قالماق، قالماقتى ەپتەپ الماق...
ابىلاي حان، وتەگەن باتىر ۇلىتاۋدىڭ بوكتەرىندە اڭ اۋلاپ ءجۇرىپ، ءبىر سايعا كەلىپ از-كەم ايالداپ، دەمالۋعا وتىرادى. قاپىسىز وتىرعان حان مەن باتىردىڭ ۇستىنە جاۋدىڭ قالىڭ قولى كەزدەيسوق تاپ بولىپ، ەكەۋىن قالماقتار بايلاپ اكەتەدى. قالماقتىڭ حانى ەكەۋىن زىندانعا سالىپ تاستايدى.
وتەگەن مەن ابىلايدىڭ قولعا تۇسكەنىن ەستىگەن تولە بي باتىرلاردى باستاپ، 30 مىڭ قالماقتىڭ ورداسىن قاماپتى. قالماقتىڭ حانى قالدان سەرەن زارە-قۇتى قالماي قورقىپ: «بي اشۋلانباسىن، سويلەسەيىك، كەلىسەيىك»، — دەپ كىسىسىن جىبەرىپتى.
تولە بي حاننىڭ ورداسىنا كىرىپ بارىپ:
— ەي، قالماقتىڭ حانى، جەرىمدى العانىڭدى كەشىرىپ ەدىم، مالىمدى العانىڭدى كەشىرىپ ەدىم. ەندى باتىرىم مەن حانىمدى العانىڭدى كەشىرمەسپىن! 30 مىڭ قولمەن ءوزىم كەلدىم، 30 مىڭ قولمەن قويكەلدى كەلەدى، 30 مىڭ قولمەن ناۋرىزباي كەلەدى، — دەيدى.
سوندا قالماقتىڭ حانى بۇرىنعىسىنان دا قاتتى ساسىپ:
— بيەكە، ءبىر بىلمەستىك بولدى، كەشىرىڭىز، — دەپ كەشىرىم سۇرايدى. وتەگەن مەن ابىلاي ەكەۋىن ءوزى بارىپ زىنداننان شىعارىپ اكەلگەن ەكەن. وتەگەن مەن ابىلاي ويدا جوق جەردە تولە ءبيدى كورگەندە تاڭ قالىپ:
— قالاي كەلدىڭىز؟ — دەپ سۇرايدى.
سوندا تولە بي:
— ۇندەمەڭدەر، حانىم، باتىرىم! قالماق، قالماقتى ەپتەپ الماق. وسىلاي ەتسەك جابىلا، قالماقتىڭ ءوزى-اق ءبىزدىڭ جەردەن جوعالماق، — دەگەن ەكەن.
ءسويتىپ، تولە ءبيدىڭ «قالماق، قالماقتى ەپتەپ الماق» دەگەن ءسوزى ەلگە تاراپ كەتىپتى.
You Might Also Like
-
ءومىر – تەڭىز، تاعدىر – كەمە، ال كەمەڭ سۋعا باتپاس ءۇشىن ءوزىڭ كاپيتان بولۋىڭ كەرەك.
-
قاعانى – باتىر، اقىلگويى كەمەڭگەر بولعان ەلدىڭ باعى جانادى.
