن بولادى.

---