ەرەكشە بالىقتار
وڭتۇستىك شىعىس ازيانىڭ مانگرلى باتپاقتارىنىڭ ماڭىندا ورنالاسقان كولشىكتە التىن تۇستەس تۇنبا شورشىعى، ياعني حريزوسپيلوس بالىعى ءومىر ءسۇرىپتى. بىردە ول اۋا جۇتپاق بولىپ سۋ بەتىنە شىققاندا اعاشتىڭ جاپىراعىندا وتىرعان ۇلۋدى كورەدى. سول كەزدەرى ۇلۋ قابىرشاعى جوق جىلدام جۇرەتىن جاندىك بولعان ەكەن.
— قالايسىڭ، ۇلۋ؟ وسى سەندەر قۇرلىقتا قالاي ءومىر سۇرەسىڭدەر؟
— وڭاي عوي، — دەيدى ۇلۋ سابىرلى قالىپپەن. — تەك اۋا جۇتا بەرسەڭ بولدى ەمەس پە؟!
— سولاي ما؟ ءبىراق بۇل مۇمكىن ەمەس سياقتى عوي.
— ەندەشە ۇيرەتەيىن. الايدا مەنىڭ شارتىم بار.
— قانداي؟
— ماعان قاپ-قاپ التىن بەر. سوندا ۇيرەتەمىن.
— جاقسى، — دەپ بالىق سۋعا سۇڭگىپ كەتەدى.
حريزوسپيلوس سۋدا پەريوفتالمۋسپەن كەزدەسەدى.
— دوستىم، كوڭىلىڭ نەگە جوق؟ — دەپ سۇرايدى پەريوفتالمۋس.
حريزوسپيلوس بولعان وقيعانى بايانداپ بەرەدى.
— بۇل ءبىر جاقسى جاڭالىق ەكەن. بايلىق ءبىر كۇندىك دەگەن. كەل، دوستىم، ەكەۋمىز ەڭبەكتەنىپ جۇمىس ىستەلىك. تاپقان قارجىمىزدى التىنعا ايىرباستاپ جينايىق.
— جاقسى.
وسىلايشا ەكەۋى جۇمىسقا تۇرادى. ولار باي سازاننىڭ ءۇيىن جيناۋ، كۇزەتۋ سەكىلدى قىزمەت اتقارادى. تۇسكەن ايلىقتارىنىڭ كوءبىسىن التىنعا اۋىستىرادى. ارادا ءبىراز جىل وتكەن سوڭ قاپ-قاپ التىن جينالادى.
ءبىر كۇنى پەريوفتالمۋس:
— راقمەت، ۇلى سازان اۋلەتىنىڭ وكىلى. ءسىزدىڭ قول استىڭىزدا ءبىراز جىل تەر توگىپ ەڭبەكتەندىك. ەندى ءبىزدى ەركىمىزگە جىبەرىڭىز، — دەيدى.
— جاقسى، جۇرە بەرىڭدەر. الايدا دۇرىس كيىنبەي، ءجوندى ازىقتانباي التىندى نە سەبەپتەن ساتىپ الا بەردىڭدەر؟ — دەپ سۇرايدى سازان.
حريزوسپيلوس باستان كەشكەنىنىڭ ءبارىن سازانعا ايتىپ بەرەدى.
— مەن بۇل ۇلۋعا سەنبەيمىن. ول — جالقاۋ. ونىڭ قولىنان تۇك تە كەلمەيدى. قاپ-قاپ التىندارىڭدى الىپ سەندەردەن قاشىپ كەتكەلى ءجۇر.
— ولاي ەمەس. ونىڭ سوزىندە تۇراتىنىنا سەنەمىز.
— مەن تەك اقىلىمدى ايتتىم. وكىنىپ، نان تابۋ ءۇشىن ماعان تاعى دا كەلىپ جۇرمەڭدەر. ويتكەنى بۇگىننەن باستاپ باسقا قىزمەتكەرلەردى جۇمىسقا الامىن.
حريزوسپيلوس پەن پەريوفتالمۋس سازانمەن قوشتاسىپ كەتە بارادى. ولار سۋ بەتىنە شىعىپ اعاشتىڭ بۇتاعىندا ەرىگىپ وتىرعان ۇلۋدى كورەدى.
— ۇلۋ، قالايسىڭ؟ تانىدىڭ با مەنى؟
— ارينە. التىندارىڭ قايدا؟
— مىنە.
