دامۋىمىزدىڭ كەيبىر سيپاتتارى
ۇلى وكتيابر ريەۆوليۋسياسى مەن ازامات سوعىسىنىڭ وت جالىنىندا تۋعان قازاقتىڭ سوۆەتتىك جاس ادەبيەتى، پارتيامىز بەن ۇكىمەتىمىزدىڭ تالماي قامقورلىق كورسەتۋىنىڭ ارقاسىندا قىسقا مەرزىم — عاسىردىڭ ۇشتەن ءبىر بولىگىندەي ۋاقىت ىشىندە ادام تانىماستاي ءوسىپ نىعايدى. ءوزىنىڭ سوسياليستىك رەاليزم جولىمەن قارىشتاپ ىلگەرى باسۋىندا ورىستىڭ كلاسسيكالىق ادەبيەتى مەن وسى كۇنگى سوۆەت ادەبيەتىنىڭ الدىڭعى قاتارلى تاجىريبەسىنە سۇيسىنە وتىرىپ، قازاق ادەبيەتى كوركەم ادەبيەتتىڭ بارلىق جانرلارىندا سوسياليست رەاليزم ءادىسىن بارعان سايىن كەڭ جانە تەرەڭ مەڭگەرىپ كەلەدى.
جۇرتتىڭ بارىنە بەلگىلى، ريەۆوليۋسياعا دەيىن قازاق ادەبيەتى نەگىزىنەن پوەزيا تۇرىندە بولىپ كەلەدى. ىبىراي التىنسارين، سپانديار كوبەيەۆ جانە باسقالاردىڭ پروزالىق شىعارمالارى بۇل جانرداعى العاشقى تاجىريبەلەر بولدى.
دراماتۋرگيا مۇلدە بولعان جوق، ويتكەنى، ريەۆوليۋسياعا دەيىن قازاقستاندا ۇلتتىق تەاتردىڭ ءوزى بولمادى.
ءقازىر قازاقتىڭ سوۆەتتىك ادەبيەتىندە كوركەم جانرلاردىڭ بارلىعى بار جانە ولار ءار ءتۇرلى دارەجەدە نىعايىپ، جەتىلىپ كەلەدى.
پروزا جانرى ويداعىداي دامۋدا، ونىڭ تاڭداۋلى شىعارمالارى ورىس تىلىنە جانە دۇنيە ءجۇزىنىڭ كوپتەگەن ەلدەرىنە اۋدارىلدى. بۇدان كەيىن دراماتۋرگيا مەن پوەزيانى ايتۋعا بولادى. وسى تابىستاردىڭ ارقاسىندا قازاقتىڭ، سوۆەتتىك ادەبيەتى بۇكىلوداقتىق جانە دۇنيە جۇزىلىك ارەناعا شىعىپ، ءپىسىپ جەتىلگەن جانە كۇشتى تالاپ قوياتىن وقۋشىلاردىڭ سىنىنا ءتۇسىپ وتىر. قازاق ادەبيەتى كلاسسيكالىق جانە وسى كۇنگى ورىس ادەبيەتىنىڭ اۋدارما شىعارمالارىمەن بايۋدا. سول سياقتى پروگرەسسيۆتىك ادەبيەتتىڭ تاڭداۋلى ۇلگىلەرى دە قازاق وقۋشىلارىنىڭ كەڭ توبىنىڭ ۇلەسىنە ءتيدى.
ءسويتىپ، قازىرگى كەزدە قازاق ادەبيەتىنىڭ تۆورچەستۆولىق كادرلارى دۇنيە جۇزىندەگى ەڭ جەمىستى كوپ ۇلتتىق سوۆەتتىك ادەبيەتتىڭ ءىرى جانە ۇنەمى ءوسىپ كەلە جاتقان وتريادتارىنىڭ ءبىرى بولىپ وتىر.
