InfoHub Logo

...ەرتەرەكتە كوكشەتاۋ وڭىرىندەگى اقان ەلىنەن ءبىر ءۇيىر جىلقى جوعالادى. جوقشىلار مالىنىڭ ىزىمەن سۇراۋ سالا ءجۇرىپ، جۇزدەگەن شاقىرىم جەردەگى ۇلىتاۋ، قارساقباي توڭىرەگىندەگى قالىڭ نايمان ەلىنە بارادى. ايعاقتاردىڭ سىلتەۋىمەن ات باسىن داڭقتى شونجار ساندىباي اۋلىنا تىرەيدى. تىكەلەي دۇزەن اقساقالدىڭ ۇيىنە تۇسەدى.

بۇل كەز دۇزەننىڭ قارتايىڭقىراعان شاعى، ءتورت بالاسىمەن ءوزارا كەڭەسىپ وتىرعان ۇستىنە كەلەدى جوقشىلار. ءجون سۇراستى. جوقشىلاردىڭ باسشىسى جاناتاي باتىردىڭ بالاسى جۇمابەك:

— ءبىر ءۇيىر مالىم جوعالدى. بىرنەشە كۇندىك جەردەن ىزىمەن كەلدىم. توبىن جازباستان وسى قوتانعا كەلىپ كىردى. ءتاتۋ-تاتتى ارعىن، نايماننىڭ بالاسىمىز، الا الماي جۇرگەن كەگىم جوق. مالىمدى تۇگەندەپ بەر، كەلگەن جولىممەن قايتامىن، — دەدى.

— ءاي، سەن كىمدى ۇرى دەيسىڭ، قايدا وتىرعانىڭدى بىلەمىسىڭ، — دەپ دۇزەننىڭ ءتورت ۇلى بىردەن ەجىرەيە قالدى. اتا-تەگىن بالاعاتتاپ، بىلەكتەرىن سىباندى. جۇمابەك بۇل قوقايدان قايمىعا قويعان جوق. مىرزالار قاراۋىلدىڭ، قالا بەردى اقان رۋىنىڭ سۇيەكتەرى ءشىرىپ، جەر بولىپ كەتكەن اتا-بابالارىن بالاعاتتاسا، ول كوز الدىندا وتىرعان دۇزەننىڭ ءوزىن اتادى. بۇعان نامىستانعان ءتورت مىرزا بىردەن جۇمابەككە قونا ءتۇستى. جۇمابەك اپ-ساتتە ۇيرەك ۇستاعان لاشىنداي ۇستىنە قونا كەتتى.

جوقشىنىڭ وسال ادام ەمەس ەكەندىگىن، تەگىن كەتپەيتىنىن سەزگەن دۇزەن بالالارىنا:

— ءارقايسىمىزدىڭ ءۇش-تورت ادامدىق كۇشىمىز بار دەۋشى ەدىڭدەر، تورتەۋىڭ قاراۋىلدىڭ ءبىر قارا دومالاق جىگىتىنىڭ استىنا تۇستىڭدەر. ءوزىمدى تىرىدەي بالاعاتتاتىپ، ماسقارالادىڭدار. جەتەدى ەندى، تۇرىڭدار، — دەپ زەكىدى.

ۇرلىعىن مويىنداعان، كۇش سىناسۋدا جەڭىلگەن ءتورت مىرزا اكەسىنىڭ نۇسقاۋىمەن كەزدەيسوق مەيماندارعا جاقسى قوناقاسى ازىرلەدى، مالدارىن موينىنا قوساق، قۇيرىعىنا تىركەۋمەن جەتەكتەتىپ قايتاردى.

---