InfoHub Logo

باكتەريالىق ۆاگينوز — سوڭعى ونجىلدىقتا جيىلەپ كەتكەن گينەكولوگيالىق اۋرۋلاردىڭ ءبىر ءتۇرى.

كەز كەلگەن قىناپ قابىنۋ ۇدەرىسى بەلگىلى ءبىر ۋاقىتقا دەيىن كانديدوز، سوز سەكىلدى جىنىستىق قاتىناس ارقىلى جۇعاتىن اۋرۋلارمەن بايلانىستى ەمەس، تەلىمسىز ۆاگينيزمگە جاتادى.

باكتەريالىق ۆاگينوز — پاتوگەندىك قوزدىرعىشتار تابىلماعان جاعدايدا، تۋىت جاسىنداعى ايەلدەردە قىناپ بولىندىلەرىنىڭ كوپ بولۋىنا ءجيى سەبەپ بولاتىن تەلىمسىز ۇدەرىس. بۇل قىناپ جۇيەسىنىڭ ديسبيوزى، ول لاكتوباسيلالاردان ەمەس، Mobilincus، ميكوپلازما، گارنەلل اسسوسياسيالارىنان تۇراتىن اۋرۋدىڭ ءتۇرى. قوزدىرعىش — Gardnerella Vaginalis — قىناپتا كوپ شوعىرلاناتىن، قوزعالمايتىن ۇساق كوپ ءتۇرلى باكتەريالار.

دەنى ساۋ تۋىت جاسىنداعى ايەلدەردىڭ قىنابىنداعى ميكروسەنوزدا لاكتوباكتەريالار باستى ورىن الادى، ولار ايەلدىڭ يممۋندىق جۇيەسىن شيرىقتىرادى، قىناپ ەپيتەليي جاسۋشالارىنا جابىسۋ ءۇشىن باسقا ميكروورگانيزمدەرمەن باسەكەلەس بولا الادى، قىناپ ىشىندە ءسۇت قىشقىلىنىڭ جوعارى شوعىرلانعان ءتۇرىنىڭ قىشقىل ورتاسىن كۇرادى، سۋتەگى اسقىنتوتىعىن ءتۇزۋ قاسيەتتەرىنە يە.

ىشەكتەگى بيوسەنوزدىڭ بۇزىلۋى، يممۋنولوگيالىق رەاكتيۆتىلىكتىڭ تومەندەۋى، گورموندىق جاعدايدىڭ وزگەرۋى باكتەريالىق ۆاگينوزدىڭ دامۋىنا اسەر ەتۋى مۇمكىن. ەكزوگەندىك فاكتورلاردىڭ ىشىندە يممۋنودەپرەسانتتار نەمەسە گورموندىق دارمەكتەر، نەسەپ-جىنىس جولى اۋرۋلارىن ەمدەۋدە قولدانىلعان باكتەرياعا قارسى ەم ەرەكشە ورىن الادى. باكتەريالىق ۆاگينوز دامۋىنىڭ ءقاۋىپ فاكتورلارىنا جىنىستىق سەرىكتى ءجيى اۋىستىرۋ، جاتىرىشىلىك كونتراسەپتيۆتەردى پايدالانۋ، نەسەپ-جىنىس قابىنۋ اۋرۋلارى، ىشەك ديسبيوسەنوزى جاتادى.

باكتەريالىق ۆاگينوز كەزىندە ايقىن فاكتورلاردىڭ اسەرىنەن لاكتوباكتەريالار دەڭگەيى كۇرت تومەندەۋى نەمەسە تولىعىمەن جوعالىپ كەتۋى دە مۇمكىن. سونىمەن قاتار قىناپ ىشىندە جوعارى شوعىرلانعان Gardnerella Vaginalis پەن لاكتوباكتەريالاردىڭ ورىندارى الماسادى. گاردنەرالار اناەروبتاردىڭ جاپپاي كوبەيۋىنە ىقپال ەتىپ، ولار ءوز كەزەگىندە امين قىشكىلدارىن ءبولىپ، قىناپ سەكتورىندا اميندەردىڭ شوعىرلانۋىن كۇشەيتەدى. وسى اميندەر قىناپ بولىندىلەرىنە جاعىمسىز ءيىس («بالىقتىڭ» ءيىسى) بەرەدى.