اناعۇرلىم ءىرى شىعارمالار كوركەم ءسوز سۋرەتشىسىنىڭ شىندىقتى كورە ءبىلۋى مەن الەۋمەتتىك جانە يدەيالىق پوزيسيالارىنىڭ ايقىندىعىنان تۋادى.
قازاق حالقى باقىتتى ءومىردى عاسىرلار بويى اڭساپ كۇتتى، ونىڭ تاريحى بوستاندىق جولىنداعى، تاماشا بولاشاق جولىنداعى ورىس حالقىمەن جانە وتانىمىزدىڭ باسقا دا تۋىسقان حالىقتارىمەن ماڭگى دوستىق جولىنداعى كۇرەستىڭ تاريحى. ۇستىمىزدەگى جىلى قايتىس بولعانىنا ەلۋ جىل تولعان كۇنى كەڭىنەن اتالىپ وتەيىن دەپ وتىرعان قازاق ادەبيەتىنىڭ كلاسسيگى اباي قۇنانبايەۆ وسى دوستىقتىڭ جالىندى كۇرەسكەرى، جارشىسى بولدى. مەملەكەتتىك سىيلىقتىڭ لاۋرەاتى مۇحتار اۋەزوۆتىڭ ۇلى اقىنعا ارنالعان كولەمدى شىعارماسى جۇرتشىلىققا كەڭىنەن بەلگىلى. ول ءوزىنىڭ «اباي» جانە «اباي جولى» كىتاپتارىندا قازاق حالقىنىڭ وتكەن عاسىرداعى جارتى عاسىرلىق ءومىرىن، ونىڭ الەۋمەتتىك تاريحي تاعدىرىن ادال جانە زور شەبەرلىكپەن سۋرەتتەدى: اباي جونىندەگى روماندار ءبىزدىڭ بۇگىنگى پروزامىزدىڭ ەڭ جوعارعى تابىسى بولىپ سانالادى، ءبىزدىڭ پروزامىز وسىدان از-اق بۇرىن عانا تۋدى، ورىس ادەبيەتىنىڭ ۇلگىسى، جەمىستى اسەرى بويىنشا دامىپ، سەنىممەن ىلگەرى باستى.
قازاقستاننىڭ جيىرماسىنشى عاسىردىڭ باس كەزىندەگى ومىرىنە قازاقتىڭ وتىزىنشى جىلدارداعى العاشقى روماندارىنىڭ ءبىرى ءسابيت مۇقانوۆتىڭ «بوتاگوز» رومانى ارنالىپ جازىلدى. بۇل روماندا ءبىزدىڭ حالقىمىزدىڭ العا، جارىققا، باقىت پەن بوستاندىققا ۇزدىكسىز ۇمتىلۋى، ونىڭ قاناۋشىلارعا قارسى كۇرەسى، ونىڭ ريەۆوليۋسيا جولىنا ءتۇسۋى، قازاقستاندا سوۆەت وكىمەتىنىڭ ورناۋى كورسەتىلگەن، قازاق حالقىنىڭ 1916 جىلعى قارۋلى كوتەرىلىسى، ونداعى باتىرلارىنىڭ وبرازى جانە قازاقتان شىققان ريەۆوليۋسيونەر بولشيەۆيكتىڭ وبرازى سۋرەتتەلگەن. بۇل جازۋشىنىڭ جاعىمدى كەيىپكەرلەردى كورسەتۋدەگى ۇلكەن ەڭبەگى بولىپ تابىلادى.
