InfoHub Logo

بىردە بەس-التى جىگىت جولاۋشىلاپ كەلە جاتىپ، جولدا ءبىر ۇيگە توقتايدى. ءۇي يەسى ولاردى جاقسى قارسى الىپ، اتتارىنا جەم سالىپ، وزدەرىنە ەت اسادى. سودان اناۋ-مىناۋ شارۋاسىن جايعاپ كەلگەن سوڭ ءوزى دە اسقا وتىرادى. اسپازشى ونىڭ الدىنا ءبىر تەگەنە سورپا اكەپ قويادى. ءۇي يەسى ونى ءىشىپ الىپ، تاعى سۇرايدى. ءسويتىپ، ول ءبىر ءوزى جيىرما ادام ىشەتىن تاماقتى تاۋىسىپ جەيدى. مۇنى كورگەن قوناقتار تاڭ قالىپ، ءمان-جايىن سۇرايدى.

— مەن دە وزدەرىڭ سەكىلدى، ەلدىڭ ىشكەنىن ءىشىپ، جەگەنىن جەيتىنمىن. ءبىراق الدىما قايتكەندە دە بايۋدى ماقسات ەتىپ قويعان ەدىم. ارتىق اقشا شىعارماۋعا، ارتىق دۇنيە شاشپاۋعا تىرىستىم. سول ساراڭدىعىمنان وسىنداي بالەگە دۋشار بولدىم عوي، — دەپ باستايدى اڭگىمەسىن الگى
كىسى، — سونىمەن نە كەرەك، كۇندەردىڭ ءبىر كۇنىندە ۆەرنىي قالاسىنا باردىم. مەيماندار توقتايتىن جەرگە كەلىپ، اتىمدى بايلادىم. اتىما جەم-شوپ الۋعا اقشامدى قيماي، قاسىنداعى اتتاردىڭ جەمىنەن الىپ سالا سالۋشى ەدىم. بۇل جولى سولاي ەتەيىن دەپ، جان-جاعىما قارادىم. وزگە جىلقىلاردان وقشاۋ تۇرعان، ءتۇر-تۇسى كەلىسكەن ارعىماققا كوزىم ءتۇستى. الدى تولعان جەم، ءوزى تويىپ تۇرعان سياقتى. اقىردان ەكى رەت جەم الدىم. ءۇشىنشى رەت تاعى الماقشى بولىپ، قولىمدا سالا بەرگەنىمدە، ايعىر قاتتى پىسقىرىنىپ جىبەردى. سول مەزەتتە دەنەم ءدىر ەتىپ، تىتىركەنىپ كەتتى. ەرتەڭىندە جولعا شىقتىم. ءبىراق ءوزىمدى ءبىر ءتۇرلى جامان سەزىندىم. سودان باستاپ تاماعىم تويمايتىن بولدى. بار تاپقان-تايانعانىم تاماعىما كەتىپ جاتىر.

كەيىننەن سۇراستىرىپ بىلسەم، الگى جىلقى وتەگەن باتىردىڭ ارعىماعى ەكەن. «ءوزى باتىر، ءوزى باي، قالتاسىنان التىن اقشاسى ۇزىلمەيدى» دەپ ەستۋشى ەدىم. ەندى ودان اتى ءۇشىن كەك قايتارۋدى، ءساتى تۇسسە التىنىن تارتىپ الۋدى ويلادىم. ءسويتىپ، جولىن اڭدىدىم. ءبىر كۇنى قاراسام، ات
جەككەن اربامەن كەلە جاتىر ەكەن. اڭدىپ تۇرىپ، ارباسىنا قارعىپ ءمىندىم. اي-شايعا قاراماي، تۋ سىرتىنان جابىستىم. قولىمداعى بالعامەن باس-كوز دەمەي ۇرعىلاپ جاتىرمىن. ءبىراق ول بىلق ەتەر ەمەس. وتىرا قالىپ تەپكىلەدىم، ونى دا شىبىن شاققان قۇرلى كورمەدى. ءبىر كەزدە مەنى جاس بالاداي كوتەرىپ الدى دا، باسىمدى قولتىعىنىڭ استىنا سالىپ قىسىپ جىبەردى.

ساۋدىرلاپ بۇكىل ءتىسىم ءتۇستى دە قالدى. ول تىستەرىمدى قولىما ۇستاتتى دا: «بالا، ويىنىڭ قاندى ما؟ ولگىڭ كەلمەسە، ەندىگارى ۇرلىق جاساما!» — دەپ اربادان لاقتىرىپ تاستادى. ارام دۇنيەگە قىزىعىپ، وتەگەن اۋليەنىڭ جازاسىنا ۇشىراعان بەيباقتارىڭ مەن بولام، — دەپ اڭگىمەسىن اياقتايدى ءۇي يەسى.

---