باكتەريالىق ۆاگينوزى بار ناۋقاستار ەتەككىر كەزىندە، جىنىستىق قاتىناستان كەيىن جاعىمسىز «بالىق» ءيىسىنىڭ شىعۋىنا، جىنىس جولدارىنان اق نەمەسە سۇر ءتۇستى كوپ بولىندىلەردىڭ بولىنۋىنە ءجيى شاعىمدانادى. بۇل بىرنەشە جىلعا سوزىلۋى مۇمكىن. اۋرۋ ۇدەگەندە بولىندىلەر سارعىلت-جاسىل تۇسكە ەنىپ، قويۋلانادى، كوبىكتەنەدى، سوزىلمالى جانە جابىسقاق بولىپ، قىناپتىڭ قابىرعالارى بويىنا ءبىرقالىپتى تارايدى. اعىندىلاردىڭ مولشەرى قالىپتى جاعدايدان اسۋى مۇمكىن. قىشىما، دەزۋريالىق بۇزىلۋلار، جىنىستىق قاتىناس كەزىندەگى اۋىرسىنۋلار ءجيى كەزدەسەدى، الايدا بۇل بەلگىلەر مۇلدە بولماۋى نەمەسە مەزگىل-مەزگىل پايدا بولۋى مۇمكىن.

باكتەريالىق ۆاگينوز كەزىندە تۇسىك تاستاعاننان كەيىنگى جانە بوسانعاننان كەيىنگى ەندومەتريت دامۋ كاۋپى 3،4-7 رەتكە ارتاتىندىعى، سونىمەن قاتار جاتىر قوسالقىلارىنىڭ قابىنۋ ۇدەرىسى جانە گيستەرەكتوميادان كەيىن جاتىر تۇقىلى قابىنۋىنىڭ ءۇش ەسەگە وسەتىندىگى تۋرالى ناقتى دالەلدەر بار. باكتەريالىق ۆاگينوز وزدىگىنەن تۇسىك تاستاۋ، حوريوامنيونيت، ۇرىق ماڭى سۋىنىڭ مەرزىمىنەن بۇرىن اعىپ كەتۋى، ۋاقىتىنان بۇرىن بوسانۋ سەكىلدى اكۋشەرلىك پاتولوگيانىڭ دامۋىنىڭ ءقاۋىپ فاكتورى بولىپ تابىلادى.

باكتەريالىق ۆاگينوز كىشى جامباس مۇشەلەرى قابىنۋ اۋرۋلارىنىڭ دامۋىنا جانە جاتىر تۇتىگى، جاتىردىڭ شىرىشتى قاباتى جۇقپالى اۋرۋلارىنىڭ كۇشەيۋىنە اسەر ەتەدى.

قازىرگى ۋاقىتتا باكتەريالىق ۆاگينوزدى ەمدەۋ ءۇشىن مەترونيدازول جانە كلينداميسين پايدالانىلادى. بۇل دارىلەر اناەروبقا قارسى سپەكترلى اسەرگە يە. باكتەريالىق ۆاگينوزدى ەمدەۋگە ارنالعان دارى-دارمەكتەردىڭ كوپتىگىنە قاراماستان، بۇل اۋرۋدان 55-83،3% جاعدايلاردا عانا تولىق جازىلىپ كەتۋ مۇمكىندىگى بار. نيترويميدازول پرەپاراتىنىڭ (قازىرگى ۋاقىتتاعى باكتەريالىق ۆاگينوزدى ەمدەۋگە ارنالعان نەگىزگى قۇرال) اسەرىن كۇشەيتۋ ماقساتىندا تەراپيادا جەرگىلىكتى قولدانىلاتىن پرەپاراتتاردىڭ قوسىمشا تۇرلەرى قولدانىلادى.

باكتەريالىق ۆاگينوزدا ەم اسەرىن كۇشەيتۋ ماقساتىندا قىناپقا ەنگىزۋگە ارنالعان گەكسيكون سۋپپوزيتورييلەرى بەرىلەدى. گەكسيكون پرەپاراتى قولدانۋعا ىڭعايلى، ۆەنەرولوگيالىق اۋرۋلاردىڭ  الدىن الۋعا ءتيىمدى قۇرال بولىپ تابىلادى ءارى ول قىناپتىڭ قالىپتى فلوراسىنا كەرى اسەر ەتپەيدى. قىناپقا جان-جاقتى ارەكەت ەتۋشى قۇرالداردىڭ ءبىر ءتۇرى — يودوكسيد، ول تۇندە 1 سۋپپوزيتورييدەن 10  كۇنگە تاعايىندالادى.

ەمدەلۋدىڭ ەكىنشى كەزەڭىندە قىناپتىڭ ميكروسەنوزىن قالىپقا كەلتىرۋ ماقساتىندا، سوڭعى جىلدارى ەۋبيوتيكتەر، سونىڭ ىشىندە اۋرۋدىڭ قايتالانۋ ءقاۋپىن تومەندەتەتىن، قىناپتىڭ ءوز لاكتوفلوراسىنىڭ وسۋىنە اسەر ەتەتىن اسيالاكت قولدانىلادى. اسيالاكت تۇندە 1 سۋپپوزيتورييدەن 10 كۇنگە تاعايىندالادى.

ج. ن. سىرعابايەۆا

---