InfoHub Logo

ءتيىستى ديپلومى باردىڭ ءبارى ءمۇعالىم بولا المايدى. ءبىلىم جانە عىلىم مينيسترلىگى ەنگىزگەن تاۋەلسىز تەستىلەۋ ءادىسى جوو تۇلەكتەرىن ىرىكتەۋ ارقىلى عانا ءبىلىم وشاقتارىنا جىبەرۋگە باعىتتالعان. مينيستر اسحات ايماعامبەتوۆ Facebook پاراقشاسىندا وسى شارانىڭ العاشقى ناتيجەلەرى تۋرالى پىكىر ءبىلدىردى.

ۆەدومستۆو باسشىسىنىڭ ايتۋىنشا، پەداگوگيكالىق باعىتتا ءبىلىم بەرەتىن جوعارى وقۋ ورىندارىنىڭ تۇلەكتەرى ءۇشىن مىندەتتى تەستىلەۋ ەنگىزىلىپ وتىر.

ياعني، ەندى دايىندىعى ناشار ۇمىتكەرلەر قولىندا ديپلومى بولسا دا، ءمۇعالىم بولىپ جۇمىسقا ورنالاسا المايدى.

«بالالارمەن جۇمىس ىستەي ءبىلۋ وتە ماڭىزدى جانە جاۋاپتى مىندەت بولعاندىقتان، الدىمەن تاۋەلسىز تەستىلەۋدەن ءوتۋ كەرەك. مۇنداي سىرتقى ەمتيحاندى 2021 جىلى شامامەن 40 مىڭ تۇلەك تاپسىردى. ولاردىڭ ىشىندە شەكتى بالل جيناعاندار عانا مەكتەپتە جۇمىس ىستەۋگە مۇمكىندىك الدى. ەنگىزىلگەن بۇل جاڭاشىلدىق جوعارى وقۋ ورىندارى جۇمىسىنىڭ ساپاسىن دا كورسەتتى. 36 ۋنيۆەرسيتەت وسى ماماندىق بويىنشا دايىنداۋ بويىنشا ليسەنزياسىنان ايىرىلدى»، - دەپ ەسكە الدى مينيستر.

سونداي-اق، ول بىلتىر پرەزيدەنتتىڭ قولداۋىنىڭ ارقاسىندا جوعارى وقۋ ورىندارىنداعى مۇعالىمدەردىڭ ايلىعى دا كوتەرىلگەنىن ايتادى.

«پەداگوگ مارتەبەسى تۋرالى» زاڭ جوعارى وقۋ ورىندارىنىڭ وقىتۋشىلارىنا قولدانىلماۋىنا بايلانىستى ولاردىڭ جالاقىسى كوتەرىلمەدى. سول سەبەپتى مينيسترلىككە باعىنىشتى جوو-لاردا 2021 جىلدىڭ 1 قىركۇيەگىنەن باستاپ پروفەسسورلىق-وقىتۋشىلىق قۇرامنىڭ جالاقىسىن كوتەرۋ تۋرالى ارنايى بۇيرىق قابىلدادىق. قاتارداعى وقىتۋشىلار ءۇشىن ەڭ تومەنگى جالاقى 200 مىڭ تەڭگەنى، ال پروفەسسورلار ءۇشىن – 350-400 مىڭ تەڭگەنى قۇرايدى. بۇل رەتتە 1 ستاۆكانىڭ ماكسيمالدى كولەمى جىلىنا 680 ساعاتتان اسپاۋى ءتيىس. مۇنداي مۇمكىندىك پرەزيدەنتتىڭ قولداۋىنىڭ ارقاسىندا جانە 2011 جىلدان باستاپ العاش رەت وسىنداي كولەمدە گرانت قۇنىن ارتتىرۋدىڭ ناتيجەسىندە پايدا بولدى»، -دەپ جازدى اسحات ايماعامبەتوۆ.

---