— بارەكەلدى! ەندەشە مىنا جاعاعا التىندارىڭدى تاستاڭدار. ەرتەڭ كەشتە كەلىڭدەر. قۇرلىقتا قالاي ءومىر ءسۇرۋ كەرەكتىگىن ۇيرەتەمىن.
ەكى بالىق بارلىق التىنداردى جاعاعا شىعارىپ تاستايدى. ەرتەسىنە كەلسە، ۇلۋدى تاپپايدى. جاعادا التىن جوق. قانشا جەردەن شاقىرسا دا، كۇتسە دە ۇلۋ شىقپايدى. كوپ ۇزاماي ءتۇن بولادى. الدانعاندارىن ءبىر-اق بىلگەن بالىقتار اشۋلى كۇيدە ۇيلەرىنە كەتەدى. كەلەسى كۇنى ەكى دوس باس قوسىپ سازانعا كەلەدى.
— اسسالاۋماعالەيكۇم، اعا. ءسىزدىڭ ايتقانىڭىز ءدال بولدى. ءبىز الداندىق. ءسىزدىڭ قاراماعىڭىزدا جۇمىسقا تۇرساق دەيمىز.
— ءقازىر ورىن جوق. سەندەردىڭ تۋىسقاندارىڭدى جۇمىسقا الدىم.
قوس بالىق سازاننىڭ قىزمەتكەرلەرىنىڭ حريزوسپيلوس پەن پەريوفتالمۋس ەكەنىن كورەدى.
ولار كورگەندەرىنىڭ ءبارىن ايتىپ بەرەدى. سازان بولسا:
— ەندەشە، سول ۇلۋدىڭ ارتىنان قۋىپ سازايىن بەرىڭدەر. ول سەندەردىڭ قانشاما جىل بويى ماڭداي تەرمەن تاپقان التىندارىڭدى الىپ كەتتى.
حريزوسپيلوس پەن پەريوفتالمۋس قالاي دەگەندە دە اعاشتا تىعىلىپ جۇرگەن ۇلۋدان ءوش الۋ ءۇشىن كۇندە جاعاعا جاقىن ماڭعا كەلىپتى. ۋاقىت وتە كەلە بۇل بالىقتار جاعادا ءجۇرىپ، اعاشقا ءورمەلەۋدى ءوز بەتتەرىنشە ۇيرەنىپتى. تۋىسقاندارىنا، بىلگەن ادىس-تاسىلدەرىن كورسەتىپتى. ال قاپ-قاپ التىندى وڭاي جولمەن الىپ قاشقان ۇلۋ تۋىسقاندارىنا اسىل تاستارىن ءبولىپ بەرىپتى. كۇندەردىڭ كۇنىندە ۇلۋ حريزوسپيلوس پەن پەريوفتالمۋستىڭ ارتتارىنان ەرگەنىن سەزىپ، التىنداردى ارقاسىنا ۇنەمى تىعىپ ءجۇرۋدى ادەتكە اينالدىرىپتى. بۇل التىن كەيىن قابىرشاققا اينالىپتى. وسىلايشا ۇلۋ قابىرشاعى بار جاندىككە اينالادى. الايدا سونىڭ سالماعىنان ۇلۋ بۇرىنعىداي جىلدام ەمەس، جاي جۇرەتىن بولىپتى. ال التىن تابا الماعان حريزوسپيلوس پەن پەريوفتالمۋس ءالى كۇنگە دەيىن اعاشقا ورمەلەپ، ۇلۋدى مىسىقشا اڭدىپ ءجۇرىپ قورەكتەنەدى ەكەن.
You Might Also Like
-
سەكىرگىش دەگەن لاقاپ اتى بار ليتوريا ناسۋتا تۇقىمىنا جاتاتىن ءبىر باقا وتە ماقتانشاق بولىپتى. ءوزىنىڭ ۇزىن قاشىقتىققا سەكىرەتىندىگىن ۇنەمى ماقتانىش تۇتاتىن ول باسقا باقالارعا قاراعاندا ءىرى بولىپتى. ءى...
-
جاستىق دەگەن قانداي قىزىق! تاڭى تاماشامەن اتىپ، كەشى دۋمانمەن باتاتىن گۇلداۋرەنىڭنىڭ شۋاقتى كۇندەرى باسىڭدا سول كۇيى ورناپ، ماڭگىلىككە قالىپ قويارداي سەزىلەدى ەكەن عوي ول كەزدە... ال، ەندى بولسا، سو...
