بارىمدى سىزدەرگە باعىشتايمىن
مەنىڭ ءقادىرلى وقىرماندارىم! زور ءىلتيپاتتارىڭىز، مەنىڭ «قاراعاندى» رومانىما ارنالعان بۇگىنگى جازۋشىلار كونفەرەنسياسىنا وراي، ول شىعارماما دەگەن ىقىلاس-نيەتتەرىڭىز مەنى مەيلىنشە تولقىتتى.
لەنين پارتياسى مەن سوۆەت وكىمەتىنىڭ جاڭا ءومىر جاساۋداعى،كوممۋنيزم قۇرىلىسشىسى — جاڭا سوۆەت ادامىن تاربيەلەپ وسىرۋدەگى قۇدىرەتتى كۇشى مەن وراسان زور قىزمەتى بۇكىل جازۋشىلىق ەڭبەگىمنىڭ ۇزىنا بويىندا مەنى ۇنەمى تولعاندىرىپ، تەبىرەندىرىپ كەلەدى. مەن ءوزىمنىڭ بويىمداعى بۇكىل دارىنىم مەن كۇش-قۋاتىمدى پارتيا ىسىنە، حالىق مۇددەسىنە قالتقىسىز، الاڭسىز باعىشتاعان جازۋشىمىن. مەنىڭ تۆورچەستۆومنىڭ وزەگى، ارقاۋى، نەگىزى جاڭا زامان، جاڭا ادام.
قاراعاندى جايىندا، ونىڭ ادامدارى جايىندا مەن كوپ جىلداردان بەرى قالام تەبىرەنتىپ كەلەمىن. سوندىقتان دا مەنىڭ بۇكىل تۆورچەستۆومنىڭ كۇشى، ىرگە تاسى قاراعاندى تاقىرىبى، جۇمىسشىلار ءومىرى.
1939 جىلدا مەن قاراعاندى قۇرىلىسى ونىڭ ادامدارى جايىندا تالاپتانىپ رومان جازدىم. تىرناق الدى ءىرى شىعارمانىڭ ءتيىستى باعاسىن وقىرمان جۇرتشىلىق كەزىندە بەرگەن بولاتىن. سودان كەيىن مەن بىرنەشە جىل اۋىل ومىرىنە بوي ۇرىپ كەتتىم. كولحوزدى اۋىلعا، ونىڭ وزات ادامدارىنا باعىشتالعان «ميلليونەر»، «شىعاناق بەرسييەۆ» روماندارىن جازدىم.
قالاي دەگەنمەن، سوسياليستىك قاراعاندى تاقىرىبى مەنى ۇنەمى تەبىرەنتىپ، تولعاندىرىپ كەلەدى. سونىمەن 1950 جىلى «قاراعاندى» رومانىن جازا باستادىم. ەڭبەك اياقتالدى. جۇرتشىلىق سارابىنا بەرىلدى. مەنىڭ جاڭا رومانىما وقىرماندار قاۋىمىنىڭ وسىنشا كوڭىل ءبولىپ، كەڭ تۇردە پىكىر بىلدىرگەندەرىنە مەيلىنشە قۋانىشتىمىن.
رومان قاھارماندارىنىڭ اتتارى ويدان شىعارىلىپ، وزگەرتىلىپ قويىلسا دا، سىزدەردىڭ كوپشىلىكتەرىڭىز ولاردىڭ تۇپكى توركىنىن — جاناما بەينەلەرىن اينىتپاي تانىدىڭىزدار. ماسەلەن، «قاراعاندى كومىر» ترەسىنىڭ باسقارۋشىسى ششەرباكوۆتى سىزدەر وسى باسسەيىننىڭ العاشقى قۇرىلىسشىسى — گورباچيەۆ دەپ بىلدىڭىزدەر. مەنىڭ رومانىمداعى باسقا قاھارمانداردىڭ دا نەگىزگى بەينەلەرى قاراعاندى قۇرىلىسىنا بەلسەنە قاتىسقان شاحتەرلەر، كەن بارلاۋشىلار، ينجەنەرلەر، جۇمىسشىلار، پارتيا، سوۆەت قىزمەتكەرلەرى. ولاردىڭ كوپشىلىگى بۇگىنگى وسى كونفەرەنسياعا قاتىسىپ وتىر.
سىزدەردىڭ قالتقىسىز دوستىق كەڭەستەرىڭىز، ەسكەرتپەلەرىڭىز مەنىڭ كەلەشەكتەگى جازۋشىلىق ەڭبەگىمە زور كومەك، ۇلكەن سۇيەنىش بولادى.
مەن سىزدەرگە ءوزىمنىڭ تۆورچەستۆولىق جوسپارىمدى ايتايىن. مەن قازاقستان قارا مەتاللۋرگياسىنىڭ تۇڭعىشى — تەمىرتاۋ بولات قورىتۋشىلارى جايىندا كوركەم فيلم سەنارييىن جازۋعا كىرىستىم. سونىمەن قاتار، تەمىرتاۋ تۋرالى رومانعا كەرەكتى دەرەكتەر جينايمىن. ايتكەنمەن قاراعاندى تاقىرىبىن دا تاستامايمىن. تاياۋ ۋاقىتتا قاراعاندىنىڭ باتىر شاحتەرلەرى ومىرىنەن پەسا جازباقپىن.
پارتيامىزدىڭ تاريحي XIX سەزى مەنى جاڭا شىعارما جازۋعا شابىتتاندىردى.
قىمباتتى وقىرماندارىم، مەنىڭ تۆورچەستۆوما وسىنشا كوڭىل ءبولىپ، قۇرمەت كورسەتكەندەرىڭىزگە تاعى دا ىستىق ىقىلاسپەن العىس ايتامىن. سىزدەردىڭ بۇل سىي-قۇرمەتتەرىڭىزدىڭ ەسەسىن ءوزىمنىڭ جاڭا كىتاپتارىممەن قايىرامىن. بۇعان سەنىڭىزدەر!
1952
You Might Also Like
-
بىزدە كوركەم ادەبيەت حالىقتىڭ مەنشىگى. سوندىقتان دا سوۆەت ادەبيەتى ءومىر شىندىعىنا سۇيەنىپ، ماركسيزم-لەنينيزمنىڭ وزىق تەورياسىنا سۇيەنىپ، بيىك بەلەسكە شىقتى، وراسان مول تابىستارعا يە بولدى. جالپى سو...
-
بالادان باستاپ ەڭكەيگەن كارىگە دەيىن كوركەم سوزگە قۇلاق تۇرەدى. سوۆەت ەلىندە كوركەم ءسوز، كوركەم ادەبيەت ءومىر ايناسىنا، ادامداردىڭ رۋحاني سۋسىنىنا، دۇنيەتانىمىنا اينالدى. كوممۋنيزم ورناتۋدا، ادامدار...
