InfoHub Logo

كەنجەكەڭ تاعى بىردە ءبىر جاقتان كەلە جاتىپ، ءبىر بايدىڭ ۇيىنە ءتۇسىپ، سول ۇيدە قونىپتى. سول ءۇيدىڭ ەسىگىندە ءبىر جالشى جىگىت ءجۇرىپتى. كەنجەكەڭ تاماق ءىشىپ، جايلانىپ بولعان سوڭ سىرتقا شىعادى. سول كەزدە الگى جالشى جىگىت كەنجەگە كەلىپ:

— كەنجەكە، مەنى وسى جالشىلىقتان قۇتقارىڭىزشى، — دەپ ءوزىنىڭ مۇڭىن شاعادى.

— جالشىلىقتان قۇتىلعىڭ كەلسە، سەن مەنىڭ ايىلىمدى ۇرلاپ ال، — دەپتى.

سويتەدى دە، ءوزى ۇيگە كىرىپ، جاتىپ قالادى. ەرتەڭگىلىگىندە كەنجە اتىن ەرتتەيىن دەسە، ءبىر ايىلى جوق. كەنجە:

— ايىلىمنىڭ بىرەۋى جوق، بىرەۋ ۇرلاپ الىپتى. بايەكە، ايىلىمدى تاپتىرىپ بەر، — دەيدى. باي جالشىلارىنا اقىرىپ، ولاردىڭ ەكى اياعىن ءبىر ەتىككە تىعادى. بايدىڭ جالشىلارى ايىلدى «ءبىز العانىمىز جوق» دەسە دە، باي ولارعا سەنبەي تىنتكەن دە، ايىل الگى تۇندە كەنجەگە جولىققان جىگىتتەن شىعادى. باي جالشى جىگىتتى ۇرماقشى بولعاندا، كەنجە وعان ارا ءتۇسىپ، ونى ۇرعىزباي الىپ قالادى.

بايعا كەنجە:

— وسى جالشىڭىزدى ءبىر ايىلدىڭ قۇنىنا ماعان بەرىڭىزشى. جازاسىن ءوزىم بەرەيىن، — دەيدى.

ءسويتىپ، الگى جالشى جىگىتتى وزىمەن بىرگە الىپ كەتەدى. كەيىن الگى جىگىت «ءبىر ايىلعا ساتىلىپ كەلگەن» دەپ، «ءبىر ايىل» اتانىپ كەتەدى. كەنجە وعان ەنشى بەرىپ، ۇيلەندىرىپ، جەكە وتاۋ ەتىپ، بولەك شىعارادى.

---