ءازىل - انكەتا
1. شىعارمانى قالاي جازاسىز، قولمەن بە، ماشينكامەن بە؟
ماشينكا تۇگىلى باشپايمەن جازاتىندار بار، مەن ءالى قولمەن جازامىن.
2. جازۋ ۇستىندەگى كوڭىل كۇيىڭىز؟
جازىپ وتىرعاندا مىعىم-اقپىن، جازىپ بولىپ توپقا تۇسكەندە جاڭا تۇسكەن كەلىنشەكپىن.
3. بىتكەن تۋىندىڭىزدى قالاي مىنەپ، جوندەيسىز؟
وزگە بىرەۋ ونىڭ ءبىر سوزىنە قول تيگىزسە، ماعان شانشۋ قادالادى. ءوزىم ونى پىشاقتاسام دا جانىم ەنەدى.
4. جىلدىڭ قاي مەزگىلىن ۇناتاسىز؟
ارينە كوكتەمدى. كوكتەم جەردى دە، كوڭىلدى دە كوتەرەدى.
5. جاقسى كورەر ماقالىڭىز قايسى؟
پايداسىز مىڭ سوزدەن بارماقتاي عانا پايدالى ءبىر ءىس ارتىق.
6. ءپىر تۇتاتىن جازۋشىڭىز كىم؟
سۇيگەنىمدى، بيىك كورگەنىمدى اتاي بەرسەم ۇزاق ءتىزىم. ءبىراق بىردە-بىرىن ءپىر تۇتا المادىم.
7. قاي ويشىلدىق قاي ءسوزى كوكىرەگىڭىزگە ۇيالادى؟ ويشىلداردىڭ كوكىرەكتە قالدىرعانى كوپ، تىزە بەرسەم بۇل دا ءبىر كىتاپ. ويشىلدار ءارقيلى، باياعىنىڭ ماڭگىلەرى دە ويشىل بولعان. اقىلدى وي ءبۇتىن باسقا ءبىر ەنسە، سۇيرەسەڭ دە شىقپاس، جىرتىق باسقا شىنجىرلاپ بايلاساڭ دا تۇرماس.
8. ەڭ سوڭعى وقىپ شىققان كىتابىڭىز؟
گوركييدىڭ «پورترەتتەرىن» تاعى دا ءبىر وقىپ شىقتىم.
9. كىمدى وقي الماي ءجۇرسىز؟
وقىعانىم وقىماعانىمنان، بىلگەنىم بىلمەگەنىمنەن ىستەگەنىم ىستەمەگەنىمنەن الدەقايدا از.
10. كوڭىلسىز ساتتەردەن قالاي ارىلاسىز؟
مەنىڭ كوڭىلسىزدىككە ىستەيتىن ەمىم: ەڭبەك، ساياحات، تازا اۋادا بوي جازۋ، كىشكەنتاي نەمەرەلەرىممەن ويناۋ.
11. قۇمار ماشىعىڭىز؟
تەك جاقسىنى كورۋ. بىرەر جامان دا ماشىعىم بار، ونى ايتۋعا ۇيالام.
12. نەنى جاقتىرمايسىز؟
تولىپ جاتىر: ارام ءومىر، سىلدىر ءسوز، ءجيى جينالىس، ماقتان، وسەك، زۇلىمدىق.
13. قانداي مىنەزدى قاسيەت تۇتاسىز؟
سەگىز قىرلى، ءبىر سىرلى، ءادىل، اق مىنەز — ۇلى قاسيەت.
14. سپورتقا قالايسىز؟
ۇناتامىن. از دا بولسا سپورتپەن اينالىسپاعان كۇنىم جوق.
15. وكىنىشىڭىز؟
ءومىردىڭ كوبىن بوس جىبەرىپپىن. ەندى قىسقا ءجىپ كۇرمەۋگە كەلمەي جاتىر.
16. كوڭىلىڭىزدى مازالاپ جۇرگەن كەيىپكەر بار ما؟
بار. ءبىراق، قۇرساقتاعى بالا قانداي بولىپ شىعارىن كىم بىلەدى.
17. ءتىل جاعىنان كىمنەن ۇيرەنەسىز؟
حالىقتان عانا.
18. ءوز شىعارماڭىزدىڭ قايسىسىن ساتتىرەك شىققان دەيسىز؟
ءوزىم سۇيسىنبەگەن شىعارمالارىمدى جارىققا شىعارعانىم جوق. جارىققا شىققانىمنىڭ بىردە-بىرى كوڭىل بيىگىندە تۇراقتاپ تۇرا المادى.
19. كەلەر جىلعا سالەمىڭىز؟
جاڭا جىلدا جەر سەمىز، ەل سەمىز بولعاي-اق، ەڭبەك قىرمانى تاسىعاي-اق.
1964
You Might Also Like
-
فادەيەۆ اسا كورنەكتى شىعارمالاردى جاراتقان ۇلكەن سۋرەتكەر، پۋبليسيست، سوۆەت ادەبيەتىنىڭ تەورەتيگى ەدى، تاماشا ۇيىمداستىرۋشى، مەملەكەت قايراتكەرى ەدى. گوركييدەن كەيىن مۇنداي سەگىز قىرلى، ءبىر سىرلى ت...
-
حالىقتىڭ ءان قازىناسىنىڭ بىزگە ۇقىپتىلىقپەن جەتۋى الدىمەن انشىگە بايلانىستى. بىرەۋدەن ەستىگەنىن نە ۇيرەنگەنىن سول قالپىندا جەتكىزۋشىنى مىندەتىن تولىق ورىندادى دەي المايمىز. ناشار جەتكىزۋشى جاقسى ءاند...
