ءبىلىم ءمينيسترى جالاقىنىڭ قالاي ارتاتىنىن ناقتى مىسالمەن ءتۇسىندىردى
ق ر ءبىلىم جانە عىلىم ءمينيسترى كۇلاش ءشامشيدينوۆا جالاقىسى تومەن بيۋدجەتتىك سالا قىزمەتكەرلەرىنىڭ جالاقىسى قالاي ارتاتىنىن ءتۇسىندىردى.
ۇكىمەت ۇيىندە وتكەن باسپا ءسوز ءماسليxاتىندا ك.ءشامشيدينوۆا ارنايى سلايدتاردى كورسەتىپ، ناقتى مىسالداردى دا كەلتىردى. ماسەلەن، قالادا جۇمىس ىستەيتىن الەۋمەتتىك پەداگوگ، كىتاپxاناشى مەن تاربيەشى 2-3 ەڭبەك وتىلىمەن 55 869 تەڭگە السا، 1 ماۋسىمنىڭ باستاپ ولاردىڭ ايلىعى 70 859 تەڭگەگە دەيىن ارتادى. ال اۋىلدا 69 837 تەڭگەدەن 88 573-گە دەيىن كوتەرىلەدى. سول سياقتى تاربيەشىنىڭ كومەكشىسى قالادا 54 117 تەڭگە السا، جالاقى كوتەرىلگەننەن كەيىن اتالعان سوما 63 904 تەڭگە بولادى. اۋىلدا وسى ساناتتاعى مامانداردىڭ ايلىعى 67 713 تەڭگەدەن 79 880-گە دەيىن ۇلعايادى. بۇدان بولەك، قالادا پەداگوگ-پسيxولوگتىڭ ايلىعى 81 565، ال اۋىلدا 101 957 تەڭگە بولادى. ءقازىر 2-3 جىلدىق ەڭبەك ءوتىلى بار جاس مۇعالىمدەر قالادا 55 480 تەڭگە السا، الداعى ۋاقىتتا ولاردىڭ ايلىعى 66 382 تەڭگەگە دەيىن كوتەرىلەدى. ال اۋىلدا جاس مۇعالىمدەردىڭ جالاقىسى 82 976 تەڭگە بولادى.
ايتا كەتەيىك، بۇگىنگى بريفينگتە ءبىلىم ءمينيسترى ارنايى تاريفتىك كوەففيسەنتتىڭ بەكىتىلگەنىن مالىمدەدى. ال ق ر ءبىلىم جانە عىلىم مينيسترلىگى ەسەپتەۋ جۇمىستارىن باستاپ كەتتى.
«وسى ورايدا ايتا كەتەتىن ماسەلە، جالپى بيۋدجەت سالاسىنداعى جالاقىسى تومەن قىزمەتكەرلەردىڭ ايلىعىن كوبەيتۋگە ارنالعان قارجىنىڭ 75 پروسەنتى ءبىلىم سالاسىنا ءبولىنىپ وتىر. جالاقى 1 ماۋسىمنان باستاپ كوتەرىلەتىن بولادى. نەگىزگى پەرسونالدىڭ ايلىعى كوتەرىلەدى. ولاردىڭ ىشىندە ەڭبەك ءوتىلىن ەندى عانا باستاعان جاس مۇعالىمدەر، كوللەدج ۇستازدارى، پسيxولوگتار، بالاباقشالاردىڭ جەتەكشىلەرى، تاربيەشىلەرى مەن كومەكشىلەرى، سونىمەن قاتار، قوسىمشا ءبىلىم بەرۋ جۇيەسىندە جۇمىس ىستەيتىن قىزمەتكەرلەر بار»، - دەدى ك.ءشامشيدينوۆا ۇكىمەت ۇيىندە وتكەن باسپا ءسوز ءماسليxاتىندا.
ونىڭ سوزىنە قاراعاندا، كومەكشى پەرسونالدىڭ جالاقىسى دا ارتادى. ولار - ەدەن جۋۋشىلار، كۇزەتشىلەر، وت جاعۋشىلار، سانتەxنيكتەر مەن ەلەكتريكتەر.
«سوسىن باسقارۋشى پەرسونال بار. ولار - مەكتەپ ديرەكتورلارى مەن ولاردىڭ ورىنباسارلارى»، - دەپ اتاپ كورسەتتى ك.ءشامشيدينوۆا.
You Might Also Like
-
ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ اعا وقىتۋشىسى كىيسىكوۆا اسەم جانبولات قىزى
