InfoHub Logo

Uber اۋە تاكسيلەرى تۋرالى يدەيا ءالى دە بار جانە جەتىلدىرىلۋ ۇستىندە. بۇل باعىتتىڭ باسشىسى دجاستين ەرليح وسى ءىستىڭ ەگجەي-تەگجەيىمەن ءبولىستى. سونىمەن، العاشقى كەزدەرى تاكسيمەن 100 كم-دەن ارتىق ۇشۋعا بولمايدى جانە ول جولاۋشىلاردىڭ ۇيىنە ۇشىپ كەلە المايدى، جولاۋشىلاردى جاقىن جەردەگى ارنايى قونۋ پۋنكتىنەن الىپ كەتەدى.

اۋە تاكسيىنىڭ يدەياسى وزگەرىسسىز قالدى. ەشقانداي كەپتەلىسسىز جانە ۋاقىتتى بوسقا سارپ ەتپەي-اق جولاۋشىلار قاجەتتى جەرگە جەتە الادى. الايدا بۇل يدەيانى ەكى فورماتتا پايدالانۋ جوسپارلانۋدا: قالا ىشىندە جانە قالاارالىق قاتىناس ءۇشىن. ەرليح كەپتەلىستەردىڭ كەسىرىنەن اەروپورتقا جەتۋ وتە قيىنعا تۇسەتىن لوس-اندجەلەستى مىسالعا كەلتىرەدى. UberAir بۇل جۇمىستى جەڭىلدەتەدى — بۇل ءبىرىنشى فورمات. ەكىنشى فورمات — لوس-اندجەلەستەن سان-حوسەنىڭ ورتالىعىنا ساياحات. بۇل جەردەگى باستى ماسەلە كەپتەلىس ەمەس، ەندى ارا قاشىقتىق بولادى. ال UberAir بۇل قاشىقتىقتى جىلدام وتۋگە كومەكتەسەدى.

ءداستۇرلى Uber-دەن ايىرماشىلىعى، Air نۇسقاسى تولىق ماعىنادا بىرلەسە تۇتىنۋ ەكونوميكاسى فورماتىندا جۇمىس ىستەيتىن بولادى. بۇل دەگەنىمىز جولاۋشى اەروپورتقا جالعىز ەمەس، باعىتتاس جولاۋشىلارمەن قوسىلىپ ۇشادى. جاپپاي تۇرعىنداردىڭ تۇتىنۋىنا قولجەتىمدى بولۋى ءۇشىن وسىلاي جاسالىپ وتىر. Uber-دەگىلەردىڭ ايتۋىنشا، ءمىنسىز جاعدايدا تۇتىنۋشى ۇشاتىن كولىككە اۋىسقان كەزدە باعانىڭ وزگەرگەنىن سەزىنبەۋى قاجەت.

ۇشاتىن تاكسيلەردىڭ تۇرلەرىنە كەلەتىن بولساق، بۇل ۇشاق پەن تىكۇشاقتىڭ گيبريدى بولادى. ەرليح بۇل كولىكتىڭ ۇشاتىن اۆتوكولىك دەپ اتالۋى دۇرىس دەپ سانامايتىنىن ايتادى، ويتكەنى بۇل تەرمين ادامداردى شاتاستىرۋى مۇمكىن. ويتكەنى بۇل اپپاراتتار ورتاق قولدانىستاعى جولدارمەن قوزعالا المايدى، ولارعا قونۋ جانە ۇشۋ الاڭدارى قاجەت. ول وزدەرىنىڭ كولىكتەرىنە باسقا اتاۋ ويلاپ تابۋدى ۇسىندى. بۇل كادىمگى جولداردا تۇرىپ-اق ۇشاتىن اۆتوكولىكتەردىڭ ۋاقىتى ءالى الىس ەكەندىگىنە دە بايلانىستى. ال Uber جاساپ جاتقان اپپاراتتار جاقىن جىلدارى شىعىپ قالادى.

الداعى ون جىلدىقتا ۇشاتىن تاكسيلەر قالالاردىڭ اۋە كەڭىستىگىن تولتىرادى دەپ كۇتىلۋدە. سونىمەن قاتار Uber - دەگىلەر، تاكسيلەر جىلجىمايتىن مۇلىك نارىعىنا دا وزگەرىستەر ەنگىزەدى دەپ سانايدى. سەبەبى عيماراتتاردىڭ توبەسى جىلجىمايتىن مۇلىك نارىعىندا ماڭىزدى تاۋار بولا الادى. جاڭا جوبالار توبەلەرىندە تاكسيلەرگە ارنالعان ۇلكەن تۇراقتارى بار بولىپ جاسالاتىن بولادى. كومپانيالار ولاردى ۇشۋ جانە قونۋ الاڭدارى رەتىندە پايدالانۋعا بەرە الادى. ​

دۇنيە جۇزىندە ۇشاتىن تاكسيلەردىڭ ءپروتوتيپى مەن تەستتىك ۇلگىلەرى پايدا بولۋدا. نەمىستىڭ Volocopter كومپانياسىنىڭ ءوندىرىسى جۋىردا CES جارمەڭكەسىندە VC200 جولاۋشىلار درونىنىڭ تەستتىك ۇشىرىلىمىن جۇزەگە اسىردى. Airspace Experience Technologies (AirSpaceX) كومپانياسى دەترويتتاعى اۆتوسالوندا كولدەنەڭىنەن ۇشاتىن جانە قوناتىن بولاشاق اۆتونومدى اۋە تاكسيىنىڭ كىشىرەيتىلگەن كوشىرمەسىن تانىستىردى جانە 2026 جىلى اقش-تا 2500 Mobi-One پيلوتسىز ۇشاتىن تاكسيلەرى بولادى دەپ ۋادە بەرەدى. ال Airbus شىعارعان ۇشاتىن تاكسيلەر جازدىق سىناقتان وتكىزىلدى.

---