InfoHub Logo

ءبىلىم جانە عىلىم ءمينيسترى ەرلان ساعادييەۆ ماسكەۋ مەملەكەتتىك ۋنيۆەرسيتەتىنىڭ رەكتورى ۆيكتور ءسادوۆنيچييدىڭ «قازىرگى جوعارى ءبىلىمدى باكالاۆر مەن ماگيستر دەپ ەكىگە ءبولىپ، بولون ۇدەرىسىنە قوسىلعانىمىز دۇرىس بولمادى» دەگەن پىكىرىمەن كەلىسپەيدى. رەسەيدىڭ رەكتورلار وداعىنىڭ پرەزيدەنتى ءوز ەلىندەگى جوعارى ءبىلىم بەرۋدى بۇرىنعى بەسجىلدىق جۇيەگە قايتا اۋىستىرۋدى ۇسىنىپ وتىر. ە.ساعادييەۆتىڭ ايتۋىنشا، قازاقستاندا ول جاعىنان ەشقانداي وزگەرىستەر بولمايدى.

«مەن ءوزىم ەلىمىزدىڭ بولون ۇدەرىسىنە قوسىلعانى قاتە بولدى دەپ سانامايمىن. قالاي بولعاندا دا، ءبىلىم بەرۋ سالاسىنداعى xالىقارالىق ينتەگراسيانىڭ بولاشاعى زور. ەگەر مەملەكەتتەر قانداي دا ءبىر جۇيەگە قوسىلسا، وندا بىزگە دە وعان قوسىلىپ بەيىمدەلۋگە تۋرا كەلەدى. سەبەبى xالىقارالىق ينتەگراسياسىز 30 دامىعان مەملەكەتتىڭ قاتارىنا قوسىلۋ مۇمكىن ەمەس. سوسىن نەگىزگى ماسەلە ءبىلىم بەرۋدىڭ فورماسىندا ەمەس، ونىڭ مازمۇنىندا، وقۋ باعدارلاسىنىڭ ساپاسى دۇرىس بولسا، مەرزىمىن كەلتىرۋگە بولادى. بولون پروسەسى بولا ما، ادام ءۇش جىل وقي ما، ءتورت جىل وقي ما، ول ماڭىزدى ەمەس. سەبەبى ادام ءومىر بويى ءبىلىم الىپ جاتادى. ال سول ءبىلىمنىڭ ماڭىزدى دەگەن باعىتتارىن نەعۇرلىم تەز مەڭگەرسەڭ، سوعۇرلىم ساعان دەگەن سۇرانىس جوعارى بولادى. بىلايشا ايتقاندا، ادام العان ءبىلىمدى ءىس جۇزىندە قولدانا ءبىلۋى كەرەك. وسى ماسەلە ماڭىزدى. سوندىقتان الەم ەلدەرى ءبىلىمنىڭ فورماسى جاعىنان ءبىر جۇيەنى قابىداسا دا، ءبىلىمنىڭ مازمۇنىندا شەك جوق. اركىم ونى بارىنشا ءتيىمدى ەتىپ بەيىمدەۋگە تىرىسادى». - دەدى ساعادييەۆ قازاقپارات تىلشىسىنە بەرگەن سۇxباتىندا.

ايتا كەتەيىك، جاقىندا ماسكەۋ مەملەكەتتىك ۋنيۆەرسيتەتىنىڭ رەكتورى ۆيكتور سادوۆنيچيي «رەسەيدىڭ بولون ۇدەرىسىنە قوسىلىپ، جوعارى ءبىلىم بەرۋ سالاسىن ءتورتجىلدىققا اۋىستىرعانى قاتە بولدى» دەپ مالىمدەگەن.

ونىڭ ايتۋىنشا، ەۋروپا ەلدەرى اتالعان ستاندارتقا اۋىسۋدىڭ الدىندا ءبىلىم بەرۋ سالاسىن رەتتەپ الدى. ال رەسەيدە ءتيىستى جۇمىستى اتقارماي جاتىپ، جاڭا جۇيەگە اۋىسا سالدى. سونىڭ سالدارىنان ۋنيۆەرسيتەت پاندەرى جالپىلاما بولىپ كەتتى. 2010 جىلى قازاقستان دا بولون دەكلاراسياسىنا قوسىلدى.

---