ءبىز وستىك
سوۆەتتىك سوسياليستىك رەسپۋبليكالار وداعى قۇرىلعالى وتىز جىل تولدى. وسى وتىز جىلدى جەكە-جەكە الساق ءار رەسپۋبليكانىڭ تاريحىندا ءبىر بيىك ءتارىزدى، تۇتاس الساق — سول بيىكتەر بىرىگىپ ءبىزدىڭ اقباس الاتاۋ ءتارىزدى بوپ كورىنەدى. سوۆەتتىك ءومىردىڭ تابىسى، تاريحى سونشالىق ايدىندى. عاسىرلار بويى كوشۋمەن، مال باعۋمەن كەلگەن قازاق ەلىنىڭ كوركىن بۇل جىلدار مۇلدە وزگەرتتى. بۇرىن ءجۇز قازاقتىڭ ىشىنەن ءبىر ساۋاتتى ازار تابىلسا، ءقازىر ورتا نەمەسە جوعارى ءبىلىمدى ادامدار ەكى ءۇيدىڭ بىرىنەن تابىلادى. قازاق رەسپۋبليكاسىندا تەك جوعارى دارەجەلى وقۋ ورىندارىنىڭ سانى 27-گە، تەحنيكۋمدار سانى 85-كە جەتتى. قازاقتىڭ ءوز الدىنا عىلىم اكادەمياسى قۇرىلدى.
ءبىر كەزدە «شايتان اربا»، «شايتان شامنان» شوشيتىن ەل بۇل كەزدە ولارسىز تۇرا المايتىن بولعان. ۇلان-بايتاق دالامىزدى جاڭارتىپ، تۇرلەنتىپ باراتقان جويقىن كۇش — ەلەكتر، موتور. قول وراق، اعاش رىدۋانداردى ەندى مۋزەيدەن عانا كورۋگە بولادى. بۇرىنعى قازاق ات تىزگىنىن قانداي ۇستاي بىلسە، بۇگىنگى قازاق سوسياليستىك تەحنيكا تىزگىنىن سونداي ۇستاي بىلەدى. «ات ەردىڭ قاناتى» دەگەن ماتەل ەسكىردى. پوەزد، سامولەت، ماشينالار ەل قاناتىنا اينالدى.
قازاقستان ءىرى ونەركاسىپتەرىمەن دە، مادەنيەتىمەن دە سوۆەتتەر وداعىندا الدىڭعى رەسپۋبليكالاردىڭ قاتارىنا قوسىلدى. بۇكىل سوۆەت ەلىنىڭ ءۇشىنشى كوچەگاركاسى — قاراعاندى بىزدە. بالقاش، جەزقازعان، شىمكەنت ءتۇستى مەتاللۋرگيا زاۆودتارى، تەمىرتاۋ قارا مەتاللۋرگيا زاۆودى ءبىزدىڭ جەردە. ءالى پايداعا اسپاي جاتقان بايلىقتار ەل كوركىن، تابيعات كوركىن تۇرلەنتۋ ءۇشىن جاسالىپ جاتقان جاڭا قۇرىلىستار قانشا! ءبىزدىڭ جۇمىسشىلارىمىز، كولحوزشىلارىمىز ەڭبەك قىزىعىنا سونشالىق بەرىلگەن.
— كەشەدەن بۇگىن، بۇگىننەن ەرتەڭ جاقسى ىستەپ، كوممۋنيزمگە تەز جەتسەك، — دەيدى. تەز جەتۋ جارىسىندا مالشىلاردان، ەگىنشىلەردەن، جۇمىسشىلاردان تالاي-تالاي ەڭبەك ەرلەرى شىعىپ جاتىر. قازاقستان عىلىم اكادەمياسىنىڭ ماڭىنا توپتالعان عالىمدارىمىز وسى ەڭبەك تاسقىنىنا كەڭىرەك جول اشۋ، جەرىمىزدىڭ جاسىرىن بايلىقتارىن تابا ءتۇسۋ جولىندا ەڭبەك ىستەپ كەلەدى. قازاقستان جازۋشىلارى وداعى ماڭىنا توپتالعان جازۋشىلارىمىز، قازاقستان ونەر قايراتكەرلەرى كۇن ساناپ جاڭارعان حالقىنىڭ بەينەسىن، سەزىمىن كورسەتۋ جولىندا ەڭبەك ىستەپ كەلەدى.
«بارلىق تابىستارعا كوممۋنيستىك پارتيانىڭ باسشىلىعى ارقاسىندا، ۇلى ورىس حالقىنىڭ كومەگى ارقاسىندا جەتتىك، ءالى دە جەتە بەرەمىز!» دەيدى بۇكىل قازاق.
«بۇل تابىستاردى قاسكۇنەمدەردەن، سوعىس ءورتىن سالۋشىلاردان بارىمىزدى سالا قورعايمىز»، — دەيدى بۇكىل قازاق.
You Might Also Like
-
بۇكىل دۇنيە جۇزىلىك بەيبىتشىلىك سوۆەتىنىڭ ۇندەۋىنە ەلىمىزدە جاپپاي قول قويۋ باستالدى. جۇرەگى اق، نيەتى ادال بارشا ادامداردىڭ تىلەك-مۇددەلەرىن بەينەلەيتىن بۇل تاريحي دوكۋمەنتكە ءقازىردىڭ وزىندە سان مي...
-
دراماتۋرگيا ماسەلەلەرى ادەبيەتتەن تىس ءومىر ءسۇرۋدى ويلامايتىن ءبىزدىڭ ءارقايسىمىز مىقتاپ اتسالىسىپ وتىرعاندا عانا ويداعىداي شەشىلەدى دەپ بىلەمىن. ءبىز ءوز ويىمىزدى، ءوز پىكىرىمىزدى، ازدى-كوپتى تۆورچەستۆو...
