جان اعا (قارىنداستىڭ قۇتتىقتاۋى)
بۇگىن ءبىزدىڭ وتباسىندا توي-دۋمان،
بارىمىزدەن جانى جايساڭ - سوي تۋعان.
اعا سەنىڭ قۇتتىقتاۋعا باس قوستى،
قۇربى-قۇرداس، قاريالار وي قۋعان.
وتىر انە، ءتور باسىندا اكەمىز،
قاسىندا ونىڭ گۇل جاينايدى تاتەمىز.
اكە-شەشە ءبىزدى ايالاپ وسىرگەن،
كەشىرەتىن بولسا-داعى قاتەمىز.
ءاعا-ىنى، قارىنداستار، انالار،
جەزدە، جەڭگە، قايىنەنە، اتالار.
تىلەك ايتىپ، كەلىپ وتىر تويىڭا،
قابىل بولسىن بەرىلەتىن باتالار!
كەلىپ وتىر: اعايىن-جۇرت، دوستارىڭ،
اۋىلداعى سىيلاس، سىرلاس جاس كارىڭ.
باقىت، بايلىق، ۇزاق عۇمىر تىلەۋدە،
سۇلۋ ءسوزدىڭ تۇسىنەمىز استارىن.
بولساڭ-داعى كوپ ۇل-قىزدار بىرەۋى،
اعا سەنىڭ قاراشاڭىراق تىرەۋى.
ەل ىشىندە جۇرگەننەن سوڭ مۇمكىن عوي،
ءبىرى ماقتاپ، ءبىرى داتتاپ - ىرەۋى.
تىرشىلىكتىڭ قىزىعىنا جايراڭداپ،
كۇلە بەرشى، جۇرە بەرشى سايرانداپ.
ۇلكەن-كىشى، تۋىس-تۋعان ءسۇيسىنىپ،
جىبەك جىپتەي مىنەزىڭە قايران قاپ.
تاسي بەرسىن دارياداي داۋلەتىڭ،
باقىت قونىپ، جارقىراسىن ساۋلەتىڭ.
بالالارىڭ قىزىعىن كور، اتا بول،
ءوسىپ-ونىپ، وركەن جايىپ اۋلەتىڭ.
قايىرىم مەن مەيىرىمنەن جارالعان،
كىسىلىك پەن ىزگىلىكتەن ءنار العان.
جان شۋاعىڭ جىلىتادى جۇرەكتى،
كۇن نۇرىنداي جەر-الەمگە تارالعان.
اقكوڭىلسىڭ، پەرىشتەسىڭ بالاداي،
پەيىلىڭ دە مىنا دارحان دالاداي.
سول مىنەزىڭ بولسىن بىزگە جۇعىستى،
كەدەي دە ءوزىن سەزىنشى ءبىر شالا باي.
اۋىلداسىن اعايىنعا بالاعان،
ەلگە سىيلى، جارعا ادال، بالاجان.
اتا-انا، بالا-شاعا قامقورى،
بارىمىزگە ءقادىرلىسىڭ جان اعام.
قانداي جاقسى سەندەي باۋىر بولعانى،
جانى جومارت، داستارقاندا مول ءدامى.
مەنىڭ ءۇشىن زور قۋانىش، ۇلى توي،
جان اعانىڭ قىرىق جاسقا تولعانى.
ساعالاعان كوكسۋ وزەن ساۋىرىن،
توي تويلاۋدا ەلىڭ-جۇرتىڭ، اۋىلىڭ.
جالبارىنىپ جاراتقاننان تىلەيمىن،
ساعان باقىت، ۇزاق عۇمىر، باۋىرىم!
You Might Also Like
-
اقبايدىڭ اۋباكىرى قۇرمانعازىنىڭ تورى اتى جونىندە حابار ەستيدى. تورىنىڭ قۇنان كۇنىندە-اق بايگە بەرمەگەنىن جەتكىزۋشىلەر ۇلكەيتىڭكىرەپ اڭىزعا اينالدىرادى. ءوزىمشىل اۋباكىر: «جالاڭ اياق قۇرمانعازىع...
-
قۇرمانعازى جاياۋلاپ ەل شەتىنە كەلىپ، ءبىراق اۋىلىنا بارۋعا باتا الماي، جالەل دەگەن دوسىنىڭ ۇيىنە كەلەدى. جالەل قۇرمانعازىنى قوينىن اشىپ قارسى الادى. ءبىراق كۇيشىنىڭ ءۇي ءىشىنىڭ امان-ساۋلىعىن ايتقاندا از...
