InfoHub Logo

قانشاما ارمان، قانشاما ەڭبەك تاپتالعان بۇل سوعىس ءدۇبىرى تالايدىڭ گۇل عۇمىرىن سولدىرىپ، بوزبالانىڭ بولاشاعىن ويراندادى. ۇكىلەگەن ۇلدارىنان ايىردى. شىرىلداعان شاقالاقتىڭ اششى داۋىسى تاۋ مەن تاستى كۇڭىرەنتتى. شەگىنەرگە جول جوق، سەبەبى بابالار قالدىرعان جەردى ۇرپاققا قاز قالپىندا قالدىرۋ سولاردىڭ قولىندا بولدى. وسىلايشا ارمانى اسقاق جاس بۋىن مايدانعا اتتاندى. ۇرىس دالاسى قۇشاق جايا قارسى المادى. كوز الدىندا ەل ءۇشىن دەپ قولىڭدى قانعا بوياۋ، تۇنگى بارلاۋ، كۇزەتۋ، تابيعاتتىڭ قاتال مەزگىلىنە ءتوزۋ، بولاشاعىڭنىڭ بۇلىڭعىر ەكەنىن ءبىلۋ ۇلكەن شىدامدىلىقتى تالاپ ەتتى. شىنىداي شاشىلعان، قامىرداي يلەنگەن بومبانىڭ وعى جاۋعان دالا توزاق وتىنان كەم تۇسپەدى. سابازدار تايسالماي، مەيىرىمگە تولى جۇرەگى تاسقا اينالدى.

تاريحتا تانىمال «الجير» دەگەن ستاليندىك گۋلاگ-تىڭ لاگەرىندە 20 مىڭنان استام ايەل ازاپ شەكتى. وتانعا ساتقىندىق جاساعان «حالىق جاۋلارىنىڭ» ايەلدەرى اقمولاداعى وسى لاگەردە وتىردى. «حالىق جاۋىنىڭ» ايەلىن، اناسىن، قىزىن، قارىنداسىن - وسى قورقىنىشتى جەردە جيناپ، ولاردىڭ ءومىرىن توزاققا اينالدىردى.

بويىنان باتىرلىقتىڭ ءيىسى بۇرقىراعان، قازاق ساربازدارى ۋكراينا جەرىندە «ۆاسيا اعاي» اتالعان جەرلەسىمىز حالىق قاھارمانى قاسىم قايسەنوۆ ەرلىگى؛ رەيحستاگ توبەسىنە تۋ تىككەن سەرجانتتار ەگوروۆ پەن كانجاريا قاتارىنداعى جاس قازاق راقىمجان قوشقاربايەۆ ەرلىگى؛ 16 اي بويى تاۋلىگىنە 150 گرامم ناندى ازىق ەتكەن لەنينگرادتىقتار ەرلىگى؛ ايتا بەرسەم ، ءتۇبى كورىنبەيتىن، دالىرەك ايتسام، وسى سوعىس جىلدارى ەرلىگى ءۇشىن وردەن جانە مەدالدارمەن ماراپاتتالعانداردىڭ ىشىندە 96 مىڭ 938 قازاق جاۋىنگەرىنىڭ ونىڭ ىشىندە كەڭەس وداعىنىڭ باتىرى اتانعان 97 قازاقتىڭ ەرلىگى – ەلگە ۇران، ۇرپاققا ۇلگى ەمەس پە!

بۇل سوعىس تەك جاۋىنگەرلەرمەن اياقتالمايدى، تىل قىزمەتكەرلەرىنىڭ قىزمەتى جەڭىستىڭ ولشەۋسىز جەمىسى. بويىنداعى نازىكتىكتى جوعالتقان قازاق قىزدارى ەكى قولعا كۇرەك الىپ، بىرنەشە تەحنيكالاردى يگەرىپ، قيىندىقپەن ەرلەرشە الىستى، ءتوزدى. سول بەس جىلدىق كول-كوسىر جاسپەن، جازىقسىز توگىلگەن قانمەن ەستە قالدى.

ەر ەسىمى ەل ەسىندە. كىر جۋىپ، كىندىك كەسكەن جەرى ءۇشىن، ايالاپ الپەشتەپ وسىرگەن ەلى ءۇشىن  جانعان وتقا ءتۇسىپ، جالىن كەشكەن ەر-ازاماتتار ەستەن شىقپايدى. ولار تاريحتا ءىز قالدىردى. سودان بەرى 76 جىل ءوتتى. سول وتتى كۇندەر قايتىپ كەلمەسىن. قاتەر تونبەسىن!

مىنە، ۇلى جەڭىسكە 76 - جىل، ارداگەرلەر ازايدى. ەرلىكتەرى ەل جادىندا. ءبىر وكىنىشتىسى، دۇنيەجۇزىن دۇربەلەڭگە سالعان سوVID-19 كەسەلىنىڭ كەسىرىنەن، جىل سايىنعى ادەتپەن ەرلىككە تاعىزىم كورسەتىپ، ءىس- شارالار قويا المايمىز. تالاي قيلى كەر زاماندى، اشتىقتى، سوعىستى باستان وتكەرگەن قازاق بۇنى دا جەڭىپ، ءالى- اق جەڭىس تويىن تويلايمىز.

---