InfoHub Logo

قىرىققا كەلگەندە العاشقى ماحابباتى گۇلدەنىپ، شەشەك اتىپ، قاۋىزىنان جارىلىپ شىعىپ، باعى جانباي وتىرعان ءبىر سۇلۋعا قولى ازەر جەتكەن ەسىركەپ دەگەن ءبىر ەسەر ادام بولىپتى. ەسەر دەمەي نە دەۋگە بولادى؟ ۇيىندە وتىرىپ الىپ ويىمەن بايىپ كۇپىنسە، قاۋقيعان بويىنا ماقتانىپ، وسپادارلانىپ ەلگە ءسوز بەرمەي لەپىرسە، ءوزى ىشەگىنە شي جۇگىرمەيتىن ارام جانە دۇنيەقوڭىز ادام بولسا؟!

سول ەسىركەپ كوكەك ايىنىڭ ىشىندە جارمەڭكەگە بارىپ، ساۋدا-ساتتىق جۇمىسىمەن شۇعىندانۋدى ويلاپ، شانا جاساۋعا كىرىسەدى. شانانىڭ ءبىر تابانىن شاۋىپ بولىپ، ناسىباي اتىپ دەم الۋدى ويلاپ، قاسىندا جاتقان بەز قايىڭعا بارىپ وتىرادى. جانىنا زارىعىپ كورگەن بيكەسى دە ەركەلەي باسىپ كەلىپ جايعاسادى.

— وتاعاسى قولىڭ نەتكەن شەبەر ەدى ءوزىڭنىڭ. شانانىڭ تابانىن ۇستىرىكتەگەندەي قىپ ادەمىلەپ شاۋىپسىز عوي، — دەپ ماقتايدى كۇيەۋىن بيكەسى.

— سەنىڭ ەلدىڭ ايەلىنەن كەم قالماي، كورنەكتى ءجۇرۋىڭدى ويلاپ اۋرە بولىپ جاتىرمىن عوي. بيكەم، كوپ كەشىكپەي ەكىنشى تابانىن ءبىتىرىپ، شانانى الشىسىنان تۇرعان قوي اسىعىنداي ەتىپ ادەمىلەپ جاساسام، ءسويتىپ، جارمەڭكەگە اپارىپ ۇرعاشى قۇلىنى بار ءبىر قۇلىندى بيەگە ايىرباستاسام. ول قۇلىندى بيە ءوسىپ، كەلەسى جىلى تورتەۋ بولسا. ەكى-ۇش جىلدا ايعىرلى ءۇيىرلى جىلقى بولىپ شىعار ەدى دە، ەل «مىنا جاتقان قالىڭ مال ەسىركەپ بايدىڭ جىلقىلارى عوي» دەپ ىشتەرى كۇيىپ، كوزدەرىن ءسۇزىپ جۇرەر ەدى، — دەيدى ەسىركەپ كۇپىنىپ، ايەلىنىڭ ماقتاعانىنا ماس بولىپ.

— وندا ول ايعىردى مەن لاشەنكەگە جەكتىرىپ، بۇلاڭ جەلدىرىپ، توركىنىمە بارىپ-كەلىپ تۇرار ەدىم، — دەپتى ەسىنەي ءتۇسىپ بيكەسى.

— اكەڭنىڭ باسى، بارىپ-كەلىپ تۇراسىڭ. كۇللى بيەنى قىسىر قالدىرىپ مالعا يە بولىپ جۇرگەن ايعىردى ساعان جەگىپ بەرىپ قويامىن، ءا! — دەپ ەسىركەپ ايەلىنىڭ ماڭدايعا سىلق ەتكىزىپ ۇرىپ جىبەرىپتى. ايەلى تارامىسىنا ىلىككەن ينەلىكتەي قاتقان ءبىر نازىك ادام بولسا كەرەك، مۇرتتاي ۇشىپ قۇلاپ ءتۇسىپتى دە، جان ءتاسىلىمىن جاساپتى. ايەلىنىڭ سەرەيىپ قالعانىن كورىپ:

— قۋارعان قۋ قۇداي-اۋ، شانانىڭ ءبىر تابانى بىتپەي جاتىپ قىرىق جىل كۇتىپ زارىعىپ ازەر قولىم جەتكەن ايەلىمدى الدىڭ. ەكىنشى تابانى بىتكەندە نە ىستەيسىڭ ماعان، ءوزىمدى الاسىڭ با؟ — دەپ جەر باۋىرلاپ قۇلاي زار ەڭىرەپتى.

قاسىنان وتكەن ادامدار:

— مىنا كىسى نە ىستەپ جاتىر؟ — دەپ سۇراپتى بىرىنەن-بىرى.

— ەسبالاق — ەلىنىڭ ەسەرسوعىنىڭ ءبىرى ەدى. ەسەرلىگى ۇستاپ جاتىر، — دەپ جاۋاپ بەرىپتى بىلەتىندەرى. ەسبaلاقتىڭ ەسەرسوعى دەگەن اڭگىمە وسىدان قالىپتى.

---