InfoHub Logo

دانا حالقىمىز «اتا-اناڭا نە قىلساڭ، الدىڭا سول كەلەر» دەگەن. اتا-اناعا  قۇرمەت   كورسەتۋ – اسىل پارىزىمىز. اتا-انا – ءاربىر ادامنىڭ قايتىپ سوعار قازىعى. وعان دەگەن سۇيىسپەنشىلىك تەك جۇرەكتەن شىعۋى ءتيىس. اسىرەسە، مەيىرىمنىڭ كاۋسار بۇلاعى – انا ەسىمىنە قاتىسسىز دۇنيەدە ەشتەڭە جوق. حالقىمىزدىڭ  ۇعىمىندا بالانىڭ اتا-انا الدىنداعى پارىزىن وتەۋى «انا ءسۇتىن اقتاۋ» دەپ اتالادى. «اكەگە باعىنۋ – تاڭىرگە باعىنۋ» دەپ اكەنى دە ءقادىر تۇتقان. ەندەشە ادام ءومىرىنىڭ ءمانى مەن سۇلۋلىعى، ادامنىڭ بولاشاعىنا دەگەن سەنىمدىلىگى – بالانىڭ اتا-اناسىن ءقادىر تۇتىپ، ءوزىنىڭ پەرزەنتتىك پارىزىن ءبىر ساتكە دە ەسىنەن شىعارماۋىندا جاتىر.

ءارقايسىمىز ءۇشىن دۇنيەدەگى ەڭ قىمبات جاندار اتا-انامىز بولۋعا ءتيىس. ولاردان جاقىن ادامدار بۇل ومىردە تابىلا قويماس. ويتكەنى، ولار ءبىزدىڭ تۋعان كەزىمىزدەن باستاپ جانىمىزدا ءجۇرىپ، قامقورلىق جاساپ،  قولىنداعى بارىن بىزگە بەرەدى. وعان قوسا بالالارىم اش، قاتارىنان قالماسىن دەپ «ىشەيىن دەپ وتىرعان استارىن» بىزدەرگە ساقتاپ وتىراتىنى بارىمىزگە بەلگىلى. سوندىقتان  اتا-انانىڭ الدىنداعى بورىشتى وتەۋ وتە قيىنعا تۇسەدى  دەپ ويلايمىن. تۋعان انامىزدى الەمدەگى مۇسىلماندار زيارات قىلاتىن مەككە،  مەدينەگە ءۇش رەت ارقالاپ الىپ بارساق تا، انامىزدىڭ الدىنداعى بورىشىمىزدى اقتاي المايمىز،  انامىزدىڭ ءبىزدى تەربەتىپ، ءبىر ءتۇن ۇيىقتاماعان كەزىندەگى  بورىشىنان عانا قۇتىلادى ەكەنبىز. سەبەبى، ولاردىڭ بىزگە سىيلاعان باعا جەتپەس سىيى – ءومىر. سوندىقتان، اتا-اناعا نە ىستەسەڭ، الدىڭا ءوزىڭنىڭ بالالارىڭنان قايتادى. دۇنيە كەزەك دەگەن وسى. ءبىز ءومىر بويى جاس بولىپ تۇرمايمىز. ءبىز اتا-انامىزدى سىيلاساق، ءبىزدىڭ بالالارىمىز دا قارتايعان شاعىمىزدا ءوزىمىزدى كۇتىپ-باپتاپ، باعىپ-قاعاتىن بولادى.

قازىرگى كەزدەگى بولىپ جاتقان جاعدايعا كەلەتىن بولساق، قارتايىپ، دەنەلەرىنەن كۇش-قايراتى كەتكەن اكە-شەشەسىن قارتتار ۇيىنە تاپسىرىپ، ءار اي سايىن ولاردىڭ زەينەتاقىلارىن اكەتىپ جاتقان قىز-جىگىتتەر از ەمەس ەكەنى راس، بۇل كوڭىل قىنجىتارلىق نارسە.

اتا-انا ءبىزدى دۇنيەگە اكەلدى، ال ءبىزدىڭ قولىمىزدان كەلەتىنى سول اتا-انامىزدى رەنجىتپەي، ءارقاشان ولارعا كومەكتەسىپ، قامقورلىق جاساپ، قۇرمەتتەۋ عانا. ولاردىڭ بىزگە بەرگەنىن، ءبىزدىڭ ولارعا بەرەتىنىمىزبەن سالىستىرۋعا بولمايدى. ويتكەنى دۇنيەدەگى ەڭ قىمباتتىسى – ءومىر. ال، ولار بىزگە ءومىر سىيلاعان جاندار ەمەس پە؟ ءبىز ونى باعالاي ءبىلۋىمىز كەرەك. مىنە، سول سەبەپتى، ءبىز اتا-انامىزعا بارىنشا قامقورلىق جاساپ، ولاردى قۋانتىپ، رەنجىتپەي  ءجۇرۋ – ءبىزدىڭ پارىزىمىز.

اتا-اناڭا  قالاي  قۇرمەت  كورسەتسەڭ، ءوز بالاڭنان دا سولاي قۇرمەت كورەرسىڭ. ءوز بالاڭىزدان  قانداي  جاقسىلىق  كۇتسەڭىز، اتا-اناڭىزعا سونداي جاقسىلىق ىستەڭىز. سەبەبى  نە بەرسەڭىز، سونى الارسىز، نە ەكسەڭىز، سونى ورارسىز. جاقسىلىق قىلساڭ دا  وزىڭە، جاماندىق قىلساڭ دا وزىڭە ەمەس پە؟! اق جاۋلىقتى، اق شاشتى ءوز  انالارىمىز  بەن  داناگوي   اكەلەرىمىزدى ارداقتايىق، كوڭىلدەرىنە قاياۋ، جۇرەكتەرىنە  قايعى سالمايىق!

---