InfoHub Logo

اسان قايعىنىڭ شىن اتى حاسەن ەكەن. حاسەننىڭ جىگىت كۇنىندە ەجەنحان دەگەن ءمانجۋ حانى قازاق حالقىنا جارلىق ەتكەن ەكەن: «قازاق ايعىرىن كىسىنەتپەسىن، ەگەر ايعىردىڭ داۋسىن ەستىسە، مەنىڭ قورامداعى بەدەۋلەرىم قۇلىن تاستايدى. ەگەر بەدەۋلەر قۇلىن تاستاسا، قازاق ەلىنە اۋىر
جازا كورسەتەمىن!» — دەپتى. قازاق حالقى بۇدان قاتتى قورقىپ ساسادى. حالىقتىڭ قورىققانىن كورگەن حاسەن ەل باسشىلارىنا:

— سىزدەر قورىقپاڭىزدار، قاسىما قىرىق مەرگەن قوسىپ حانعا مەنى جىبەرىڭىزدەر. ولار مەنىڭ ايتقانىمدى ىستەسىن، —  دەپتى.

حاسەنگە قىرىق مەرگەن قوسىپ، حانعا جىبەرەدى. حاسەن مەرگەندەرىن ەرتىپ، ەجەنحان تۇرعان شارىنە قاراي جولعا شىعىپ، جولدا كەزدەسكەن ەلدىڭ ءيتىن قىرىپ ولتىرە بەرەدى. وسىلاي حان تۇرعان قالانىڭ ءيتىن دە قىرا باستايدى. قالادا ەشكىم قارسى كەلە المايدى. سونىمەن قالا حالقى حانعا
كەلىپ:

— قاسىندا قىرىق مەرگەنى بار بىرەۋ نەشە ءتۇرلى يتتەردىڭ ءبارىن قىرىپ، ءولتىرىپ جاتىر. نەگە دەگەنگە جاۋاپ جوق. ءوز الدىڭىزعا الدىرىپ توقتاتپاساڭىز، يت قالدىراتىن ەمەس، —  دەگەن سوڭ حان كىسى جىبەرىپ شاقىرتىپ الدىرىپ:

— سەن كىمسىڭ؟ — دەپ ءجون سۇراپتى. حاسەن:

— مەن قازاقپىن، — دەپتى. حان:

— سەن نەگە بۇل ءيتتى ءولتىردىڭ ؟ — دەپتى. سوندا حاسەن:

— تاقسىر، يتتەردى ولتىرەتىن سەبەبىم — جاس كەزىمدە، قوزى باعىپ جۇرگەنىمدە قوزىما قاسقىر شاۋىپ، قوزىلارىمدى قىرىپ جاتقاندا مەن بار داۋسىممەن العا شاۋىپ، يتتەرىمدى شاقىردىم. ماعان ءبىر دە ءبىر يت كەلىپ قاسقىردان قوزىلارىمدى ايىرۋعا كومەكتەسپەدى. مەن سوندا ءوزىم سونداي سەرت ەتىپ ەدىم. وسىدان وزىمە ءوزىم كەلەتىن كۇن بولسا، دالانىڭ ءيتى بولسىن، قالانىڭ ءيتى بولسىن، قىرامىن دەپ ەدىم، — دەيدى. حان
ايتادى:

— سەنىڭ مىناۋىڭ تەنتەكتىك قوي. سەنىڭ وندا شاقىرعانىڭ دالاداعى يتتەر عوي. قالانىكى ەمەس قوي، — دەپتى. حاسەن ايتا- دى:

— مەن شاقىرعاندا دالانىڭ، قالانىڭ ءيتىن دە شاقىردىم، — دەگەندە، حان ايتادى:

— سەنىڭ داۋسىڭدى دالاداعى يت ەستىسە، ەستىر. قالانىڭ ءيتى قالاي ەستيدى؟ — دەپتى. حاسەن ايتادى:

— تاقسىر، ايعىردىڭ داۋسى جەتكەن جەرگە ادامنىڭ داۋسى جەتپەي مە؟ حان:

— ءتىلىڭدى ءتاڭىر كەسسىن، ەندى ايعىردىڭ داۋسىن ەستىرتپە دەگەننەن قايتتىم. سەنىڭ اتىڭ حاسەن بولسا، حان اتىن قوستىم! — دەگەن ەكەن.

اسان قايعى اتى العاش حان اتانادى.

---