ىسكە ءسات!
كەشە كەشكە، الماتى اەروۆوكزالىندا، جارقىراعان ەلەكتر نۇرىنىڭ استىندا ەكى حالىقتىڭ ۇلكەن توبى تاعى دا ءبىر كۇلىمدەسە، شۇرقىراسا قۇشاقتاستى. ىستىق جۇرەكتەن شىققان ەڭ قىمباتتى سوزدەرىمەن بىر-بىرىنە شاشۋ شاشتى. ۇلى ورىس ادەبيەتى مەن كوركەمونەرىنىڭ قازاقستانداعى ونكۇندىگىنىڭ باستاماسى ەدى بۇل. كوركەمونەرشىلەر ءوز سوزدەرىن وزدەرى ايتار. ال، ادەبيەت دۇنيەسىندە وسى ونكۇندىك بۇگىن بىزدەر ءۇشىن، ەرتەڭ تاريح ءۇشىن ۇلكەن وقيعا، حالىقتار دوستىعىنىڭ ايقىن ءبىر كورىنىسى.
ادەبيەت دوستىعى بەرىك دوستىق. ادام ونەرىنىڭ ىشىندە ەڭ ۇزاق جاسايتىندارىنىڭ ءبىرى ادەبيەت. عاسىرلار وتەدى، ومىرگە تالاي ۇرپاقتار كەلىپ، تالاي ۇرپاقتار كەتىپ الماسىپ جاتادى. ناعىز ادەبيەت سوندا دا قالىپ قويادى. ءومىردىڭ شەجىرەسىن كەيىنگى ۇرپاق، جاڭا قاۋىم ادەبي مۇرالاردان كورىپ وتىرادى، جاقسىسىنا سۇيسىنسە، جامانىنا رەنجىپ وتىرادى.
پارتيا، حالىقتىق سوۆەت ادەبيەتى ءوز زامانىن جىرلاۋمەن قاتار، سول زاماننىڭ بەينەسىن كەيىنگىلەرگە، قازىرگى سىرتقى ەلدەرگە كورسەتەتىن ناعىز قۇدىرەتتى ادەبيەت.
سوۆەت ادەبيەتىنىڭ ءتۇرى، سىرى، ءتىلى كوپ. سولاردىڭ ىشىندە وسى ورىس ادەبيەتى ۇلكەن ارنا. ءبارى سوعان قۇيادى. ول ارنادان سۋسىندامايتىن سوۆەت جەرىندە ەشبىر حالىق جوق. ءارى سۋسىندايدى، ءارى تولتىرادى وسى ارنانى.
ءبىر كەزدە ويداعى ورىستىڭ تاتياناسى مەن قىرداعى قازاقتىڭ قىز جىبەگى ءۇن قوسقان، ەجەلدەن سىبايلاس، مۇڭداس ەكى ەل بۇگىن ادەبيەت پەن كوركەمونەردىڭ سالتاناتتى مەرەكەسىن وتكىزىپ جاتىر. بۇل مەرەكە ادەبيەتىمىز بەن كوركەمونەرىمىزدى ءبىر جاڭا بەلەسكە كوتەرىپ تاستايتىنىنا كۇمان جوق. ىسكە ءسات، جولداستار!
1964
You Might Also Like
-
«كوسەگەڭ كوگەرسىن» — كونە قازاقتىڭ ۇلكەن باتاسى. جەردى كۇن كوگەرتسە كوسەگەنى وكتيابر كوگەرتتى. كوشپەلى، ساۋاتسىز اۋىلدا، ويىم قالىپتاسپاعان، قاناتىم ابدەن قاتپاعان شاعىمدا وكتيابر...
