اۋىر قازا
اۋىر قازا ۇستىندە ءسوز ايتۋ قيىن. بۇل ءبىر سەميانىڭ، بولماسا ءبىر عانا ونەر سالاسىنداعى قاۋىمنىڭ ازاسى ەمەس — كوپتىڭ ازاسى. مۇحاڭنىڭ الىپ شىعارمالارىن، حالقىنىڭ سىڭىرگەن ازاماتتىق زور ەڭبەكتەرىن دە ايتىپ جاتپايمىز. ول تۋرالى ساپ زەرتتەۋلەر بولادى الدا.
قازاقتىڭ جازبا ادەبيەتى جاس قوي. وسى ادەبيەتتى باستاۋشىلاردىڭ ءبىرى مۇحاڭ ەدى. ويلاپ قاراساڭ، ءبىر ادامىڭ ەتكەن ەڭبەگىنە، جەتكەن بيىگىنە قايران بولاسىڭ. وسى كىسى بىرنەشە ۇرپاقتىڭ ىستەيتىن ءىسىن اتقارىپ كەتكەن سياقتى. دۇنيە جۇزىلىك ادەبيەتتىڭ التىن قورىنا سول كىسىنىڭ قولىمەن «اباي جولىن» قوسقان جوق پا ەدىك.
وسىنداي ۇستازىمىز بارىن زور ماقتانىش ەتۋشى ەدىك. ول شىن ماعىناسىنداعى ماقتانىش. كەيىنگى شىققان جاستاردىڭ شىعارمالارى ءساتتى بولسا — ول ۇستازدان اۋىسقان قاسيەت، الىپ تالانتتىڭ شاپاعاتى بولاتىن.
قازاق حالقىنىڭ ۇلكەن ءبىر مۇراسى — ءتىل عوي. سول باي ءتىلدىڭ بار اسىل قازىناسىن اقتارىپ، قۇلپىرتىپ بەرىپ ەدى. كوبىمىزدىڭ-اق تىلىمىزدەگى ءنارىمىز سول كىسىدەن بە دەپ ويلايمىز. بارشامىز دا كوپ-كوپ بورىشتىمىز سول كىسىنىڭ الدىندا.
جاڭا ءبىر ازىردە تۇستاس دوسىم قىرعىز جازۋشىسى شىڭعىس ايتماتوۆ فرۋنزە قالاسىنان تەلەفون سوقتى.
حالقىمىزعا كوڭىل ايتىپ، قايعىعا ورتاق بولدى؛ ول دا مۇحاڭنىڭ سۇيىكتى شاكىرتىنىڭ، ءۇمىت كۇتكەن ءىنىسىنىڭ ءبىرى. پەيىلى كەڭ، شاراپاتى مول مۇحاڭ ءوز توڭىرەگىنە عانا ەمەس تۋىستاس ادەبيەتتەرگە دە، سول ادەبيەتتە ءوسىپ كەلە جاتقان جاستارعا دا ۇستاز بولاتىن. ازەربايجاننىڭ مەحتي گۋسەين باستاعان ءبىرسىپىرا جازۋشىلارى مۇحاڭا كىتابىن اكەلىپ، اقىل-كادەسىن تىڭداعان شاقتارىنا كۋا بولىپ ەدىك. بۇگىن سولار دا بىزبەن بىرگە ۇلكەن قازانى ازالايدى.
مۇحاڭدى ۇزاق ساپارعا اتتاندىرعالى وتىرمىز. الدىمىزدا ۇلكەن اعامىز بار ەدى، ول ءبىرسىپىرا سالماقتى ءوزi ارقالاپ كەلە جاتىر ەدى. ەندى سول سالماق ءبارىمىزدىڭ ارقامىزعا ءبولىنىپ تۇسپەك. ادەبيەتىمىزدى مۇحاڭ كوتەرگەن بيىك دارەجەدەن تومەندەتىپ الماي، سول كىسىنىڭ بيىگىن الدىمىزعا قاتال تارازى قىپ ۇستاپ، اسا كورنەكتى جازۋشىنىڭ ءىزىن سۋىتپاي قىزمەت ەتۋ، شىبىن جاندى ازاپقا سالىپ، بويداعى بار كۇشىمىزبەن، جان كۇشىمىزبەن حالىققا قىزمەت ەتۋ سول بولادى دا اۋىر كۇنگى ايتار ءسوزىمىز.
1961
You Might Also Like
-
حالىقتىڭ كەمەڭگەر قايراتكەرلەرى تۋرالى تاريحي رومان جازعان اۆتور سول ادامنىڭ ءومىر تاريحىن عانا نەمەسە شاعىن توڭىرەگىن تانىستىرىن قويا المايدى. حالىقتىڭ ءومىرىن كەڭ قامتىپ، قوعامنىڭ نەگىزگى كۇشتەرىن ك...
-
جازۋشىلىق جولىن پروزادان باستاعان عابيت مۇسرەپوۆ قازاق ادەبيەتىنىڭ وسى جانرىنا ۇلكەن ۇلەس قوستى. ونىڭ وقۋشىلارىمىزعا كەڭىنەن تانىلعان «قازاق سولداتى»، «ويانعان ولكە» روماندار...
