التىن ۇيام – وتباسىم
اتامنان باستالار،
اجەممەن قوستالار
وتباسىم مىنالار:
ەڭ جاقىن ادامدار-
اكەم مەن انام بار،
ءبىر تۋعان ءسىڭلىم بار،
ءبارىن جاقسى كورەمىن،
ەركەلەيمىن،ەرەمىن!
وتباسىنىڭ تىرەگى الپەشتەگەن اكە مەن ايالاعان انا. اتا-اناعا، ۇلكەنگە قىزمەت ەتىپ، اكەنىڭ ەڭبەگىن، انانىڭ اق ءسۇتىن وتەۋ – ءبىزدىڭ بورىشىمىز. اتا-انا – وتباسىنىڭ نەگىزگى دىڭگەگى، باستاپقى دانەكەرى. بالا اكەدەن اقىل، انادان مەيىرىم الادى.
مەنىڭ دە ءوز وتباسىم بار. بىزدەر، ناعاشى اتامنىڭ ۇيىندە تۇراتىن التى جانبىز – ناعاشى اتام مەن اجەم، اكەم مەن انام جانە ءسىڭلىم. ناعاشى اتا مەن اجەم ءومىر بويى ۇستاز بولىپ قىزمەت ەتتى. اجەم قاليما قۇرمەتتى ەڭبەك دەمالىسىندا – ءسىڭلىم الينا ەكەۋمىزدىڭ قامقورشىمىز جانە تاربيەشىمىز.اجەم ۇنەمى بىزگە اقىلىن ايتىپ وتىرادى، كەيدە مەنىڭ ساباعىما دا كومەكتەسەدى.
ناعاشى اتام الىك كوپ جىل باسشى قىزمەتتەر اتقاردى، ءقازىر ق.جۇبانوۆ اتىنداعى ۋنيۆەرسيتەتتە وقىتۋشى بولىپ ەڭبەك ەتەدى. مەن اتامدى وزىمە ۇلگى تۇتامىن، اتام مەن اجەم سياقتى ەلگە سيلى ازامات بولعىم كەلەدى.
تۋعان اتام الەكساندر بۇكىل عۇمىرىن جۇرگىزۋشىلىك قىزمەتىنە ارناعان. وكىنىشكە وراي، اتام ەكى جىل بۇرىن دۇنيەدەن وزدى. ءوز اجەم – زاۋرەش. ول كوپ جىلدار دۇكەنشى بولىپ ەڭبەك ەتتى. ءقازىر زەينەتكەر.
اكەم اسقار – وتباسىمىزدىڭ اسىراۋشىسى، قورعانى. اكەم دە اتامنىڭ جولىن قۋىپ، «مارات» اتتى جۇرگىزۋشىلەر دايىندايتىن مەكتەپتە جۇرگىزۋشى-نۇسقاۋشى بولىپ قىزمەت ىستەيدى. انام التىناي – وتباسىمىزدىڭ ۇيتقىسى، جىلۋى، شۋاعى. ق.جۇبانوۆ اتىنداعى ۋنيۆەرسيتەتتە زەرتحاناشى بولىپ جۇمىس جاسايدى.
انام مەنىڭ مۋزىكاعا قابىلەتىمدى بايقاپ، مۋزىكا مەكتەبىنىڭ فورتەپيانو كلاسىنا تىركەتتى. ونىڭ ءبىرىنشى كلاسىن ۇزدىك ءبىتىرىپ، ءقازىر ەكىنشى كلاسىندا وقىپ جاتىرمىن. وتباسىما شاعىن كونسەرت قويۋعا دا شامام كەلىپ قالدى. پيانينودا ويناۋ ماعان قاتتى ۇنايدى. اناما العىسىم شەكسىز.
ال، ءسىڭلىم الينا، سۋرەت سالۋدى قاتتى ۇناتادى. سودان بولار، سۋرەت سالۋدان ەش جالىقپايدى.
مەن ءوز وتباسىمدى، اسىرەسە كىشكەنە ءسىڭلىم الينانى وتە جاقسى كورەمىن. سەبەبى، ءار وتباسىندا سۇيىسپەنشىلىك پەن تۇسىنىستىك مىقتى بولسا، تاۋەلسىز ەلىمىزدىڭ دىڭگەگى دە بەرىك بولاتىنىن تۇسىنەمىن.
وتباسى – بارشا ادامزاتقا ەڭ جاقىن، ەڭ قاسيەتتى ۇعىم. ادام ەڭ العاش شىر ەتىپ دۇنيەگە كەلگەن ساتىنەن باستاپ وتباسىنىڭ تاربيەسىن الادى. اتا-اجەم جانە اكە-انام – ومىردەگى ەڭ قىمباتتى دا ءقادىرلى ادامدارىم. ولار مەنى جاقسىلىققا ادەپتىلىككە، ادامگەرشىلىككە تاربيەلەيدى. ساباقتا دا، ۇيدە دە ۇقىپتى، ءتارتىپتى، سانالى بالا بولسا ەكەن دەپ تىلەيدى.
اسىرەسە، اتامنىڭ: «ءتۇپ قازىعىڭ – وتانىڭ، ار-نامىسىڭ – ءتىلىڭ، كاۋسار بۇلاعىڭ – ۇستازىڭ، قامقورشىڭ – اكەڭ، اقىلشىڭ – اناڭ»، - دەگەن سوزدەرى كوڭىلىمدە جاتتالىپ قالدى. بولاشاقتا اتا-انامنىڭ ءۇمىتىن اقتاۋعا بار كۇشىمدى سالامىن.
وقۋشى: ساگالوۆا سابينا
ءمۇعالىمى: قايراقبايەۆا تىنىشتىق ساعىناي قىزى
You Might Also Like
-
ءمۇعالىم اۋلاداعى بالالاردى جيناپ الىپ وقىتا باستاعان كەزدە، ادامدار تاڭدانىسىپ قالدى. سويتسە دە بالالاردىڭ ساباققا دەگەن ىنتاسى ادەتتەگى مەكتەبىنە بارعان كەزدەگىدەن دە اناعۇرلىم جوعارىراق ەدى. و...
