جاستاردىڭ وتى جالىندايتىن جىل
جاستار-كەز كەلگەن مەملەكەتتىڭ ەڭ بەلسەندى بولىگى، قوعامنىڭ قوزعاۋشى كۇشى، ماڭگىلىك ەلدىڭ بولاشاعى. ەلدىڭ كەمەل بولاشاعى جاستاردىڭ قولىمەن جاسالادى. ءبىز ءوز تاراپىمىزدان ەلىمىزدىڭ، مەملەكەتىمىزدىڭ دامۋىنا ۇلەس قوسۋعا مىندەتتىمىز. «100 ناقتى قادام»، رۋحاني «ۇلى دالانىڭ جەتى قىرى» باعدارلاماسى دا جاستاردىڭ ىسىنە، دامۋىنا نەگىزدەلىپ جولدانعان. سوندىقتان بۇگىنگى باستى تالاپ تا، قولداۋ دا جاستار ءۇشىن بولىپ تۇر.
ءوز ەلىمىزدى الەمگە تانىتۋ ءۇشىن ايانباي ەڭبەك ەتۋ كەرەكپىز. «مەنىڭ قولىمنان نە كەلەدى؟»، «مەن نەنى جاقسى جاساي الامىن؟» -دەپ ويلانۋىمىز كەرەك كەزەڭگە كەلگەن سياقتىمىز. سەبەبى، ءبىز ماڭگىلىك ەلدىڭ-تاۋەلسىز ۇرپاقتارىمىز!
جاستار جىلى-قازاقستان جاستارى ءۇشىن العاش رەت باستاۋ العان قۋانىشتى وقيعا بولدى. مۇنىڭ وزىنەن-اق بىزگە بەرىلگەن كوپتەگەن مۇمكىندىكتەردى بايقاۋعا بولادى. بۇل مۇمكىندىكتەر ءوز بولاشاعىمىز بەن ەل بولاشاعىنا تىكەلەي بايلانىستى. جەكە بولاشاعىمىزدى جوسپارلاي وتىرىپ، ەل بولاشاعىن قالىپتاستىرامىز. بولاشاق دەگەن ءسوزدى ەستىگەندە ەڭ ءبىرىنشى ويعا كەلەتىنى - ارماندار، ماقساتتار، جوسپارلار. بىزدەر ءۇشىن جۇمباق، قۋانىشتى ساتتەر، رومانتيكا دەسەم بولاتىن شىعار. الدىمىزعا قانداي ىستەردى اكەلسە دە ساپالى جاسايمىز، جاساي الامىز دەگەن ويلار.
ەلباسىمىز جاستار جىلىنىڭ سالتاناتتى اشىلۋىندا بىلاي دەگەن بولاتىن: «بۇل-مەملەكەت تاراپىنان وسكەلەڭ ۇرپاقتى قولداۋعا باعىتتالعان ماڭىزدى قادام. تاۋەلسىزدىك رۋحىمەن ءوسىپ كەلە جاتقان بۇگىنگى جاس ءبۋىن-بىزدىڭ ەرتەڭگى ءۇمىتىمىز، سەنىمدى تىرەگىمىز»
ياعني، ءبىزدىڭ ارماندارىمىز بەن ماقساتتارىمىز- ەلىمىزدىڭ ءۇمىتى، سەنىمى. سول سەبەپتەن ارمانىمىز ايقىن بولسا، ماقساتىمىز مىقتى، جوسپارىمىز جالىندى بولماق. جاستار جىلىندا ءاربىر قايراتتى جاس بار كۇش-جىگەرىن سالىپ ايانباي جۇمىس جاساسا، بوستاندىعىمىز ءۇشىن كۇرەسكەن اتا-بابامىزدىڭ بىزگە ارتقان ۇلكەن سەنىمى مەن ءۇمىتى، اتا-انامىزدىڭ ەڭبەگى اقتالادى دەپ ويلايمىن. ال اتا-انا، وتباسىڭ، تۋعان مەكەنىڭ- بارلىعى ۇلكەن وتانىڭ-قازاقستان.
ماعجان جۇمابايەۆ:«...مەن سەنەمىن جاستارعا، الاش اتىن اسپانعا
شىعارار ولار ءبىر تاڭدا،- دەپ نىق سەنىممەن جىرلاسا، اقىننىڭ يدەيالاس زامانداسى ءمىرجاقىپ دۋلات ۇلى:
«...حالىققا،جاستار، باسشى بول!
قاراڭعىدا جەتەكتەپ.
تەرەڭ سۋدان وتەر مە،
مىن قويدى سەركە باستاماي؟»-دەپ، حالىقتى جارىققا باستايتىن جاستار ەكەنىن اشىپ ايتادى.
