ەلباسى مۇراتى – ەل باقىتى
قاعانى – باتىر، اقىلگويى كەمەڭگەر بولعان ەلدىڭ باعى جانادى.
تونىكوك
ارمان... ارمان تاۋسىلار ما؟! اتى اڭىزعا اينالعان استانانى كورۋگە قۇشتار ەدىم... يگى جاقسىلاردىڭ ارقاسىندا جازعى كانيكۋلدا جول ءتۇسىپ، ەلىمىزدىڭ شاڭىراق قالاسىنا باردىم. عاسىرلار توعىسىندا جۇلدىزى جانعان شاھار كۇلىمدەي قارسى الىپ، دەم اراسىندا باۋراپ الدى. داڭقى الىسقا جايىلعان بايتەرەك جاقىنداعان سايىن اجارلانا ءتۇستى... استانادا بولعان ءۇش كۇنىم عاجايىپتارعا تولى تۇستەي بولدى... «ءبىر كەزدەرى «ارقالىق» اتانعان جازىق دالالى كەڭ مەكەندى ادام بالاسىن قاناتتاندىرار، مىناداي كورىكتى شاھارعا اينالدىرۋ كىمنىڭ ويىنا كەلدى ەكەن؟» دەپ ويلايسىڭ. ءيا، جاۋابىن دا بىلەسىڭ. ول – اتا-بابا باسىنان وتكەن قيىن-قىستاۋ كەزەڭدەرگە قانىق، بىلىگى مەن ەڭبەكقورلىعىن سەرىك ەتكەن، تالاي سىنعا توزە بىلگەن، جۇرەگى «مەنىڭ ەلىم، مەنىڭ جەرىم» دەپ جىرلاعان ەلباسىنىڭ يدەياسى، ەلباسىنىڭ ەرلىگى.
ءبىز تاۋەلسىزدىك العانىمىزعا از ۋاقىت وتسە دە، الەم تاڭداي قاعىپ، قىزىعا قارايتىن ەلمىز! ءبىز تۋىمىز كوك اسپاندا جەلبىرەپ، گيمنىمىز اسقاقتاي ورىندالىپ، ۇرپاعى باقىتتى بالالىق شاعىن وتكىزىپ جاتقان ەلمىز! بۇل – ۇلكەن قۇندىلىق. مۇنداي باقىت قالاي بۇيىردى؟ «التاۋ الا بولسا، اۋىزداعى كەتەر، تورتەۋ تۇگەل بولسا، توبەدەگى كەلەر» دەمەكشى، بۇل باقىتقا قول جەتكىزگەن بىرلىگىمىز بەن كورەگەن ساياساتى بار ەلباسىمىز دەپ ويلايمىن.
سان عاسىر بۇرىن «توبەڭنەن ءتاڭىرى باسپاسا، استىڭنان جەر ايىرىلماسا، تۇركى حالقى، ەل-جۇرتىڭدى كىم قورلايدى؟»-دەپ ەلجىرەپ وتكەن كۇلتەگىننىڭ، قازاقتى بولەك ەل ەتۋدى كوكسەگەن كەرەي مەن جانىبەكتىڭ، ءۇش ءجۇزدىڭ باسىن قوسىپ، ءبىر تۋ استىندا اجارلانعان ايبىندى ابىلايدىڭ، حالقىن وزگەگە تاپتاتپاعان يساتاي مەن ماحامبەتتىڭ، ۇلى وتان سوعىسى تۇسىندا حالقى ءۇشىن جانىن قيعان ءاليا مەن مانشۇك سياقتى ۇل-قىزدىڭ ارمانى تاۋەلسىزدىك بولعان ەدى...
1991 جىلى تاۋەلسىزدىك باقىتىنا قول جەتكىزدىك. وسى 28 جىل ىشىندە ەلىم كوپتەگەن اسۋلاردان كورىندى جانە ونىمەن توقتاپ قالعان ەمەس. 130-داي ۇلتتىڭ ءبىر شاڭىراق استىنا سىيىپ، تاتۋ ءومىر ءسۇرۋى – تاريحتا بولماعان جاعداي... كەشەگى الەم دەڭگەيىندە وتكەن «ەكسپو» كورمەسى كەز كەلگەن ەلدە وتە بەرمەيتىنىن بىلەمىز... ەلدى باسقارا بىلەتىن شەبەرلىگىمەن، كورەگەن ساياساتىمەن تانىلعان ەلباسىنىڭ ماقساتى قازاق ەلىن دامىعان ەلدەر قاتارىنا قوسۋ ەدى. بۇل ماقسات جولىندا جىل سايىن حالقىن جارقىن بولاشاققا جەتەلەيتىن جولداۋلارىن ۇسىنىپ وتىردى. ەلباسى ءبىر سوزىندە: «ماقساتقا جەتۋ ءۇشىن ءبىزدىڭ سانامىز ىسىمىزدەن وزىپ، ودان بۇرىن جاڭعىرىپ وتىرۋعا ءتيىس»-دەپ، رۋحاني تۇرعىدان سانامىزدى جاڭعىرتۋ كەرەكتىگىن اتاپ كورسەتتى.
جاقسى ۇستازدان ۇلگى كورگەن قاسىم-جومارت كەمەل ۇلى توقايەۆتى بيىل ەلىمىز پرەزيدەنت رەتىندە تاڭدادى. ازات ەلىمنىڭ جاڭا پرەزيدەنتى دە ەلىن بيىكتەن تۇسىرمەي، اسقاقتاتا بەرۋ ماقساتىندا ءتۇرلى شارۋالارعا بىلەك سىبانا كىرىسىپ كەتتى. حالقىم ايتقانداي، ەل بيلەۋشىمىزدىڭ ايى وڭىنان تۋعاي...
ءبىلىم سالاسىنا ەنگىزىپ جاتقان ءتۇرلى وزگەرىستەر، شەتەلدىكتەرمەن تاجىريبە الماسۋ، لاتىن الىپبيىنە كوشۋ – ەلىمىزدىڭ جارقىن بولاشاعى ءۇشىن جاسالعان قادامدار. مۇنداي سەنىمدى قادام باسقان حالىق قاشاندا بيىك بەلەستەردى باعىندىراتىنىنا سەنەمىن.
«كورەگەن باسشى ەلدى وسىرەدى، كۇشتى مايدان ەردى وسىرەدى» دەگەندەي، ەلباسىنىڭ اسقاق رۋحى، قايراتى مەن اقىلى، كورەگەندىلىگى، پاتريوتتىق سەزىمى، ماقساتشىلدىعى – مەن سياقتى قاناتى قاتپاعان جاس ۇرپاققا ۇلگى. ەلىم دە، ەلباسىم دا امان بولعاي!
You Might Also Like
-
ابىلاي حان، وتەگەن باتىر ۇلىتاۋدىڭ بوكتەرىندە اڭ اۋلاپ ءجۇرىپ، ءبىر سايعا كەلىپ از-كەم ايالداپ، دەمالۋعا وتىرادى. قاپىسىز وتىرعان حان مەن باتىردىڭ ۇستىنە جاۋدىڭ قالىڭ قولى كەزدەيسوق تاپ بولىپ، ەكەۋىن ...
-
تولە بي: «بالاما ايەلدى ءوزىم تاڭداپ الىپ بەرەمىن. بايدىڭ بايلىعىنا قىزىقپايمىن، ءبيدىڭ بيلىگىنە قىزىقپايمىن. «اسىل پىشاق قاپ تۇبىندە جاتپايدى» دەگەن. كەلىنىم اقىلدى بولسا، بالام دا...
