InfoHub Logo

تىشقانباي ۇلى تاسىم — اڭگىمەشىل، ەستىگەنىن ۇمىتپايتىن، ءار وقيعانى جۇيە-جۇيەسىمەن، تۇسىنىكتى دە قىزىقتى ەتىپ ايتاتىن ءتىلۋار ادام ەدى. ەرتەرەكتەگى ەلەۋلى وقيعالار جايىنداعى ەستەلىكتەرىنىڭ بىرىندە ول وتەگەن اتتى ءبىر قارتتىڭ قايراتىن، ۇزاق ءومىر سۇرۋدەگى قۇپيا سىرىن ايتىپ بەردى.

— سارىارقانىڭ سارى بەلىندە مەكەندەگەن ەلدەردىڭ بىرىندە ءبىر عاني ادامنىڭ ماليكە اتتى قىزى بولىپتى، — دەپ باستادى اڭگىمەسىن قارت اتام، — ۇلكەن جيىنداردا ات ۇستىندە ايقاساتىن اۋدارىسپاق، كوكپار، سايىس، قىز قۋۋ سياقتى باسەكەلى ويىنداردا ول قىز نەلەر الۋەتتى جىگىتتەرگە جەڭدىرمەپتى. ءوز كۇشىنە ابدەن سەنگەن، جيىرما ءۇش جاستاعى ماليكە:

— كىمدە-كىم مەنى ات ۇستىنەن اۋدارىپ السا، مەيلى ول قانداي ادام بولسا دا، سوعان تيەمىن، — دەپ ەلگە جار سالىپتى.

داڭقتى ارۋدان كۇشىن اسىرىپ، ونى وزىنە باعىندىرۋدى، دەمەك جار ەتۋدى كوزدەگەن قارۋلى جىگىتتەر باسەكەدە ساتسىزدىككە ۇشىراپ، جەڭىلىپ قالا بەردى. وسىنى ەستىگەن، توقسان ءۇش جاستاعى وتەگەن قارت، نەلەر الۋەتتى جىگىتتەردىڭ ءبىر ايەل قايراتىنا توتەپ بەرە الماعانىنا نامىستانىپ، ماليكەمەن باسەكەگە ءوزى ءتۇستى. ايدەمگە دە كەلتىرگەن جوق، قىزدى ات ۇستىنەن جۇلىپ الىپ، بەينە مارقا قوزىداي الدىنا بوكتەرىپ الا جونەلدى. ماليكە ۋادەسىندە تۇردى، عاسىرعا جۋىق جاساعان، وزىنەن جەتپىس جاس ۇلكەن قارتقا قوسىلىپ، سەميالىق ءومىر ءسۇردى.

ءبىر جىلدان كەيىن ول جۇكتى بولدى. ەر بالا دۇنيەگە كەلدى. وسى كەزدە ەل اراسىندا پىش-پىشتاعان وسەك تاراي باستادى. «توقسان بەستەگى شالدان بالا بولۋشى ما ەدى. ماليكە ارۋ ۇيقىسىراپ كەتكەن بولار...» دەستى. بۇل وسەككە ماليكە ءوزى تويتارىس بەردى. وتەكەڭ سونشالىقتى كوپ جاساسا دا، ونىڭ ناپسىلىك قۋاتى كەمىمەگەنىن ىسپاتتادى:

— كەيدە عانا بولماسا، — دەدى ول، — ءتۇندى بوس وتكىزبەدى. ءناپسى تىلەگى مەنىڭ تىلەگىمنەن دە كۇشتى.

سودان كەيىن وسەك تيىلدى، بالا وتەگەن قارتتىڭ ءوز بالاسى دەگەن قورىتىندىعا كەلدى جۇرت. ماليكە زامانداستارىمەن سىرلاسقاندا، وتەكەڭمەن ەڭ العاش كەزدەسكەندە-اق ونىڭ وزىنە ومىرلىك سەرىك بولا الاتىندىعىنا سەنگەندىگىن ايتادى ەكەن:

— ات ۇستىنەن اۋدارىپ الىپ، الدىنا بوكتەرىپ، ەرىنىڭ باسىنا قىسقاندا، قابىرعالارىم تۇگەل سوگىلگەن شىعار دەپ ەدىم، — دەپتى ارۋ. اڭگىمەسىن اياقتاي كەلىپ، تاسىم اتام وتەگەن قارتتىڭ كوپ جاساۋىنا نەلەر سەبەپ بولعانىن وزىنشە توپشىلاعان سوزىنە توقتادى.

«كوپ جاساۋىما، وسىنشا جاسقا كەلگەندە دەنىم ساۋ بولىپ، كۇش-قۋاتىمنىڭ كەمىمەۋىنە بىرنەشە سەبەپتەر بولدى، — دەپتى وتەكەڭ، — اتاپ ايتقاندا، ومىرىمدە ىشىمدىك ىشپەدىم، شىلىم تارتپادىم، ناسىباي اتپادىم، جالاڭاياق جۇرمەدىم، جايداق اتقا مىنبەدىم، ءوز ايەلىمنەن باسقا بىردە-بىر ايەلگە جاقىنداسقانىم جوق. قانداي جاعدايدا بولسا دا ەشنارسەگە رەنجىمەدىم، ءار دايىم كوڭىلدى، سەرگەك بولدىم».

---