ەلىمىزدە مەملەكەت تاراپىنان جاستارعا جان-جاقتى قولداۋ كورسەتىلىپ كەلەدى. مىسالى، جاس مامانداردى اۋىلعا تارتۋ ماقساتىنداعى «ديپلوممەن اۋىلعا»، ەكونوميكالىق جانە جۇمىسپەن قامتۋ باعىتىنداعى «بيزنەستىڭ جول كارتاسى»، «جۇمىسپەن قامتۋ-2020»، ءبىلىم بەرۋ سالاسىنداعى قوسىمشا گرانتتار جانە شەتەلدە ءبىلىم الۋعا مۇمكىندىك بەرەتىن «بولاشاق» حالىقارالىق ستيپەندياسى، «جاس وتباسى»، «7-20-25» باعدارلاماسى اياسىندا باسپانالى بولۋدىڭ مۇمكىندىكتەرى، جوعارى ءبىلىم الۋدىڭ قولجەتىمدىلىگى مەن ساپاسىن ارتتىرۋ، ستۋدەنت جاستاردىڭ جاتاقحاناداعى جاعدايىن جاقسارتۋ باعىتىنداعى باعدارلامالاردىڭ بارلىعى ەلىمىزدىڭ تۇكپىر-تۇكپىرىندە جۇزەگە اسىرىلىپ جاتىر. بۇنىڭ تۇپكى نەگىزىندە جاستار قۋاتتانسىن، قايراتتانسىن، سەرپىلسىن، نىق قادام باسسىن دەگەن وي تۇر. مەملەكەتىمىز بارلىق جاعىنان مىقتى جاستان مىقتى ناتيجە كۇتەدى. ولاي بولسا، «جاستىعىمنىڭ جالىنى، جۇرەگىمنىڭ ىستىعى- تۋعان قازاقستانىما!» دەيتىن مەزگىل كەلدى.
پرەزيدەنتىمىز قاسىم-جومارت توقايەۆ: «قازاقستان جاستارى ءبىلىمدى، جان-جاقتى دامىعان ءارى دارىندى.ءبىزدىڭ ەلىمىزدىڭ بولاشاعى سولاردىڭ قولىندا. مەملەكەت باسشىسى اشقان جاستار جىلى جاس ۇرپاقتىڭ وزەكتى ماسەلەلەرىن شەشۋگە كۇشتى سەرپىن بەرەدى، ولاردىڭ ءوزىن ءوزى تانىتۋعا مۇمكىندىك تۋعىزادى. قازاقستاننىڭ وزىق ويلى جاستارى عىلىمدا، IT تەحنولوگياسىندا، مادەنيەت، بيزنەس پەن سپورتتا تاماشا ناتيجەلەرگە قول جەتكىزدى. قابىلەتتى، جىگەرلى جاستارعا ءتيىستى جاعداي جاساپ، ىنتا-ىقىلاسىن ارتتىرۋ كەرەك» دەگەن بولاتىن. مەن بۇل جولدا الەمگە قازاق اۋەنىن قالىقتاتقان ديماش قۇدايبەرگەندى، قازاقستاننىڭ تابيعاتىن ناسيحاتتاۋشى دانەليا تۋلەشوۆانى ۇلگى ەتەمىن. بۇل تىزىمگە قوسىلاتىن اعا-اپالارىمدى كوپ دەپ بىلەمىن.
«جاسىندا تىرىسقان - قارتايعاندا قۋانادى» دەگەن عۇلاما ماحمۇت قاشقاريدىڭ ءسوزى بار. مەملەكەتىمىز قولداپ، جول كورسەتىپ تۇرعاندا العا ۇمتىلساق، بەرىلگەن مۇمكىندىكتەردى پايدالانساق، بولاشاقتا جەتىستىكتەرىمىزگە قۋاناتىن بولامىز دەپ ۇمىتتەنەمىن. قوعامىمىزدا دۇرىس ەمەس جاعدايلار دا بار، ول راس. ءبىراق مەن سولاردىڭ ىشىنەن تەك جاقسىلىقتى، ادەمىلىكتى كورگىم كەلەدى. مەكتەپ بىتىرۋىمە، شامالى عانا ۋاقىت قالدى. سوسىن ارمان جولىما اتتانامىن. سول جولدا جالىنداي لاۋلاپ، تەڭىزدەي تاسىپ، بويىمداعى بار بىلىمىمە ءبىلىم قوسىپ، قۇش-جىگەرىمدى ماقساتتارىما جەتۋ جولىندا جۇمساعىم كەلەدى. بيىلعى جىل-سونداي مۇمكىندىكتەر جىلى. مەن-وز اتا-انامدى، ۇستازدارىمدى، ەلىمدى قۋانتۋ جولىن تاڭدايمىن. مەن ءۇشىن، مەنىڭ قۇربىلارىم ءۇشىن اسۋلارعا قول سوزىپ، بيىكتەردەن كورىنەتىن جىل. جاستار جىلى- ءۇمىت، قۋانىش، سەرپىن، جارقىن ىستەر جىلى دەپ تۇسىنەمىن.
You Might Also Like
-
جالەل اۋىلىنا جالعاس وتىراتىن ءبىر بايدىڭ جىلقىسىنان ەكى اتتى ۇستاپ الىپ، ءبىرىن ءمىنىپ، ءبىرىن جەتەلەپ، قۇرمانعازى اۋەستى الىپ كەتكەن سولداتتاردى قۋادى. كورگەن كىسىلەردىڭ ايتۋىنشا قۇرمانعازى توتەلەيدى...
-
رايىمبەك باتىر بالا كەزىنەن اڭ اۋلاۋعا، سايات قۇرۋعا اۋەس بولىپ وسكەن كىسى ەكەن. كۇزدە جانە قىس كۇندەرى اۋىق-اۋىق ىلە وزەنىنىڭ بويىنداعى توعايدى ارالاپ، اڭ مەن قۇس اۋلايدى. سونداي سايات قۇرىپ جۇرگەن ...
