ەكى مىڭ ورىنبوردا
وسى كۇنى ورىنبوردا وقىپ جۇرگەن ەكى مىڭداي قازاق بالالارى بار. بۇلاردىڭ كوبى ەرجەتكەن بالالار ءام بۇلاردىڭ ىشىندە ايەل بالالار دا بار.
بۇلاردىڭ وقىپ جۇرگەن مەكتەپتەرى مىنالار: 1) ايماقتىق قازاق ينستيتۋتى، 2) جۇمىسكەرلەر فاكۋلتەتى، 3) ايماقتىق كەڭەس ءام پارتيا شكولاسى، 4) ايماقتىق تاجىريبە مەكتەبى، 5) جەتكىنشەكتەر مەكتەبى، 6) 1-ايماكتىق قازاق بالالارىنىڭ كوممۋناسى، 7) 2-قازاق بالالارىنىڭ ءۇيى، 8) بالا تاربيەلەۋشى قازاق ايەلدەرىنىڭ كۋرسى، 9) ادام دارىگەرلەرىنىڭ تەحنيكۋمى، 10) ايماقتىق زاڭ كۋرسى، 11) ايماقتىق كووپەراسيا ۇيىمدارىنىڭ كۋرسى، 12) ميليسيا كۋرسى، 13) قازىنا، قاراجات كۋرسى. مىنە، وسى ون ءۇش مەكتەپتە وقىپ جۇرگەن قازاق جاستارىنىڭ سانى ەكى مىڭ.
جانە بۇلاردان باسقا جاقىن ارادا باسپا كۋرسىن جيىرما بەس قازاق ءبىتىرىپ شىعادى.
دۇشپاندار: «كەڭەس ۇكىمەتى قازاق حالقىنا نە بەردى؟..» دەگەندە، الدىمەن كىسىنىڭ ەسىنە ورىنبورداعى وقىپ جۇرگەن وسى ەڭبەكشىل قازاقتىڭ ەكى مىڭ ۇلدارى تۇسەدى.
بۇل قازاقستاننىڭ تاريحىندا، ونەر-بىلىم رەتىندە بۇرىن بولماعان ءىس.
پاتشانىڭ زامانىندا كۇللى قازاقستاندا ەكى مىڭ تۇگىل ەكى ءجۇز بالا وقىعان ۋاقىت بولماعان ەدى. ەندى، مىنە، ەڭبەكشىل حالىقتىڭ ءوز ۇكىمەتىنىڭ زامانىندا، ءبىر قالادا ەكى مىڭ جاس وقىپ ءجۇر. راس، ورىنبور قازاقستاننىڭ ۇكىمەتى تۇرعان ايماقتىق زور قالا بولىپ وتىر. ايماقتىق ۇكىمەت تۇرعان قالاعا ەكى مىڭداي قازاق بالاسى كوپ ەمەس، قايتا از.
ەگەردە ورىنبور قازاقستاننىڭ ورتالىق جەرىندە بولسا، نەمەسە قازاقستاننىڭ ۇكىمەتى قازاق حالقىنىڭ ءبىر كوبىرەك جەرىندە بولسا، وندا قازاقتىڭ وقۋداعى جاستارىنىڭ سانى بۇدان الدەنەشە ەسە كوپ بولار ەدى.
ءبىراق ورىنبوردىڭ قازاق ەلىنەن قاشىقتىعىن ەسكە العاندا ءام قازاقستان ۇكىمەتىنىڭ جاستىعىن، كەدەيلىگىن ەسكە العاندا، بۇل ەكى مىڭ جىگىت — ۇلكەن قاناعات قىلارلىق ءىس.
قازاقستان ۇكىمەتى العاش قۇرىلعان جىلى ءام ەكىنشى جىلى ورىنبوردا وقۋ وقىپ جۇرگەن قازاق بالالارى جوققا ءتان ەدى.
قازاق بالالارى ورىنبورعا وقۋعا كوبىرەك كەلە باستاعانى بىلتىردان بەرى، اسىرەسە بيىل. مەن ورىنبوردان باسقا جەرلەردەگى وقىپ جۇرگەن قازاق بالالارىن ايتىپ وتىرعانىم جوق.
ماسكەۋ، قازان، تاشكەنت، ساراتوۆ قالالارىندا دا وقىپ جۇرگەن قازاق بالالارى بار، ولاردىڭ دا سانى ەداۋىر.
مەنىڭ ايتىپ وتىرعانىم قازىرگى ورىنبوردا كوزگە كورىنىپ جۇرگەن ەكى مىڭ جەتكىنشەك — ەكى مىڭ جىگىت. كەلەشەكتەگى قازاقستاننىڭ بۇگىن بولماسا، ەرتەڭ ءبىتىرىپ شىعاتىن قىزمەتكەرلەرى، ەڭبەكشىل تاپتىڭ ەكى مىڭ وقىعان ازاماتى.
بۇلاردىڭ ءبارى دە بۇرىنعى پاتشا زامانىنداعى وقىپ جۇرگەن بالالارداي ەمەس، ءبارىنىڭ دە ءقازىر الەۋمەتشىلىك سەزىمى ويانعان، ءبارىنىڭ دە ەڭبەكشىل تاپقا قىزمەت قىلماق تالابى زور.
قازاقستاننىڭ جالپى ناداندىعىن، جالپى كەدەيلىگىن ويلاعاندا، قازاقستاندا جوندەپ ءىس جۇرگىزە بىلەتىن ادامداردىڭ ازدىعىن ويلاعاندا، سىمداي قاتار تىزىلگەن، شويىنداي بىلەكتى، وقىعان ەكى مىڭ جاس ازامات ەسكە تۇسەدى.
قىپ-قىزىل جالىنداي جايناعان، قىزىل سيامەن جازعان «ەكى مىڭ» كوز الدىنا كەلىپ ەلەستەيدى.
ورىنبورداعى ەكى مىڭ وقىپ جۇرگەن جاستار، قازاق ەڭبەكشىلەرىنىڭ ىلگەرگى تىرشىلىك مايدانىندا، الەۋمەت، ساياسات تۇرمىسىندا الدىڭعى ازاماتتارى، الدىڭعى قىزمەتكەرلەرى.
ەكى مىڭ جەتكىنشەك!
قازاق ەڭبەكشىلەرىنىڭ زور ءۇمىتى سەندەردە. ءالى كۇنگە ناداندىق مەڭىرەۋىندە قۇر قىبىرلاپ، كۇنەلتىپ جۇرگەن قازاقتىڭ ەڭبەكشىل حالقى سەندەردىڭ مويىندارىڭا جۇك ارتپاق! سول جۇكتى اپارۋعا تەزىرەك دايارلانىڭدار!
09.01.1924 جىل
You Might Also Like
-
10-تامىزدا ورىنبورداعى قازاقستاننىڭ وقۋ ينستيتۋتىندا، ءام تاتار ينستيتۋتىندا وقۋشى جاستار ۇيىمىنىڭ مۇشەلەرىنىڭ جالپى جيىلىسىندا جولداس نۇرماقوۆ قازىرگى جەر جۇزىندەگى مەملەكەت ارالارىنداعى ساياسات جاي...
-
ءبىلىم كەڭەسىنىڭ جاسالعانىنا كوپ بولدى. بىر-ەكى رەت گازەت- جۋرنال بەتىندە ءبىراز ىستەگەن ىستەرى تۋرالى عانا ماعلۇمات رەتىندە سوزدەر باسىلدى.
