InfoHub Logo

1850 جىلداردىڭ باسىندا قۇرمانعازى كۇي ارقىلى قوشتاسىپ (امان بول، شەشەم، امان بول)، تاعى دا جايىق وزەنىنىڭ سول جاق بەتىنە قاراي كەتەدى. (بىرەۋلەردىڭ ايتۋىنشا، قۇرمانعازى يگىلىكتىڭ قىزى اۋەستى الىپ كەلىپ، اۋىلدا از بولىپ، ءۇي ءىشىن جالەل دەيتىن جاماعايىنعا تاپسىرىپ كەتەدى). ول جەم وزەنىنىڭ بويىنداعى تورەمۇرات، نارىنباي، وتەن دەگەن باتىرلارعا بارعىسى كەلەدى. ولار ەتجاقىن بولماعانىمەن قۇرمانعازىنىڭ ۇلكەن اكەسىنىڭ ناعاشىلارىنىڭ رۋىنان شىققان بولادى ەكەن. بىرنەشە كۇن ءجۇرىپ، جايىقتان، جەمنەن امان-ەسەن ءوتىپ تورەمۇرات، نارىنباي اۋىلىنا كەلەدى. باتىرلار ۇيدە جوق، باسقا ءبىر اۋىلدا جيىن بولىپ، سوعان كەتكەن بولىپ شىعادى. قۇرمانعازى باتىرلار كەتكەن اۋىلدىڭ شاماسىن سۇراپ ءبىلىپ، ونشا الىس ەمەس دەگەسىن سولاي قاراي كەتە بەرەدى دە، الگى اۋىلدى تاۋىپ كەلەدى. باتىرلار وزدەرىنە ارنالىپ تىگىلگەن ۇيدە ەكەن. اتتارىن بەلدەۋدەن ءتۇيىپ تاستاپتى. نايزالارىن ۇيگە سۇيەپ قويىپتى. قۇرمانعازى كوپ نايزانىڭ ءبىرىن الىپ، جەرگە
شانشىپ، سوعان اتىن بايلاي سالا ۇيگە كىرەدى. كۇيشىنىڭ بەرگەن سالەمىن ەشكىم ەلەڭ قىلمايدى. ءۇي ىشىندەگىلەر ءبىر اڭگىمەنىڭ قىزۋ جەرىندە وتىرسا كەرەك. الدەن ۋاقىتتا نارىنبايدىڭ كوزى ەسىك جاقتا ءالى كۇنگە تۇرەگەلىپ تۇرعان قۇرمانعازىعا ءتۇسىپ كەتىپ: «ۋا، جىگىت، قايدان ءجۇرسىڭ؟ تورگە شىق!» — دەيدى. قۇرمانعازىنىڭ شولدەپ، تۇتىگىپ ەرنى كەزەرىپ تۇرعانىن كورىپ، ساپتاياقتان قىمىز قۇيدىرىپ بەرەدى. قۇرمانعازى ءبىر زەرە قىمىزدى كوتەرىپ تاستاپ، تاماعىن كەنەپ، دومبىراسىن تاقپاقتاپ، ءوزىن ولەڭمەن تانىستىرا ءسوز باستايدى:

«نارىن ەدى جايلاۋىم،
قيقۋ سالعان قۇسى بار.
قامىسى قالىڭ كولدەرىم—
ءبارى قالدى ارتىمدا.
بالا جاستان ءبىر ءجۇرىپ،
اسىق ويناپ الىسقان،
قاتار وسكەن تەڭدەرىم.
قايران تۋعان توپىراق،
بارلىعىنان ۋاز كەشىپ،
ماڭدايعا تۇسكەن تاۋەلمەن،
تورەمۇرات، نارىنباي،
ىزدەپ كەلگەن ەرلەرىم!» — دەي بەرگەندە، تورەمۇرات: «ءسوزىڭ جاقسى ەكەن، ارعى جاعىن ايتپاي-اق قوي، تانىسا جاتارمىز، ىزدەپ كەلسەڭ، ءىنى بول!» — دەپ قۇرمانعازىنىڭ ءسوزىن توقتاتىپ، شاقىرىپ قاسىنا وتىرعىزادى. سول كەزدە وسى كۇيدى شىعارعان ەكەن.

---