ءبىر قايىرى بار شىعار
كۇندەردىڭ بىرىندە مۇحيت ورتاسىنداعى كەمە اپاتقا ۇشىراپ سۋعا كەتەدى. كەمەدەن ءبىر ادام عانا ءتىرى قالىپ، اعاش بولشەگىندە جاتقان ادامدى تولقىندار ەلسىز ارالعا اپارىپ تاستايدى. امان قالعانىنا شۇكىر ەتكەن كىسى اۋەلدە كومەك كەلەر دەگەن ۇمىتپەن كوكجيەككە قاراۋمەن جۇرەدى.
الايدا ەشقانداي كەمەنىڭ قاراسى كورىنە قويمايدى. كەيىن جىرتقىش اڭ مەن جاۋىننان قورعانۋ ءۇشىن اعاشتار مەن جاپىراقتاردان شاعىن ۇيشىك جاسايدى. جاعادان تاپقان كەمە قالدىقتارى مەن كومپاس سەكىلدى كەرەك جاراقتاردى جيناپ، ۇيىنە اكەلىپ الادى. بالىق اۋلاپ، ازىقتانىپ، كۇندەر كەزەگىمەن ءوتىپ جاتتى. ءۇمىتىن ۇزبەستەن كۇندە اللاھۋ تا’الاعا قۇتقارۋىن تىلەپ، دۇعا ەتىپ جالبارىنۋدى توقتاتپايدى. ءبىر كۇنى ادەتتەگىدەي تۇششى سۋ اكەلۋ ءۇشىن ارالدىڭ ورتاسىنا قاراي كەتەدى. قايتىپ كەلگەنىندە نە كورسىن؟! مىڭ ءبىر ەڭبەككە سالىنىپ، ءىشىن كەرەك جاراققا تولتىرىپ جاساعان ءۇيى ورتەنىپ جاتىر ەكەن. ونسىز دا قايعىدان قۇلازىپ جۇرگەندە، مىنا جاعداي مۇڭ ۇستىنە مۇڭ قوسىپ ەڭسەسى ودان سايىن تۇسەدى. وسى جابىرقاۋلى كۇيدە ءبىر شەتتە جاتىپ ۇيىقتاپ كەتەدى. تاڭ اعارا باستاعاندا جاعاعا جاقىنداپ كەلە جاتقان كەمەنىڭ گۋىلىنەن ويانادى. كەمە ونى قۇتقارۋعا كەلگەن ەكەن. كەلگەندەردەن: «مەنىڭ مۇندا ەكەنىمدى قايدان بىلدىڭدەر؟» — دەپ سۇراعاندا: «ءسىز جاققان سيگنالدىق ءتۇتىندى كورىپ كەلدىك»، — دەپ جاۋاپ بەرگەن ەكەن.
دەمەك ۇناتپاعان نارسەمىز ءبىز ءۇشىن قايىرلى بولۋى، ال ۇناتقان نارسەمىز جامان ناتيجەمەن اياقتالۋى ابدەن مۇمكىن ەكەن. ءبىز بىلمەيمىز، اللاھ جاقسى بىلەدى.
You Might Also Like
-
1986 جىل. ەرتە كوكتەم. قازاقستان جازۋشىلار وداعىنىڭ كەزەكتى توعىزىنشى سەزى شاقىرىلدى. بۇل كەزدە كەنجە قىزىم اقمارالدى جاڭا بوسانىپ، بىرەسە ءوزىم، بىرەسە بالام اۋىرىپ قاتتى قينالىپ جۇرگەن شاعىم.
