InfoHub Logo

ءبىر كەدەيدىڭ ۇيەمەلى-سۇيەمەلى ەكى بالاسى بار ەكەن. ۇلكەن ۇلى جۇرتتان شىققان جىلپوس قۋلىقشى بولسا، كىشى ۇلى جۇرتتان ىزدەپ تابا المايتىن اڭقاۋ ەكەن. مال دەگەننەن قارا كۇشىن نان قىلىپ وتىرعان قارا وگىزى مەن ءسۇتىن ءىشىپ، ءتولىن ەتقىلىپ وتىرعان بۋاز قىزىل سيىرى بولىپتى. كۇندەردىڭ ءبىر كۇنىندە كەدەيلىكتىڭ سالدارىنان ۇيىندە ىشەتىن اسى دا ءبىتىپ، اشتىققا كىرىپتى. اشتىق دەگەن جايسىز جاعداي عوي، سوندىقتاندا ءبىر ءۇيلى جاننىڭ قۇتىن الىپ، قاباقتارىن ءتۇسىرىپ، تۇنەرتىپ قويىپتى.

نە ىسكە بولسا دا شىدامى از اڭقاۋ وتىرىپ:

— قىزىل سيىر دا قاسارىپ بۇزاۋلامادى-اۋ، — دەپتى. ال قۋلىقشى اعاسى اشتىعىن بىلدىرتپەي اتا-اناسىنىڭ تۇنەرگەن كوڭىلدەرىن اۋلاپ، اڭقاۋ ءىنىسىن مىلجىڭداتا الماي ىزالانىپ وتىر ەكەن. دەرەۋ ءىنىسىنىڭ جاڭاعى ءسوزىن ەستىگەن سوڭ:

— قىزىل سيىر بۇزاۋلاۋعا جاقىن عوي، كورىپ كەلەيىنشى، — دەپ قوراعا شىعىپ كەتىپتى. قورادا از بوگەلىپتى دە، ۇيگە اسىعا كىرىپ:

— ويباي، قارا وگىز بۇزاۋلاپ قالىپتى، — دەپتى.

اڭقاي ورنىنان اتىپ تۇرىپ:

— راس پا؟ — دەپ قوراعا جۇگىرە شىعىپتى. الدەن ۋاقىتتا ۇيىنە كىرىپ:

— قيدى بۇزاۋدان ايىرا المايسىڭ با؟ ارتىنا ءۇيىپ قويعان قيىن بۇزاۋ دەيسىڭ، — دەپ سوگىپتى.

اتا-اناسى ەكى بالاسىنىڭ كۇلدىرگى ىستەرىنە، اشتىقتارىن ۇمىتىپ، قارقىلداپ كۇلىسىپتى.

---