مىنانى ەرەكشە اتاپ ءوتۋ كەرەك. قازاق ادەبيەتىنىڭ بارلىق جانرداعى تاڭداۋلى شىعارمالارى سوۆەتتىك شىندىقتى، ءوزىمىزدىڭ زامانىمىزدىڭ ادامدارىن كورسەتۋگە ارنالعان. ولار سوۆەتتىك قوعامنىڭ قۋاتتى قايتا قۇرۋشى كۇشىن، زامانىمىزدىڭ ارى مەن نامىسى، داڭقى مەن اقىل-ويى بولىپ وتىرعان كوممۋنيستىك پارتيانى جىرلايدى. بۇل شىعارمالاردا تاريحي وقيعالار، حالقىمىزدىڭ ومىرىندەگى وراسان زور وزگەرىستەر: ازامات سوعىسى مەن حالىق شارۋاشىلىعىن قايتادان قالپىنا كەلتىرۋ ءداۋىرى، سوعىس الدىنداعى بەسجىلدىقتار جانە ۇلى وتان سوعىسى بەينەلەنگەن.
قازىرگى كەزدىڭ تاقىرىبى قازاقتىڭ سوۆەتتىك ادەبيەتىنىڭ العاش دۇنيەگە كەلگەن كەزىنەن باستاپ نەگىزگى جانە باستى تاقىرىبى بولدى.
حالىق پوەزياسىنىڭ اسقان الىبى جامبىل جابايەۆتىڭ جالىندى ساياسي ليريكالارىندا، جيىرماسىنشى، وتىزىنشى جىلداردا جازىلعان ءسابيت مۇقانوۆتىڭ، اسقار توقماعامبەتوۆتىڭ، ءابدىلدا تاجىبايەۆتىڭ، تايىر جاروكوۆتىڭ، پوەمالارىندا، مۇحتار اۋەزوۆتىڭ، عابيت مۇسرەپوۆتىڭ، ءالجاپپار ابىشيەۆتىڭ، مارقۇم ساتتار ەرۋبايەۆتىڭ جانە باسقا دا جازۋشىلاردىڭ شىعارمالارىندا ادامنىڭ ازات ەتىلۋى قۋانىشى، ونىڭ جاڭا ءومىردى قۇرۋ شاتتىق سەزىمى بەينەلەنىپ قانا قويماي، سونىمەن بىرگە سول كەزدەگى جاعىمدى كەيىپكەرلەردىڭ حالىق ىسىنە شەكسىز بەرىلگەن، بارلىق جاعىنان قايراتتى، قاجىرلى ريەۆوليۋسيونەردىڭ، ماقساتى ايقىن، مىنەزى ۇستامدى، ەلىمىزدى سوسياليستىك تۇرعىدا قايتا قۇرۋ جولىندا كۇرەسۋشى ادامداردىڭ وبرازدارى سۋرەتتەلدى.
مەن مىسالعا ساتتار ەرۋبايەۆتىڭ وتىزىنشى جىلداردىڭ اياعىندا قاراعاندى شاحتەرلەرىنىڭ ومىرىنەن الىپ جازعان «مەنىڭ قۇرداستارىم» اتتى تالانتتى رومانىن كەلتىرەيىن. بۇل روماننىڭ باستى كەيىپكەرى جاس ينجەنەر راحمەتتىڭ مىنەز-قۇلقىنان تەك ءبىزدىڭ ادامدارىمىزعا عانا ءتان كوپتەگەن جاڭالىقتاردى كورەسىز. ول دۇنيەنى گوركييشە تانىپ ۇعىنادى. ول «ادام دەگەن ارداقتى ات» دەپ سانايدى. بۇل كەيىپكەردىڭ كۇشى ونىڭ كوللەكتيۆشىلدىگى مەن وتاندى شەكسىز سۇيۋىندە، ونىڭ ساياسي جانە ەڭبەك