InfoHub Logo

قۇرمانعازى جاياۋلاپ ەل شەتىنە كەلىپ، ءبىراق اۋىلىنا بارۋعا باتا الماي، جالەل دەگەن دوسىنىڭ ۇيىنە كەلەدى. جالەل قۇرمانعازىنى قوينىن اشىپ قارسى الادى. ءبىراق كۇيشىنىڭ ءۇي ءىشىنىڭ امان-ساۋلىعىن ايتقاندا ازداعان اڭگىمەسىنىڭ كىربىڭىن قۇرمانعازى سەزىپ قالادى. «ەل ارالاعان سىنشى بولادى» دەگەندەي، قۇرمانعازىنىڭ قىراعى كوزىنە ول كىربەڭ ءىلىنىپ قالادى. سول جەردە قۇرمانعازى تۇرىپ: «سەنىڭ اڭگىمەڭنىڭ تۇبىندە ايتىلماي تۇرعان ءبىر جاي بار عوي. نەسىن جاسىراسىڭ، ايت! ءبىزدىڭ ۇيدە بىردەڭە بولىپ قالعان عوي» دەيدى. جالەل ءبىراز ۋاقىت كىبىرتىكتەپ، اقىرى بولعان وقيعانى كەزەگىمەن باياندايدى. ول كۇيشىنىڭ اكەسى ساعىربايدىڭ وسىدان ەكى اي بۇرىن قايتىس بولعانىن، وسىدان ءۇش كۇن بۇرىن اۋەس پەن ەمىزۋلى بالاسى قازيدى ورىنبوردان سولداتتار كەلىپ، قاشىپ كەتكەن كۇيشىنىڭ ورنىنا «زالەكە» دەپ الىپ كەتكەنىن ايتادى.

قۇرمانعازى ۇزاق ۋاقىت باسىن كوتەرە الماي، كۇرسىنىپ وتىرىپ قالادى. باسىنان اۋىرتپالىقتىڭ كەتپەي قويعانىنا ناليدى. ءبىراق «ۋايىم ءتۇبى — تەڭىز، باتاسىڭ دا كەتەسىڭ، تاۋەكەل ءتۇبى — قايىق، مىنەسىڭ دە وتەسىڭ» دەگەندەي، ارەڭ تاماعىنان وتكەن استى ءىشىپ بولعاسىن، تۇجىرىمدى شەشىمگە كەلەدى. ول شەشىمىن دوسىنا ايتىپ، ءوزى سول ءتۇنى شەشەسىنە كوڭىل ايتۋعا، امان- ەسەن كەلگەنىن بىلدىرۋگە، العان شەشىمىن ايتىپ ەستىرتۋگە ۇيىنە كەتەدى. القا اڭىراپ قالعانىن بالاسىنا شاعىپ، قانشا مىقتى بولعانمەن قاپەلىمدە ءبىر ءۇيلى جاننان جالعىز ءوزى عانا قالعانىنا قاتتى كۇڭىرەندى. ءبىراق جاقسى كورگەن بالاسى قۇرمانعازىنىڭ توبەسىن كورگەسىن كوڭىلى ءبىراز جۇبانىپ، بالاسىنىڭ اۋەستىڭ سوڭىنان قۋۋ جوسپارىن ماقۇلدايدى. تەك قۇرمانعازىنىڭ ەندى ەشكىمگە قولىن تيگىزبەۋىن، باسقا ءقاۋىپ ءتونىپ بارا جاتسا، ەشكىمگە ۇرىنباۋىن تىلەك ەتەدى. بارلىق ومىردەگى قۋانىشى مەن رەنىشى، سۇيىنگەنى مەن كۇيىنگەنى كۇي ارقىلى سىرتقا شىعىپ بارىپ كوڭىلى ءبىر جەرگە توقتايتىن قۇرمانعازى، وسى ارادا تاعى رۋحاني جولداسى دومبىراسىن الىپ، تولعانادى. اكەسىنىڭ ولىمىنە، القاداي اناسىنىڭ اڭىراپ قالعانىنا ارناپ كۇي شەرتەدى. بۇل كۇي كەيىن حالىق اراسىندا «القا» اتانىپ كەتەدى.

---