InfoHub Logo

1860 جىلداردىڭ باسىندا قىزىلقۇرت، نوعاي رۋلارىن داۋلەتكەرەي بيلەيدى. اكەسى شىعاي بولعانىمەن، داۋلەتكەرەي ەل بيلەۋ جۇمىسىن جاقسى كورمەيدى. تەك «اتا زاڭى» بويىنشا از ۋاقىت بۇل دارەجەگە يە بولادى. ءبىراق داۋلەتكەرەيدىڭ بۇل رۋلاردى بيلەۋى قۇرمانعازىعا جامان تيمەيدى، ويتكەنى وسى جىلداردا ەكى كۇيشى تانىسادى. ءبىرى — يساتايعا بۇيرەگى بۇرعان، قىزىلقۇرتتان شىققان قۇرمانعازى، ءبىرى — بوكەيدىڭ كىشى ءىنىسى شىعايدان تۋعان تورە داۋلەتكەرەي بولىپ كەزدەسىپ، ءومىر جاعدايىندا كوزقاراستارى الشاق جاتقانىمەن، ولاردى جاقىنداستىراتىن ۇلكەن كۇش پايدا بولادى. ول كۇش — ونەر كۇشى، كۇي كۇشى بولىپ شىعادى. ءبىرىنشى كورىسكەندە بىر-بىرىنە قوڭىر سالقىن بولعانىمەن، از ۋاقىتتا-اق بەيتانىستىق مۇز ەرىپ، ەكى كۇيشى جالپى ءتىلدى تەز تاۋىپ كەتەدى. ولاي دەيتىنىمىز — قۇرمانعازى وتىرعان، جۇرگەن جەرلەرىندە ۇنەمى يساتايدىڭ، ماحامبەتتىڭ اڭگىمەلەرىن كوپ ايتادى. قالاي دەگەندە ونداي اڭگىمەلەر داۋلەتكەرەيگە ۇناي بەرمەيدى. ءبىراق كەيىن داۋلەتكەرەيدىڭ قيتىعىنا تيە بەرمەيىن دەپ، قۇرمانعازى ول وتىرعان جەردە «باس جاققا» بارا بەرمەيدى.

قىزىلقۇرتتىڭ جەر داۋىمەن ءبىر كۇنى جاقسى كورەتىن شاكىرتىنىڭ ءبىرى كوكبالانى الىپ، پاپاستىڭ اۋىلىنا كەلەدى، پاپاس بي كۇيشىنى جاقسى قارسى الادى. قۇرمانعازىنىڭ كەلگەن جۇمىسىن ءبىتىرىپ، قىزىلقۇرتتىڭ پايداسىنا ماسەلەنى شەشىپ بەرەدى. اۋەلى پاپاس ءبىر كۇي تارتادى. كۇي قۇرمانعازىعا قاتتى ۇنايدى. «مىناۋ نە دەگەن كۇي ەدى، تىم سايراپ تۇر ەكەن؟» دەيدى قۇرمانعازى. پاپاس كۇيدىڭ اتىنىڭ «بۇلبۇل» ەكەنىن ايتادى. قۇرمانعازى سول ارادا ءبىر كۇي تارتادى. ەندى كۇيدىڭ اتىنىڭ نە ەكەنىن پاپاس سۇرايدى. قۇرمانعازى: «بۇل مەنىڭ بۇلبۇلىم ەدى» دەيدى. سوندا پاپاس تۇرىپ: «جوق، اعا، مىناۋ بۇلبۇل ەمەس، بۇلبۇلدىڭ قۇرعىرى عوي»، — دەيدى. سودان كەلىپ بۇل كۇي «بۇلبۇلدىڭ قۇرعىرى» اتانىپ كەتەدى.

---