بەلسەندىلىگىندە، الدىنا قويعان ماقساتقا جەتۋىنە ۇمتىلىپ، سوسياليستىك ەڭبەكتىڭ ەكونوميكالىق قايتا قۇرىلىس قۇرالى ەكەنىن ءتۇسىنىپ قانا قويماي، سونىمەن بىرگە، ونىڭ بۇقارانىڭ تۆورچەستۆولىق كۇشىن وياتۋدىڭ، ادامنىڭ مىنەزىن قايتادان وزگەرتۋدىڭ ءتاسىلى ەكەنىن تۇسىنە بىلۋىندە. سوۆەت وكىمەتى جىلدارىندا قازاق رەسپۋبليكاسىنىڭ ومىرىندە بولعان وراسان زور وزگەرىستەر اۆتوردىڭ دا جانە ونىڭ سۇيىكتى كەيىپكەرلەرىنىڭ دە ۇلى ماقتانىشى بولىپ سانالادى. ولاردىڭ قاناۋ بۇعاۋىنان ازات بولعان جەرىندە مۇلدە جاڭا بەينەلى ادامدار، لەنينشىل كومسومولەستەر — راحمەت جانە ونىڭ، سۇيگەن قىزى ليزا، ونىڭ دوستارى سەيتەن، ىقلاس، مىرزاش جانە باسقالار سياقتى ادامدار، دارىندى، جالىندى، جىگەرلى، رۋحى باي، جۇرەكتەرى ىستىق، نەلەر كەرەمەتتەردى تۋدىرۋعا قابىلەتتى ادامدار ەڭبەك ەتەدى. بۇل ادامدار ءبىزدىڭ پارتيامىز تاربيەلەپ شىعارعان جاس ۇرپاقتار، شوقتىق پەن شويىننىڭ، نەسىپباي مەن ناعيمانىڭ، ياعني اۋەزوۆ، مۇقانوۆ، مۇسرەپوۆ جانە باسقا جازۋشىلاردىڭ ەرتەرەكتە جازعان شىعارمالارىنداعى جاعىمدى كەيىپكەرلەردىڭ ۇلدارى مەن قىزدارى. ءالجاپپار ابىشيەۆ، قاسىم امانجولوۆ، ديحان ءابىلوۆ، جۇماعالي ساين، شاحمەت قۇسايىنوۆتىڭ ءبىزدىڭ سوۆەتتىك شىندىقتىڭ الۋان ءتۇرلى تاقىرىپتارىنا جازعان اڭگىمەلەرى مەن پوۆەستەرىندە جانە پوەمالارىنداعى كەيىپكەرلەردىڭ دە مورالدىق ساپالارى وسىنداي جاڭا.
مىنە قازاقتىڭ الدىڭعى قاتارلى سوۆەتتىك ادەبيەتىندە جاڭا كەيىپكەرلەر وسىلاي بىرتە-بىرتە پايدا بولدى.
ءبىزدىڭ قازاق ادەبيەتىنىڭ ءوسۋ جولدارى بۇكىل سوۆەت ادەبيەتىنىڭ دامۋ كەزەڭدەرىمەن تىعىز بايلانىستى.
سوۆەت حالقىنىڭ فاشيستىك باسقىنشىلارعا قارسى جۇرگىزگەن ۇلى وتان سوعىسى سوۆەتتىك قوعامنىڭ، ونىڭ ادەبيەتىنىڭ دامۋىنداعى جاڭا كەزەڭ بولدى. بۇل جىلدارى قازاق جازۋشىلارى سوۆەتتىك ءپاتريوتيزمنىڭ كۇشتى يدەيالارىنا تولى، ادامدارىمىزدى جاۋعا وشپەندىلىك رۋحىندا تاربيەلەيتىن، سوۆەت حالقىنىڭ مورالدىق-ساياسي بىرلىگىن تەرەڭدەي اشاتىن ءبىرقاتار جاڭا شىعارمالار جازدى.
