عاسىردىڭ سوڭعى جازى
(جالعاسى)
...تاڭعا جۋىق پوەزد شالقار ستانسياسىنا جاقىنداپ قالعان. انەكەڭ كۋپەگە كىرگەندە وياۋ جاتقان ءاليا اپاي باسىن كوتەردى. ەشتەڭە كەرەك ەمەس پە دەپ سۇراعىسى كەلىپ ەدى، تونومەترىن الىپ، قان قىسىمىن ولشەگەلى جاتقان سوڭ كىدىرىپ قالدى.
— 60 تا 80 بولىپ تۇر، ءتۇسىپ كەتىپتى. ماعان شاي بەرشى، — دەدى. شايىن ءىشتى دە، توسەگىنە قيسايدى.
— ۇيقىم كەلمەي جاتىر، گازەتتەردى اپەرشى، — دەپ ەدى، زايىبى قارسى بولدى.
— جارىق ءالسىز، گازەتتى قايتەسىڭ... دەمالساڭشى، — دەگەنگە قارسىلاسپادى.
— جارايدى وندا. ساعات نەشە بولدى ءوزى؟ تاڭ قاشان اتادى؟ — دەگەن.
— تاڭ اتىپ قالدى. ساعات ءتورت. سەن دەمالا بەر، مەن بەتىمدى شايىپ كەلەيىنشى، — دەپ، شىعا قويعان. باسقا ەشقانداي ءسوز ايتىلماعان. قايتادان كەلسە، ءجۇرىپ بارا جاتىر ەكەن...
... ءاليا اپاي ەندى سول ءبىر ساتتەردى، سول كۇنگى ايتىلعان اڭگىمەلەردى تەگىس ەسىنە ءتۇسىرىپ كورگەن، ءبىراق كۇدىكتەنەرلىكتەي ەشتەڭە تاپپادى. تەك قانا قىزىلوردادان بەرى شىعا بەرە كۇننىڭ ىسي باستاعانىن ايتقان. بىرەۋلەر تاڭعا جۋىق بىر-ەكى اداممەن تامبۋردا سويلەسىپ، كۇلىسىپ تۇرعانىن كورىپتى. كادىمگى دەمالىپ جۇرگەن ادامداردىڭ ءوزارا ەمىن-ەركىن پىكىرلەسۋى دەيدى... وسىلايشا الپىس بەس جاسىندا انەس اعامىز اياق استىنان، كۇتپەگەن جەردەن جونەپ كەتە بەردى.
ءبىر كۇنى ءاليا اپاي ماعان مىناداي ءوتىنىش جاساعان: اعاڭنىڭ بۇكىل ءومىرى مۇنايمەن بىرگە ءوتتى عوي، تاسىنا جازىلاتىن سوزدەرىن ءوزىنىڭ سول عۇمىرلىق سەرىك بولعان مۇنايىنا بايلانىستىرىپ جازىپ بەرشى...
سوزدەردى بىلايشا جازىپ ەدىم:
باسقا نە دەپ ايتارسىڭ:
قارا جەر بوپ جاستىعىڭ،
تىڭداپ ەندى جاتارسىڭ
مۇنايىڭنىڭ تاسقىنىن.
ارمانىنا جەتكىزگەي
سەنەن قالعان ۇل-قىزدى.
تاعدىر بيگە تەپكىزبەي،
جەلەپ-جەبەپ ءجۇر ءبىزدى...
(زايىبى ءاليا)
توپىراعىڭ تورقا بولسىن، انەس اعا. مەنىڭ قولىمنان كەلگەنى وسى عانا.
2000 جىل
You Might Also Like
-
ۇزاق جىلدار جاساعان جۋرناليستىك قىزمەتتىڭ اسەرى بولۋ كەرەك، ادام ەسىمىنە كوبىرەك نازار اۋداراتىن سياقتىمىن. ادامنىڭ اتى تەگىن قويىلمايدى دەيدى عوي. ونىڭ ۇستىنە اركىمنىڭ بويىنان ونىڭ وزىنە عانا ءتان ...
-
ءوزى العاش رەت دەپۋتاتتىققا ۇسىنىلعان جينالىستان زاۋرە ۇيىنە الابۇرتىپ ەرەكشە سەزىممەن ورالدى. اسىعا كۇتىپ وتىرعان اناسى ەسىكتەن كىرە-اق جانىنا جەتىپ كەلىپ، اينالاسىن ءاجىم تورلاپ، نۇرى توزا باستاعان...
