عابەڭ تۋرالى ءبىر اۋىز ءسوز
ەل، جەر، ەر. قۇدىرەتتى ءۇش ۇعىم. قاسيەتتى ءۇش تاعان. ويتكەنى ەل قۇدىرەتتى. جەر كيەلى، ەر قاسيەتتى بولماق. كيەلى توپىراققا كىندىك قانى تامعان ارداقتى ازاماتىن ەلى الاقانىندا ايالايدى. سوندىقتان كيەلى جەردىڭ قاسيەتتى ەرى ەلىن قۇدىرەتتەندىرەدى.
بۇگىن ەركىن ەلى ەڭىرەگەن ەرىن كيەلى توپىراقتى تۋعان جەرىندە قايتا تۋعىزىپ وتىر. ول -ەلدىڭ ەرىنە دەگەن وتەلگەن بورىشى. ول - ەلىنىڭ اسىل ۇلىنا دەگەن ءسۇيىنىشى. ول - ەلجىرەگەن ەلىنىڭ ازامات قالامگەرىنە، قايراتكەر قاھارمانىنا دەگەن ۇزىلمەس، وشپەس ماحابباتى!
ويتكەنى عابيت اعا مۇسىرەپوۆ ەلىن سۇيگەندىكتەن عانا، ۇلتىن ارداقتاعاندىقتان عانا قايراتكەر بولعان. كەنجەلەپ قالعان قازاعىن كەۋدەلەتىپ ىلگەرى ۇمتىلتقان كوشباستاۋشى بولعان. ءبىلىم-عىلىمعا تالپىنتىپ، ونەر-مادەنيەتكە جەتكىزۋ ءۇشىن قالامگەر بولعان.
عابەڭ ءىرى تۇلعا ەدى. ەسكىنىڭ توزىعىن بۇزىپ جاڭانىڭ وزىعىن حالقىنا ۇستاتۋ ءۇشىن رەسپۋبليكا مادەنيەتىنىڭ تۇتقاسىن ۇستادى. سول ءۇشىن ءبىز وعان بورىشتار ەدىك.
عابەڭ پاڭ اسقاق ەدى. وتارلىق ەزگىنىڭ شىرماۋىنداعى ۇلتىنا تاكاپپار قايسارلىق، ەركىندىككە دەگەن وجەت سەنىم ەگۋ ءۇشىن دە ءورشىل رۋحىن بارىنشا تىك ۇستادى. سول ءۇشىن دە ءبىز وعان بورىشتار ەدىك.
عابيت اعا سىربازدىق ۇلگىسى ەدى. ەلىنىڭ نازىك جانى، عاجاپ سىرىنىڭ بەلگىسىندەي ەتىپ ءوز كوكىرەگىنىڭ اسەم نازىن اسەرلى اڭگىمەلەرىمەن، سىرشىل پەسالارىمەن، عاجاپ روماندارىمەن حالقىنا تاراتىپ ەدى. سول ءۇشىن دە ءبىز وعان بورىشتارمىز.
عابيت اعا ادىلدىك پەن تازالىقتىڭ ونەگەسى دە ەدى. قيراكەزىك زامانىنىڭ دۇلەي داۋىلىنىڭ وتىندە قاسقايىپ قارسى ءجۇرىپ، يىلسە دە سىنباي، سۇرىنسە دە جىعىلماي، ادىلەت تۋىن شايقالتپاي الىپ وتكەن. ول ايتىسسا دا مۇحاڭدى، اۋەزوۆتى، سابەڭدى، مۇقانوۆتى قاتتى سىيلاعان. "بەيىمبەت حالىق جاۋى بولسا، مەن دە حالىق جاۋىمىن!" دەپ قاسيەتىنەن اينىماي، ءمايليندى ەرەكشە قۇدىرەت تۇتقان. سول ءۇشىن دە ءبىز وعان بورىشتىمىز.
عابەڭ كۇرەسكەر ەدى. گولوششەكيننىڭ قاندى قىرعىنىنا قارسى باتىل ايقاسقا شىعىپ، "بەسەۋدىڭ حاتىن" جازىپ، قازاعىنىڭ توزاعىن توقتاتپاققا بارىنشا كۇش سالعان بولاتىن. سول ءۇشىن دە ءبىز وعان بورىشكەر ەدىك.
مىنە، كيەلى توپىراققا ۇلى عابەڭنىڭ بۇگىن كىندىك قانى قايتادان ءبىر تامعانداي. ءجۇز جىلدان سوڭ تاۋەلسىز ەلىنىڭ تورىندە ءوز شىلدەحاناسىن ءوزى تاماشالاپ وتىر. جەر كيەلى دەگەنىم وسى. ۇلى پەرزەنتىن ەكىنشى رەت تۋعىزىپ وتىر. ەر قاسيەتتى دەگەنىم وسى. دۇنيەنى تۇگەل دۇبىرلەتىپ: "بىرىگىڭدەر! ىرىلەنىڭدەر! كوبەيىڭدەر! كوركەيىڭدەر!" دەپ تويىنا شاقىردى. ەل قۇدىرەتتى دەگەنىم وسى! ۇلان دالاسىندا ۇلان بالاسىنا - ۇلى داناسىنا ماڭگىلىك ورىن بەردى. ەندەشە ەل دە، جەر دە، ەر دە ماڭگىلىكتىڭ ءوزى. وسى ءۇش تاعان ۇعىم بىرىككەن كەزدە الەم-بولمىس ەشقاشاندا ىرىمەيدى.
تويلارىڭ قۇتتى بولسىن اياۋلىم، ارداقتىم، اسقار بەلىم - تۋعان حالقىم! ۇلى عابەڭنىڭ ۇرپاق، جەرلەستەرى!
2002 جىل
You Might Also Like
-
حالقىمىزدى ءان الديلەپ، كۇي تەربەتىپ كەلگەنى اقيقات. قازاقتىڭ كەۋدەسىنەن كۇي توگىلىپ، كومەيىنەن ءان اقتارىلىپ جاتاتىنى سودان عانا دەسەك، وندا ەڭ الدىمەن ۇلتىمىزدى ءالىمساقتان اسەم اۋەن، ءتاتتى سازبەن ا...
