بىزگە بىردەڭەلەر جەتىسپەيدى
جۇرتشىلىعىمىزدىڭ سوڭعى كەزدە ماڭىزدى ماقالالاردى وقىمايتىن بوپ كەتكەنى ءبىز ءۇشىن ورنى تولماس وكىنىش ەكەنى وزىنەن-وزى تۇسىنىكتى. ايتسە دە، ءبىز ءوزىمىزدىڭ باسماقالالارىمىزبەن ەلىمىزدەگى كۇردەلى ماسەلەلەردى شەشۋ جولىنداعى ورتاق ىسكە لايىقتى ۇلەس قوسىپ كەلەمىز. ءبىز ەڭ اۋەلى ەلىمىزدىڭ مادەني جانە ەكونوميكالىق دامۋىن جۇزەگە اسىرۋ ءۇشىن نە ىستەۋ كەرەكتىگىن انىقتاپ الامىز.
ءقازىر بىزگە بىردەڭەلەر جەتىسپەيدى. ال بىردەڭەلەر جەتىسپەگەن ەلدە بەرەكە دە، ءتارتىپ تە بولمايدى.
بىزگە بىردەڭەلەردىڭ جەتىسپەيتىنىن بيلەۋشى پارتيامىزدىڭ مۇشەلەرى دە، وپپوزيسياشىلدار دا — ءبارى دە جاقسى بىلەدى. ءبىراق بىزدەگى الاۋىزدىق بىردەڭەلەردىڭ جەتىسپەيتىنىن تۇسىنگەندىكتەن ەمەس، نەنىڭ جەتىسپەيتىنى اركىمنىڭ ءارقالاي تۇسىنەتىندىگىنەن شىعىپ كەلدى. ال ەندى نەنىڭ جەتىسپەيتىنىن تۇسىنە بىلۋدە اۋىزبىرلىككە قول جەتىپ وتىرعان قازىرگى كەزەڭدە بىزگە نەنىڭ جەتىسپەيتىنىن انىقتاپ الۋ وڭاي بولاتىنى بارىمىزگە دە ۇلكەن مەدەۋ. (ۇقتىڭىزدار ما؟.. وتە جاقسى!)
بىزگە بىردەڭەلەردىڭ جەتىسپەيتىنىن وڭشىلدار دا، سولشىلدار دا، پروگرەسشىلدەر دە، كونسەرۆاتورلار دا، ينتەلليگەنسيا دا، قاراپايىم كوپشىلىك تە ءتۇسىنىپ وتىرعانى — ۇلتتىق بىرلىگىمىز بەن ىنتىماعىمىزدىڭ جارقىن كورىنىسى ەمەس پە!
بىزگە نەنىڭ جەتىسپەيتىنىن تۇسىنگەننەن كەيىنگى جەردە نە جەتىسپەسە دە — مەيلى، ەلىمىزدىڭ ەڭسەسى ءبارىبىر كوتەرىلە باستايتىنىنا ءشۇبامىز جوق.
ادام اتاۋلىعا ءارقاشان بىردەڭە جەتپەي جۇرەدى. سول سياقتى، قوعامعا دا بىردەڭەلەر جەتىسپەي جاتادى. بۇل اقيقاتتى ءبىز ءوزىمىزدىڭ بۇگىنگى قوعامنان عانا ەمەس، ەلىمىزدە بىزگە دەيىن ءومىر سۇرگەن قوعامداردان دا كورەمىز. ياعني، بۇدان: بىزگە بىردەڭەلەر باياعىدا دا جەتىسپەگەن، قازىردە دە جەتىسپەيدى، كەلەشەكتە دە جەتىسپەيتىن بولادى دەگەن قۇرىشتاي قورىتىندى تۋادى.
سوندا بىزگە ناقتى نەمەنەلەر جەتىسپەيدى؟
مىنە، ءبىز وسى ماسەلەنى تولىڭ شەشكەن كۇنى، ياعني، وسى سۇراققا تولىڭ جاۋاپ تاپقان كۇنى ەلىمىزدىڭ كۇردەلى ماسەلەلەرىنىڭ ءبارى دە وز-وزىنەن رەتتەلەدى دەپ باتىل بولجام ايتا الامىز.
ءبىزدىڭ بارىمىزگە بىردەڭەلەر جەتىسپەي وتىرعاندىقتان، ءبىز الاۋىزدىق اتاۋلىنى تۇگەل ۇمىتۋىمىز كەرەك تە، بىزگە نەمەنەلەردىڭ جەتىسپەيتىنىن جاتپاي-تۇرماي ويلاسۋىمىز كەرەك.
قۇرمەتتى وقىرماندار، سىزدەر مۇنداي «بىردەڭەلەردى» بۇدان بۇرىن وقىپ كوردىڭىزدەر مە، كورمەدىڭىزدەر مە؟
ورىسشادان اۋدارعان عابباس قابىشيەۆ
You Might Also Like
-
— دوستارىم! — دەدى كوزىلدىرىكتى كىسى.— مۇنداي ماسەلەدە اسىعۋدىڭ ءجونى جوق. جان-جاقتى ويلانىپ-تولعانىپ الۋ كەرەك.
