InfoHub Logo

جالەل اۋىلىنا جالعاس وتىراتىن ءبىر بايدىڭ جىلقىسىنان ەكى اتتى ۇستاپ الىپ، ءبىرىن ءمىنىپ، ءبىرىن جەتەلەپ، قۇرمانعازى اۋەستى الىپ كەتكەن سولداتتاردى قۋادى. كورگەن كىسىلەردىڭ ايتۋىنشا قۇرمانعازى توتەلەيدى. ال سولداتتار بولسا جولدان شىقپاي، بۇراڭداپ جەردەن ۇتىلادى. ءۇش كۇن وتكەننەن كەيىن قۇرمانعازى ءبىر مالشىلاردىڭ ايتۋى بويىنشا، وتريادتىڭ قونالقىعا توقتايتىن جەرىنە جاقىندايدى. سايدى، جىرانى قۋالاپ وتىرىپ، سولداتتاردىڭ قونىپ جاتقان جەرىنىڭ ۇستىنەن شىعادى. سولداتتاردىڭ ابدەن ۇيقىعا كەتكەن كەزىن اڭدىپ، قوس اتتى ىلديعا بايلاپ تاستاپ، ءوزى جاياۋلاپ، ايدىڭ استىن الا سولداتتارعا كەلەدى. ولار مىلتىقتارىن ەشكىنىڭ ءمۇيىزى سياقتى ەتىپ قالقايتىپ، بىر-بىرىنە سۇيەپ قويىپ، شىرت ۇيقىدا قاننەن-قاپەرسىز جاتادى. اۋەس شەتىرەكتە الدىنا بالاسىن الىپ، ەڭكەيىڭكىرەپ وتىر ەكەن. قۇرمانعازى ابايلاپ ىسقىرىپ بەلگى بەرەدى. اۋەس قۇرمانعازىنىڭ بەلگىسىن تانىپ، جىلاماسىن دەپ قازيدىڭ اۋزىنا ەمشەگىن سالىپ، قارا شاپاندى بۇركەنىپ، ەڭكەيىپ ءجۇرىپ وتىرىپ قۇرمانعازىعا كەلەدى. قۇرمانعازى اۋەستى اتتارىن قالدىرعان جاققا جىبەرىپ، ءوزى «كەرەك بولادى» دەپ مىلتىقتىڭ بىرەۋىن الىپ، اتتارىنا كەلەدى. سونىمەن، قۇرمانعازى اۋەس پەن قازيدى الىپ كەتىپ قالادى.

سولداتتار ەرتەمەن ءبىر-اق ويانىپ، اۋەستىڭ جوعىن كورىپ، اينالادان ىزدەيدى. تابا الماعاسىن قولدارىن ءبىر سىلتەپ كەتە بەرەدى. ورىنبورعا كەلىپ: «قۇرمانعازىنىڭ ايەلى كىشكەنە ەمىزۋلى بالاسىمەن دالادا قونىپ جاتقانىمىزدا قاشىپ كەتىپتى. ءبىراز جەردى شارلاپ ىزدەدىك، تابا المادىق، قاسقىر جەپ قويعان بولۋى كەرەك»، — دەپ اقپار بەرەدى. مىلتىقتى بۇل وقيعاعا ارالاستىرۋدان قورقىپ: «بارا جاتقاندا سۋعا ءتۇسىرىپ الدىق» دەيدى. قۇرمانعازى بولسا امان-ەسەن اۋىلىنا كەلەدى. سولداتتاردان قازي مەن اۋەستى ۇرلاپ الىپ كەلگەنىن ايتىپ، قۇرمانعازى ءبىر كۇي باعىشتايدى. ول كۇيدىڭ اتى «بۇقتىم-بۇقتىم» بولادى.

---