بۇل جىلدارداعى شىعارمالاردىڭ باستى يدەيالىق جانە تاقىرىپتىق مازمۇنى مايدانداعى جانە ەڭبەك مايدانىنداعى سوۆەت ادامدارىنىڭ اسقان ەرلىكتەرىن كورسەتۋگە، ولاردىڭ سوسياليستىك وتانعا، كوممۋنيستىك پارتياعا شەكسىز بەرىلگەندىگىن، جەڭىسكە دەگەن مىزعىماس ەركىن كورسەتۋگە ارنالدى. عابيت مۇسرەپوۆتىڭ «قازاق سولداتى»، ءابدىجاميل نۇرپەيسوۆتىڭ «كۋرليانديا» روماندارىڭ ءالجاپپار ابىشيەۆتىڭ «دوستىق پەن ماحاببات» پەساسىن، قاسىم امانجولوۆتىڭ «ابدوللا» پوەماسىن جانە سوعىس جىلدارىنداعى باسقا دا تاڭداۋلى شىعارمالاردى ەسكە تۇسىرۋگە بولادى.
پارتيامىزدىڭ ورتالىق كوميتەتىنىڭ يدەولوگيالىق ماسەلەلەر جونىندەگى تاريحي قاۋلىسى سوۆەت ادەبيەتىنىڭ سوعىستان كەيىنگى داۋىردە ونان ءارى قارىشتاپ دامۋىنىڭ پروگرامماسى بولدى، ادەبيەتىمىزدى تۆورچەستۆولىق جاعىنان قاۋىرت كوتەرۋگە كومەكتەستى.
ءبىزدىڭ قوعامىمىزدىڭ ومىرلىك نەگىزى بولىپ سانالاتىن كوممۋنيستىك پارتيا مەن سوۆەت ۇكىمەتىنىڭ ساياساتىن باسشىلىققا الا وتىرىپ، كوپ ۇلتتى سوۆەتتىك ادەبيەتتىڭ ءبىر بۋىندى بولىگى رەتىندە ءبىزدىڭ قازاق ادەبيەتى دە سوڭعى جىلدارى ەلەۋلى تابىسقا يە بولدى.
ءسابيت مۇقانوۆتىڭ «سىرداريا» رومانى، مۇقان يمانجانوۆتىڭ «العاشقى ايلار» پوۆەسى سياقتى ءىرى شىعارمالار، جاس جازۋشى سافۋان شايمەردەنوۆتىڭ «بولاشاققا جول» اتتى رومانى، حاميت ەرعالييەۆ پەن تايىر جاروكوۆتىڭ پوەمالارى، جۇماعالي سايننىڭ جانە باسقالاردىڭ ولەڭدەرى جازىلدى. بۇل شىعارمالاردىڭ ءبارى دە ومىرلىك ماڭىزدى ماسەلەلەرگە، تابيعاتتى قايتا قۇرۋعا، كوممۋنيزم قۇرىلىستارىنا، حالىقتاردىڭ بەيبىتشىلىك جانە دەموكراتيا جولىنداعى كۇرەسىنە، سوعىس ءورتىن تۇتاندىرۋشىلاردى اشكەرەلەۋگە ارنالعان. بۇل جەردە حاميت ەرعالييەۆتىڭ «ءبىزدىڭ اۋىلدىڭ قىزى» اتتى پوەماسىن اقىننىڭ تۆورچەستۆولىق ەلەۋلى تابىسى دەۋگە بولادى.
رەسپۋبليكامىزدىڭ تەاترلارىنىڭ رەپەرتۋارلارىنا ءا. ابىشيەۆتىڭ «ءبىر سەميا»، ءا. تاجىبايەۆتىڭ «گۇلدەن، دالا»، ش. قۇسايىنوۆتىڭ «كوكتەم جەلى»، م. اقىنجانوۆتىڭ «ىبىراي التىنسارين»، م. يمانجانوۆتىڭ «مەنىڭ ماحابباتىم» پەسالارى جانە باسقالارى ەندى.
سوڭعى جىلدارعا ءتان ءبىر قاسيەت — ءبىزدىڭ ادەبيەتىمىزگە قابىلەتتى تۆورچەستۆولىق جاڭا كادرلار قوسىلدى. جاس جازۋشى ءابدىجاميل نۇرپەيسوۆ، كامەن ورازالين، سافۋان شايمەردەنوۆ، مۇزافار الىمبايەۆ جانە باسقالار وزدەرىنىڭ العاشقى كىتاپتارىنان وقۋشىلاردان ەلەۋلى باعا الىپ وتىر.
