InfoHub Logo

اقبايدىڭ اۋباكىرى قۇرمانعازىنىڭ تورى اتى جونىندە حابار ەستيدى. تورىنىڭ قۇنان كۇنىندە-اق بايگە بەرمەگەنىن جەتكىزۋشىلەر ۇلكەيتىڭكىرەپ اڭىزعا اينالدىرادى. ءوزىمشىل اۋباكىر: «جالاڭ اياق قۇرمانعازىعا ونداي ات قايدان ءبىتتى دەيسىڭ، بىرەۋدەن ۇرلاپ العان شىعار، بارىپ تارتىپ الىپ كەلىڭدەر، ىزدەپ كەلسە، كورەسىنى كورسەتەرمىز ول قاراقشىعا»، — دەپ ەكى كىسى جىبەرەدى. قۇرمانعازى ەكەۋىن ەكى ۇرىپ اتتان ءتۇسىرىپ، بوسقا ارام تەر بولىپ ستارشىننىڭ سويىلىن سوعىپ جۇرگەندەرىنىڭ ۇيات ەكەنىن بەتىنە باسىپ: «كورگەن-بىلگەندەرىڭدى اۋباكىرگە ايتا بارىڭدار»، — دەپ قويا بەرەدى. قۇرمانعازى اۋباكىردىڭ وزىنە وشتەسىپ قالعانىن، ونىڭ تاعى دا سوڭىنان جارىق الىپ تۇسەتىنىن بىلەدى. دوس-جاراندارىن شاقىرىپ الىپ، ستارشىننىڭ مىنا شەكسىز زورلىعىن اشكەرەلەي، ماسقارالاي شىعارعان جاڭا كۇيىن تاراتادى. كۇيدىڭ باسىندا ءبىراز قايعىلى حالدەر سۋرەتتەلەدى. ول قايعى تەرەڭدەپ كەڭەيىپ، ىزا-اشۋ نوتالارىنا اينالادى. كەنەت قۇرمانعازىعا ءتان تاعى كۇن جاپقان بۇلتتىڭ ىدىراعانىنداي جاسىق دىبىستار قالا تۇرىپ، كۇي كوڭىلدەنىپ، شىرقاپ، دومبىرانىڭ ساعاسىنا قاراي سىرىلىپ، اتتىڭ ءدۇرسىلى ەستىلگەندەي تىڭداۋشىعا قۇلاق تۇرگىزەدى. وسى ءبىر كۇش، قاجىر سۋرەتتى قايتالاپ تاعى كۇشەيەدى. «ءۇمىتسىز سايتان ءىسى» دەگەندەي الدان جاقسىلىق كۇنىن كۇتكەندەي جايماشۋاقتانادى دا، تاعى كەنەت اۋىر وي، تەرەڭ قايعىعا كوشەدى. بۇل اۋىر جاعداي دا ۇزاققا سوزىلادى. دومبىرانىڭ ساعاسىنا بارىپ ءبىراز «مۇڭىن حالقىنا شاققانداي» تاقىرىپ پەرنەلەر ارقىلى ءوتىپ، سول كەيىپ، سول ۇنىندە جايلاپ، اسىقپاي كەيىن قايتادى. باستاعى اۋىر جايدى
سۋرەتتەيتىن شىرقاعان، زارلاعان تاقىرىپ قايتا ءبىر كورىنىپ، كۇي اياقتالادى. جينالعان جۇرت كوپ ۋاقىتقا شەيىن تومسارىپ وتىرىپ قالادى. ءبىرازدان كەيىن باستارىن كوتەرىپ، كۇيدىڭ اسا تەرەڭ مازمۇندىلىعىن اڭگىمە ەتەدى. كۇيشىنىڭ اناسى القا تۇرىپ: «مۇنىڭ اتى—بىزگە كۇن كورسەتپەي قويعان اۋباكىردىڭ اكەسى اقبايدىڭ اتىمەن اتالسىن. سەنىڭ اكەڭنىڭ كوپ جىلدار بويى بەرمەگەن اقىسى ءۇشىن، سەنى تالاي جابىرلەگەنى ءۇشىن، حالقىڭا اقبايدىڭ ارام اتىن ايگىلەۋ ءۇشىن دومبىرادان عانا ءوشىڭدى الارسىڭ» دەيدى. جينالعان جۇرت ءبىر اۋىزدان كۇيدىڭ اتىن «اقباي» قويالىق دەيدى.

---