InfoHub Logo

قوجاناسىر اپەندى جاس كەزىندە وقىعان مەدرەسەنىڭ شاكىرتتەرى كەزەكتەسىپ ءبىر-بىرىنىڭ ۇيلەرىندە باس قوسىپ، كەش وتكىزىپ، ءان شىرقايدى ەكەن. ءبىراق وسى ءبىر كوڭىلدى توپتىڭ ىشىندە ارسىزداۋ ءبىر ءانشى بار ەكەن. مايلانباعان اربانىڭ شيقىلداعان داۋسىنداي ءان شىرقاپ مازانى الاتىن ءبىر سۇيكىمسىز مولدا بولىپتى. ونىڭ ۇستىنە ءسوز تاسيدى ەكەن.

— وسى پالەدەن قاشان قۇتىلامىز؟ — دەپ جۇرەدى ەكەن ءبارى دە.

— مۇنى ماعان تاپسىرىڭدار، — دەيدى اپەندى.

— قولىڭىزدان كەلە مە؟ — دەيدى دوستارى.

— بايقاپ كورەيىك.

ەرتەڭىنە قوجاناسىر الگى مولدانىڭ بولمەسىنە كەلىپ:

— دوستىم، ءسۇيىنشىڭىزدى دايىنداي بەرىڭىز، — دەيدى.

— نە ءۇشىن؟

— البەتتە، جاقسى حابار ءۇشىن. ءسىزدى حالقىڭىز قازى سايلاماقشى. كەشە يگى جاقسىلاردىڭ ماجىلىسىندە وسىنى اڭگىمە ەتتى.

مولدانىڭ قۋانعاننان ەسى شىعا جازدايدى. قازى بولۋ ەڭ ۇلكەن ارمانى، بار ماقساتىنىڭ شىڭى ەدى. اپەندىنى اعىل-تەگىل سىيلاعان مولدا قوشتاسار كەزدە:

— ءبىزدىڭ زامانىمىزدا دوسىڭنان دۇشپانىڭ كوپ. بۇل جاقسى حابار ارامىزدا قالسىن، — دەيدى.

ەكى كۇننەن سوڭ اپەندى قايتا كەلىپ:

— بايلاردىڭ كوپشىلىگى ءسىزدى قازى سايلاعىسى كەلەدى ەكەن، ءبىراق بىر-ەكەۋى: «بۇل مولدا ءانشى ەكەن. انشىدەن قانداي قازى شىعۋشى ەدى»، — دەيتىن كورىنەدى. سول سەبەپتى سىزگە قارسى ەكەن ولار.

— اپەندى، ءسىز اقىلدى جاستىڭ ءبىرىسىز. اقىل-كەڭەس بەرىڭىز، — دەيدى مولدا.

— بۇدان وڭاي ەشتەڭە جوق. وزىڭىزبەن بىرگە ءۇش كۋا الىپ، قازىعا بارامىز. ءسىز ول جەردە، باسقا جەردە جانە ەشقاشان ءان سالماۋعا قۇران ۇستاپ انت بەرەسىز. ءسىزدىڭ انتىڭىزدى قاعازعا جازادى، ال ول قاعازدى مەن بارىنە كورسەتەمىن.

انت بەرىلەدى. بىرنەشە كۇن وتكەن سوڭ، اپەندى مولداعا:

— وكىنىشكە وراي، ءساتى تۇسپەدى. قولى ۇزىن بىرەۋدى سايلادى، — دەيدى.

— سوندا قالاي بولعانى، اپەندى، — دەيدى الگى «ءانشى».

— عافۋ ەتىڭىز، دوستىم. بۇل تۋرالى ويىڭىزعا دا الماڭىز! ءسىز قۇران ۇستاپ انت ەتتىڭىز. انتتى بۇزعان كىسىگە نە بولاتىنىن بىلەسىز بە؟!

---