مىنە وسىلاردىڭ بارلىعى ءبىزدىڭ ادەبيەتىمىزدىڭ ودان ءارى دامۋى ءۇشىن زور مۇمكىنشىلىكتەردىڭ بارلىعىن كورسەتەدى. الايدا، رەسپۋبليكانىڭ كەيبىر جازۋشىلارىنىڭ تۆورچەستۆولارىنداعى ەلەۋلى كەمشىلىكتەردى كوز جۇمىپ كورمەي ەتۋگە بولمايدى. ولاردىڭ كەيبىرەۋلەرى وسى زاماننىڭ تاقىرىبىنا جازعان شىعارمالارىندا سوۆەت ادامدارىنىڭ ءومىرى مەن تۇرمىسىن ايقىن جانە سەنىمدى ەتىپ كورسەتە المادى، ولاردىڭ وزىندىك ەرەكشە بەلگىلەرى مەن مىنەز-قۇلىقتارىن ءتيىستى دارەجەدە سۋرەتتەگەن جوق، سوسياليستىك ەڭبەكتىڭ بويعا جىگەر قۇيعىش قاسيەتتەرىن تەرەڭدەي اشىپ كورسەتە المادى.
كوپتەگەن جازۋشىلاردىڭ پەسالارىندا سەنىمسىز، ەسكى قايشىلىق، تالاس-تارتىستار كەزدەسەدى. مىسالى بۇل دراماتۋرگتاردىڭ شىعارمالارىندا داندايسىعان كولحوز پرەدسەداتەلدەرىنىڭ جانە ونىمەن كۇرەسكە تۇسەتىن جاس مامانداردىڭ وبرازدارى سۋرەتتەلۋمەن كەلەدى.
جازۋشىلار ءبىزدىڭ حالقىمىزدىڭ كوممۋنيزمنىڭ سالتانات قۇرۋ جولىنداعى كۇرەسىنىڭ الدىڭعى ساپىندا بولۋعا ءتيىستى، ولار وزدەرىنىڭ كىتاپتارىندا زامانىمىزدىڭ ەڭ ماڭىزدى ومىرلىك ماسەلەلەرىن كوتەرىپ، ونى ايقىن، ماركستىك-لەنيندىك دۇنيە تانۋ تۇرعىسىنان شەشۋلەرى ءتيىس. بۇل ءۇشىن ءومىردى بايىپتى، مۇقيات زەرتتەپ، وزدەرىنىڭ شەبەرلىكتەرىن تالماي ارتتىرىپ، وزدەرىنىڭ يدەيالىق-تەوريالىق دارەجەلەرىن ۇنەمى جوعارلاتا بەرۋگە ءتيىس.
ۇستىمىزدەگى جىلدىڭ اپرەلىندە قازاقستان جازۋشىلارى وداعىنىڭ جەتىنشى پلەنۋمى بولىپ ءوتتى، بۇل پلەنۋمدا رەسپۋبليكامىزداعى كوركەم ادەبيەتتىڭ جانە ادەبيەت سىنىنىڭ جاعدايى تالقىلاندى. وسىندا ادەبيەتتىڭ دامۋ ماسەلەلەرى جانە جازۋشىلاردىڭ كوركەم ءسوز شەبەرلىگى ماسەلەلەرىنە بايلانىستى پروبلەمالار جونىندە تۆورچەستۆولىق ايتىستاردىڭ سيرەك بولاتىندىعى اتاپ كورسەتىلدى.
