InfoHub Logo

اقان ساتايەۆ فيلم سيۋجەتىنىڭ نەگىزى رەتىندە بىرنەشە كۇردەلى تاريحي كەزەڭدەردى قولدانا وتىرىپ، قازاقستان حالقىنىڭ بۇرىنعى ءومىر ءسۇرۋىڭ كورەرمەندەرگە باياندايدى. بۇل ءداۋىر ۇجىمداستىرۋدى، حالىققا قايعى اكەلگەن جۇتتى، ۇلى وتان سوعىستى مەن سوعىستان كەيىنگى قازاقستاننىڭ قيىن كەزەڭدەرىن سيپاتتايدى. جالپى بۇل فيلم بالانىڭ اناعا ماحابباتىن جانە انانىڭ بالاعا ماحابباتىن كورسەتەدى. فيلم ۇجىمداستىرۋ جىلدارىنىڭ تالكەگىن، قازاقتى تۇبىرىمەن جويا جازداعان اشارشىلىقتى، ەكىنشى دۇنيەجۇزىلىك سوعىس پەن ودان كەيىنگى كەزەڭدى – تۇتاس ءۇش ءداۋىر تىنىسىن جەتكىزۋىمەن قۇندى. 1930 جىلدان باستاپ بۇگىنگى كۇنگە دەيىنگى ارالىقتاعى تاريحي وقيعالاردى مازمۇنىن بۇزباي، ءمانىن بۇرمالاماي، بوياۋىن وزگەرتپەي بايانداي بىلگەن تۋىندىنىڭ جيناقىلىعى سۇيسىندىرمەي قويمايدى. ىقشام ءارى ۇعىنىقتى. ءار ءتۇرلى كەزەڭ، ءار ءتۇرلى كۇرەستى قات-قابات كورسەتسە دە، الۋان سۋرەت پەن بوياۋدى بىرىكتىرسە دە، بىرىزدىلىكتى ساقتاعان. بايانداۋدا بۇتىندىك، سۋرەتتەۋدە تۇتاستىق بار. كينونىڭ جىلىگىن شاعىپ، مايىن ىشكەن مىقتىلار كەيدە وقيعا اۋقىمىن 10 ءتىپتى، 12 سەريالى فيلمگە سىيدىرا الماي جاتاتىنىن، ەندى بىردە ىقشامدايمىن دەپ سۇبەسى مەن قايماعىن سىلىپ تاستايتىنىن ەسكەرسەك، اقان ساتايەۆتىڭ بۇل شەبەرلىگىن ەرەك ايتۋعا ءتيىسپىز. 2 ساعات. قازاقتىڭ ءبىر عاسىردا كورگەن سان ءتۇرلى ناۋبەتىن سۋرەتتەگەن 2 ساعات. انانىڭ بالاعا، بالانىڭ اناعا دەگەن ماحاباتىنان ۇلى سەزىم جوعىن مويىنداتقان 2 ساعات. «قازاق اكتەرلەرى سەندىرىپ ويناي المايدى»، «قازاقستاندىق رەجيسسەرلەردىڭ كينوسى تۇككە تۇرعىسىز» دەگەن قاساڭ كوزقاراستىڭ كۇلىن كوككە ۇشىرعان 2 ساعات. كوپ كۇرسىنتكەن، جىلاتقان، قۋانتقان، شۇكىرلىك ەتكىزگەن 2 ساعات. ءفيلمنىڭ بۇتىندىگىن ۇستاپ تۇرعان – كۇرەس. اۋەلدە مال ءۇشىن كۇرەس، جان ءۇشىن كۇرەس، ءبىر ءۇزىم نان ءۇشىن كۇرەس. ودان كەيىن الىمجەتتىكپەن كۇرەس، جىگىتتىك نامىس ءۇشىن ايقاس. وتان ءۇشىن شايقاس، بالانى اكەسىنەن، انانى بالاسىنان ايىرعان جاۋمەن سوعىس. اسىرا سىلتەۋشىلىكپەن، باس ال دەسە شاش الاتىن شولاقبەلسەندىلەرمەن ارپالىس. تۇپتەپ كەلگەندە مۇنىڭ ءبارى – بالانىڭ اناعا اپارار جولداعى كەدەرگىلەرمەن كۇرەسى. ادامزات ءۇشىن انادان ءقادىرلى جاراتىلىس بولماعان، بولمايدى دا. بۇل تۋىندى بالانىڭ اناعا، انانىڭ بالاعا دەگەن ماحابباتىنان كۇشتى ءارى تۇراقتى سەزىم جوق ەكەنىن كورسەتكەن فيلمدەردىڭ ءبىرى ەمەس، بىرەگەيى بوپ ءتول ونەر تاريحىنان ويىپ تۇرىپ ورىن الارى انىق. زامانا ناۋبەتىنىڭ بار اۋىرتپالىعىن كوتەرسە دە، بەلى بۇگىلمەگەن قازاقتىڭ جانكەشتى انالارىنىڭ تيپتىك بەينەسىن ءمىنسىز اشقان اكتريسا التىناي نوگەربەك ءسوز جوق، رەجيسسەردىڭ دە، كورەرمەننىڭ دە قۇرمەتىنە لايىق. مەنىڭ ويىمشا، پايدالانىلعان تۇستەر، ەففەكتىلەر، گريم مەن اۋەن – بارلىعى ناۋبەتتى زاماننىڭ مىنەزىن بەرە بىلگەن. فيلم سوڭىندا بۇگىنگى بەيبىت كۇندى، تاۋەلسىز ەلدە ءومىر ءسۇرىپ جاتقان قايعىسىز، قامسىز ۇرپاقتى كوردىك. كوز جاستى مولتىلدەتىپ تۇرىپ، جانكەشتى انالارىمىز بەن بەينەتقور اكەلەرىمىز كورگەن تاۋقىمەتتىڭ ءبىرىن دە كورمەگەن، قازىرگىدەي تىنىش زاماندا ءومىر ءسۇرىپ جاتقان ءبىزدىڭ بۋىن قانشالىقتى باقىتتى ەكەنىن تۇسىندىك. شۇكىر دەدىك. وتكەندى ەسىمىزگە سالىپ، بۇگىنگىنىڭ ءقادىرىن ۇقتىرعان، ەرتەڭگى كۇنگە باعدار بەرگەن بۇل فيلم – ءسوز جوق، ۇلتتىق كينو ونەرىنىڭ وسى عاسىرداعى ەڭ ۇزدىك تۋىندىسى. ازىرگە دەيىكشى. «اناعا اپارار جول» وتاندىق كينو ءوندىرىسىن جاڭا بيىكتەرگە باستايتىن جول بولعاي!

تولعاناي ءابجاپار

---