InfoHub Logo

ۇستازدىق ەتۋ – ۇلى جول. شىڭى بيىك، مىنەر باسپالداعى اۋىر جول. وقۋ مەن تىنىمسىز ەڭبەكتىڭ جولى. قۋانىش پەن كوز جاستىڭ جولى. «ۇستازى مىقتىنىڭ – ۇستانىمى مىقتى» دەيدى قازاقتا.   مۇنداعى «مىقتى ۇستاز» - جاڭاعى ايتىلعان ۇلى جولدىڭ شىڭىنا جەتەمىن دەپ تالپىنۋ. الدا تۇرعان نەبىر كەدەرگىلەر مەن اۋىر اسۋلاردى باعىندىرا الۋ جانە وعان قارسى تۇرا بىلەتىن ەرىك-جىگەر، مىقتىلىق، سابىرلىق پەن توزىمدىلىك. وسى قاسيەتتەردى ءوز بويىنا ۇشتاستىرا بىلگەن  ۇستازدى ناعىز ءوز ءىسىنىڭ مامانى دەيدى. ۇستازعا اقىن دا، عالىم دا، مالشى دا، حان دا باس يگەن. ەرەن ەڭبەگىن قۇرمەتتەپ، ۇستاز ەسىمىن ۇنەمى ۇلىقتاعان. سەبەبى، ۇستازدىق ەتۋ -  ۇلكەن شەبەرلىك. سول شەبەرلىككە جوعارى باعا بەرگەندەردىڭ  ءبىرى -  ورىستىڭ اتاقتى پەداگوگ دەموكراتى، ءارى  پەداگوگيكا عىلىمىنىڭ ناعىز مايتالمانىنىڭ ءبىرى -   ك.د.ۋشينسكيي ەدى. ول ءوزىنىڭ ءبىر سوزىندە: «ءمۇعالىم ءىسى سىرتتاي قاراپايىم بولعانىمەن – تاريحتاعى ەڭ ۇلى ءىستىڭ ءبىرى» دەپ ۇلكەن باعا بەرگەن بولاتىن. بۇل سوزىندەگى «سىرتتاي قاراپايىم» دەگەنىن بولەك الىپ قارايىقشى. ياعني، سىرتتاي قاراپايىم،  جاي عانا ءبىر ماماندىق. مۇنى ءبىرى تۇسىنسە، ءبىرى اسا تۇسىنە بەرمەيدى، ءبىراق ءمۇعالىم ءوز بويىندا تەك ءبىر عانا ۇستازدىقتى، ءبىر عانا تالىمگەرلىكتى الىپ جۇرمەيدى. قاجەت كەزىندە اكتەر دە، ءانشى دە بولادى. ۇيىمداستىرۋشى، رەجيسسەر، ءبيشى، باعدارلاماشى، سۋرەتشى...  بۇل قاسيەتتەردىڭ بارلىعى ءبىر عانا ۇستازدىڭ بويىنان تابىلاتىنى تاڭ قالدىرادى. ءبىر ەمەس، بىرنەشە اسىل قاسيەتتەردى ءوز بويىنا ارقالاپ جۇرگەن اياۋلى ۇستازدارىمىزدىڭ ەڭبەگى – باعا جەتپەس اسىل ەڭبەك. سول سەبەپتى دە  ك.د.ۋشينسكييدىڭ  ۇستازدىقتى ەڭ ۇلى ءىس، ەڭ ۇلى جول دەپ باعالاۋى بەكەر ەمەس.

قاجىمايتىن قايسارلىعى مەن باتىل مىنەزىنىڭ ارقاسىندا ۇستازدار ۇنەمى تولاسسىز ءبىلىم مەن ۇلكەن ىزدەنىستىڭ ۇستىندە جۇرەدى. تارىداي بالانىڭ ساۋاتىن اشىپ، ءارىپ تانىتسا، تاۋداي بالاعا ءبىلىم-عىلىم ۇيرەتەدى. وقۋلىق پەن كىتاپ بەتتەرىندەگى ءاربىر ءسوزدىڭ، ءاربىر سويلەمنىڭ ۇلكەن ماڭداي تەرمەن كەلگەن ەڭبەك ەكەنىن تۇسىنە وتىرىپ، ونى بالانىڭ ساناسىنا قۇيادى، ۇعىندىرادى. ءبىلىم بەرۋدىڭ نەبىر قىرلارى مەن سىرلارىن يگەرە وتىرىپ، ونى ءوز تاجىريبەسىندە ورىندى، تياناقتى، دۇرىس ءارى ءدال پايدالانىپ، قولدانادى. ءبىلىمدى بەرۋ از، ال ونى قايتارىپ الۋ – مىنە باستى ماقسات. ۇستاز ءۇشىن بەرىلگەن ءبىلىمنىڭ قانشالىقتى بالانىڭ ساناسىنا جەتىپ، كوكەيىندە قالۋى ماڭىزدى. بولاشاقتا ءوزى ەككەن اعاشىنىڭ بىرتىندەپ بۇرشىك اتىپ، جەمىسىن بەرۋى – ءاربىر ۇستازدىڭ قۋانىشى مەن ارمانى. ۇلى جولدىڭ بويىمەن كەلە جاتىرعان ۇلى ۇستازدارىمىزدى ۇلىقتاۋ – تۇتاس ەلدىڭ پارىزى. تاريحىمىزعا ۇڭىلسەك، ۇلى عۇلامالاردىڭ ءوزى عىلىم جولىن ۇستازدىقتان باستاعان. ۇلكەن ەڭبەكتەرى مەن تەرەڭ بىلىمدەرىنىڭ ارقاسىندا ولاردىڭ ەسىمدەرى ەل اۋزىندا ماڭگىلىك.ارداقتى ۇستازدىڭ ۇلى ەڭبەگى تيىسىنشە ۇلىلىقپەن باعالانۋى كەرەك. وزگەنىن بالاسىن ءوز بالاسىنداي كورىپ، ونىڭ ءاربىر باسقان قادامى مەن جەتكەن جەتىستىگىنە شىنايى قۋانا بىلگەن ارداقتى ۇستاز – ەكىنشى اياۋلى انا! سول سەبەپتى دە ۇستازدارىمىزدى  ۇلىقتايىق، ايالايىق، قۇرمەتتەيىك!

---