InfoHub Logo

احمەتحانعا بىردە جىلتىر ءجۇزدى جىلماقاي جىگىت كەزدەسە كەتەدى.

— وۋ، ءسىزدى مەن باياعىدان بىلەمىن عوي. ءسىزدىڭ ءسوز ساپتاسىڭىز باسقالاردان بولەك قوي. ءسىز، ءيا، «ەسىم سەرىنى» جازدىڭىز عوي. وي، سونداعى ءتىل-اي! ءيا، ءسىز سوسىن «سۇلۋشاشتى» ءبىر كوسىلتتىڭىز-اۋ، اي، سونداعى ۋاقيعا-اي! باسقالاردى قويشى، ءسىزدىڭ ءجونىڭىز باسقا عوي. كەلەشەك ۇرپاق سىزگە تالاي ورالادى ءالى.

احمەتحان ۇندەمەدى. الگى اۋمەسەر جىگىت اراعىن ءىشىپ، تاماعىن جەپ، قارقىلداي كۇلىپ جونىنە كەتتى.

— باياعىدان بەرى ناعىز وتىرىكشىنى تابا الماي ءجۇر ەدىم. قۇداي قايدان ايداپ وسى ۇيدە كەزدەسە كەتكەنىن كورمەيسىڭ بە؟ الگىنىڭ قىلتيىپ تۇرعان مۇرتى دا جالعان، بۇلتيىپ تۇرعان ۇرتى دا جالعان. قاۋ شوپتەي قابا ساقالى دا جالعان. الاباجاق كيىمى دە جالعان. جۇرگەنى دە جالعان، كۇلگەنى دە جالعان. ءسوزى قىرىق قۇراق بوياما. نۇرحاننىڭ، ءسابيتتىڭ جازعاندارىن ماعان جاپسىرىپ جاتىر. جاراتىلىس جالعان ادام وسىنداي بولادى، —
دەيدى احمەتحان.

— وندايدى شىڭگىرلەگەن شيپاق قۇيرىق ەشكى دەپ تە، تۇراعى جوق اسىرەقىزىل قىزتەكە دەپ تە اتايدى، — دەيدى تاعى دا.

***

احمەتحان ءبىر توپتا وتىرىپ، قاسىنداعى قۇرداسىنىڭ داۋىسىن سالىپ، سونىڭ سوزدەرىن ايتىپ، ءجۇرىس-تۇرىسىن، قولىمەن ويناتىپ، تىڭداۋشىلاردىڭ كوز الدىنا كەلتىرەدى. سوندا قۇرداسى كۇلكىسىن تيا الماي، ەزۋىن جيا الماي:

— ياپىر-اي، بۇل دۇنيەدە مۇنداي مىلجىڭ، مۇنداي ۇشقالاق ادام دا بولادى ەكەن-اۋ، — دەپتى.

***

سەكسەننەن اسقان احمەتحانعا كەيىنگى كەزدە ۇمىتشاقتىق پايدا بولىپتى. ءبىر كۇنى ول چەموداننىڭ كىلتىن تابا الماي، ەسكى ابدىرەنى ازاننان كەشكە دەيىن اينالدىرسا، كىلتى ءتوس قالتاسىنان شىعىپتى.

بىردە احمەتحان وڭتۇستىك جاققا كۋرورتقا بارسا، كۇن تىم جىلى ەكەن. «اۋىر بولدى» دەپ جىلى كيىمدەرىن قايتادان ۇيىنە سالىپ جىبەرەدى. ەندى قايتاتىن بولىپ، پوەزعا مىنەيىن دەسە بيلەتى جوق بولىپ شىعادى، قايتادان ساتىپ الۋعا ءماجبۇر بولادى. اۋلىنا كەلىپ كوستيۋمىنىڭ قالتاسىن قاراسا، قايتاتىن بيلەتى سونىڭ ىشىنەن شىعىپتى. مۇنى ەستىگەندەر:

— بۇل تەك احمەتقاننىڭ قولىنان كەلەتىن شارۋا عوي، — دەپ كۇلىسىپتى.

***

ءبىر دۇكەنشىگە احمەتحان ءبىر زات سۇراپ بارسا، «جوق» دەپ جاۋاپ بەرەدى. احمەتحان كەشە عانا ول زاتتىڭ ءتۇسىرىلىپ جاتقانىن ءوز كوزىمەن كورگەن ەكەن.

— قويماڭنىڭ تۇكپىرىن تىنتتىرمەيىن دەسەڭ، ءوزىڭنىڭ ابىرويىڭدى اشتىرمايىن دەسەڭ، قاتىن-بالاڭدى اش قىلمايىن دەسەڭ، ەسەپ كىتابىڭنان شىعىپ، ءبىر تاۋلىككە بۇل ارادان تابان جالتىراتپايىن دەسەڭ، سول زاتتى بەرەسىڭ، — دەپتى.

سوندا ساتۋشى:

— اينالايىن، احا، ايتقانىڭا كونەيىن، ايداۋىڭا جۇرەيىن، سۇراعانىڭدى بەرەيىن، ءوزى جالعىز زات ەدى، احاڭ الدى دەمەيىن، — دەپتى.

احاڭ:

— جوق، ول زات ماعان كەرەك ەمەس، انشەيىن سەنى سىنايىن دەپ ەدىم، — دەپتى.

---