بۇعان ەڭ الدىمەن قازاقستان جازۋشىلار وداعىنىڭ باسقارماسى كىنالى. جازۋشىلار وداعى تاراپىنان كەيبىر ارتتا قالىپ كەلە جاتقان جانرلاردىڭ دامۋىنا كوڭىل از ءبولىندى. مىسالى، قازاق ادەبيەتىندە وسى كەزگە دەيىن بالالار ادەبيەتى ناشار دامىپ كەلە جاتقان سالا بولىپ ەسەپتەلەدى. ەگەر وسى كەزگە دەيىن رەسپۋبليكامىزدىڭ كەيبىر جازۋشىلارىنىڭ تۆورچەستۆولىق توقىراۋ جاعدايىندا كەلە جاتقانىن ەسكەرەتىن بولساق، وندا، قازاقستان سوۆەت جازۋشىلارى وداعىنىڭ پرەزيديۋمى مەن ونىڭ تۆورچەستۆولىق سەكسيالارىنىڭ ءاربىر جازۋشىنىڭ جۇمىسىنا جەتكىلىكسىز قولعابىس تيگىزگەنىن ايقىن كورەمىز.
ءقازىر قازاقستان سوۆەت جازۋشىلارىنىڭ رەسپۋبليكالىق ءۇشىنشى سەزىنە ازىرلىك كۇندەرى كەزىندە قازاقستان جازۋشىلارى وداعى باسقارماسى ءوزىنىڭ بارلىق كۇشىن جۇمىستاعى كەمشىلىكتەردى جويۋعا، تۆورچەستۆولىق كادرلاردى ۇلى حالقىمىزدىڭ وسكەن تالابىنا ساي ءىرى كوركەم شىعارمالار جاساۋعا جۇمىلدىرۋعا جۇمسايدى.
ءبىزدىڭ جازۋشىلارىمىز بەن سۋرەتشىلەرىمىز وزدەرىنىڭ شىعارمالارىندا قوعامدىق ومىرىمىزدە ورىن الىپ كەلە جاتقان كەمشىلىكتەردى، زياندى، دەرتتى قۇبىلىستاردى بارىنشا قاتتى اشكەرەلەۋگە، جاڭا تيپتەگى ادامداردىڭ جاعىمدى كوركەم وبرازدارىن، ولاردىڭ بۇكىل ادامدىق ارتىقشىلىعىنا ساي ەتىپ اشۋعا جانە سونىمەن ءبىزدىڭ قوعامداعى ادامداردى كاپيتاليزم تۋعىزعان دەرتتى جارالار مەن كەمشىلىكتەردەن تازارعان سيپاتقا، ادەت-داعدىعا تاربيەلەۋگە ءتيىستى.
قازاقستان جازۋشىلارىنىڭ بۇل ارداقتى جانە تاريحي مىندەتتى ورىنداپ شىعاتىنىنا، وزدەرىنىڭ بارلىق كۇشىن تۋىسقان سوۆەتتىك ادەبيەتتى ونان ءارى وركەندەتۋگە، وزدەرىنىڭ ەڭبەكتەرىن ءبىزدىڭ باتىر حالقىمىزدىڭ جالپى تۆورچەستۆولىق قاجىرلى ەڭبەگىمەن ۇشتاستىراتىنىنا ەشقانداي كۇمان جوق.
1954
You Might Also Like
-
ءبىزدىڭ ەلىمىزدە، پرولەتارلىق گۋمانيزم يدەياسى الدە قاشان ۇستەمدىك قۇرعان ىزگىلىك ەلىندە ادامداردىڭ سانا-سەزىمىن اسقاق مەيىرىم، بيىك اقىل-پاراسات بيلەيدى. ءبىزدىڭ سوۆەتتىك قۇرىلىستىڭ تابيعاتى، بولمىسى...
-
كوپ ۇلتتى ادەبيەتىمىزدىڭ سونشاما بايلىعى مەن كەرەمەت قۇدىرەتىن ويلاعاندا، جازۋشىلارىمىز جينالىپ سەزدى وتكىزگەن وداقتار ءۇيىنىڭ كولوننالى زالى ەسكە تۇسەدى. مۇنشالىق كوپ ادام باس قوسقان ۇلى جيىندى ءبى...
