عاسىرلار توعىسىنداعى انالار
XX عاسىردىڭ اناسى وتكەن عاسىر انالارىنا قاراتا سويلەيدى:
ۋا، انا!
سەندەر ءوز ۇلتتارىڭنىڭ ماقتانىشىنا اينالا العان ۇل-قىزداردى دۇنيەگە اكەلدىڭدەر. ولاردى بەسىك الديىمەن وسىردىڭدەر. ءتۇن ۇيقىلارىڭدى سولار ءۇشىن ءتورت بولدىڭدەر.
قازاق ۇلتى وتكەن عاسىرىندا الاساپىران شايقاستاردى باسىنان وتكەردى. سوندا سەندەر دۇنيەگە اكەلگەن ۇلدار ءوز ۇلتىنىڭ ازاتتىعى مەن تاۋەلسىزدىگى ءۇشىن جان اياماي كۇرەستى. سەندەر ءۇشىن كوزدىڭ قاراشىعىنداي بولىپ كورىنەتىن ۇلدارىڭنىڭ دەنەسىنە جاۋدىڭ وتكىر جەبەسى كەلىپ قادالدى، ۋلى نايزاسى تۇيرەلدى. ءبىراق سەندەر ەل قورعار وعلان ۇلداردى وسىرگەن ەدىڭدەر. ولارعا ۇنەمى بەسىگىنەن باتىرلىق پەن ەرلىك تۋرالى جىرلاردى ايتتىڭدار. ولاردىڭ جانى مەن جۇرەگى انا الديىمەن بەسىگىندە-اق شىڭدالعان ەدى. سونان سوڭ ولارعا اكەلەرى قىلىش ۇستاۋدى ۇيرەتتى. وسى سەبەپتەن دە سەندەر وسىرگەن ۇلداردىڭ رۋحى ءاماندا ۇستەم تۇردى. ولاردىڭ ەرلىكتەرى جاۋ اسكەرىنىڭ قۇتىن قاشىردى، مىسىن باستى. سەندەردىڭ وسىرگەن ۇلدارىڭ ءوز حالقىنىڭ ازاتتىعىن سان مارتە قورعاپ قالدى. سوندىقتان دا ۇلتتىڭ رۋحى كەيىنگىگە ساقتالىپ جەتسە، وسى جولدا سەندەر وسىرگەن باتىر ۇلدارمەن بىرگە، ولاردىڭ انالارى - سەندەردىڭ دە ۇلەستەرىڭ باسىم، انا!
تاريح سويلەيدى:
ءبارى دە راس، انالارى باتىر بولار ۇل تاپتى،
"بەرىل"، - دەدى جاۋ اسكەرى، مەنمەنسۋمەن ءۇن قاتتى.
انا وسىرگەن وعلاندار سوندا مىناۋ دالاعا
وشپەيتۇعىن ەرلىگىمەن ولمەس ءاندى شىرقاتتى.
اسقاق اننەن دالانىڭ دا جانارىندا شىق تۇردى،
باتىر ۇلدار سوندا ولارعا كىم ەكەنىن ۇقتىردى.
پۇشايمان بوپ جاۋ باتىرى سوندا مىسى قۇرىعان،
اۋدارا الماي تۇلپارىنان تاقىمدارى مىقتى ۇلدى.
مەن تاريحپىن، سونىڭ ءبارىن كوكىرەگىممەن ۇعامىن،
ازاتتىعىن جاۋلايمىن دەپ سالعاندا جاۋ لاڭىن،
باتىر ۇلدار قورعاپ قالعان دەنەسىمەن قالقان بوپ،
سول ىستەردىڭ، سول ەرلىكتىڭ بارىنە دە كۋامىن.
XX عاسىردىڭ اناسى ءسوزىن جالعايدى:
ۋا، وتكەن عاسىردىڭ انالارى!
سەندەر ازاتتىق ءۇشىن بولعان شايقاستاردا ۇلدارىڭدى جوعالتتىڭدار. ءبىراق سەندەر ۇنەمى اسقاق تۇردىڭدار. ويتكەنى سەندەردىڭ ۇلدارىڭ باتىرلىق پەن ەرلىكتىڭ ۇلگىسىن كورسەتىپ، ەلى ءۇشىن قۇربان بولدى. سەندەر وسىنداي ۇل وسىرگەندەرىڭدى ماقتانىش ەتتىڭدەر. بۇل سەندەر ءۇشىن جاراسىمدى ماقتانىش ەدى، انا!
سەندەردىڭ بويلارىڭداعى قاسيەتتى ءبىز، XX عاسىردىڭ انالارى، وزىمىزگە قابىلداپ الدىق. ءبىز دە انامىز. سەندەر قالدىرعان قاسيەتتەرگە لايىقتى ءومىر سۇرە الدىق. كەشەگى جەلتوقسانداعى الاڭدا تۇرعان ۇل-قىزداردى ومىرگە ءبىز الىپ كەلىپ ەدىك، انا! ءبىز دە ولاردىڭ قاسيەتتى ازاتتىققا جول سالۋشى ۇل-قىزدار بولعاندىعىنا ولاردىڭ اناسى رەتىندە ماقتانامىز.
تاريح سويلەيدى:
ءبارى دە راس، ءوز ساناڭدا باعامدا،
ەرلىك تۋدى مۇز قۇرسانعان الاڭدا.
سوندا ولاردىڭ ۇلدارى مەن قىزدارى
ۇقساعىسى كەلدى بابا وعلانعا.
مىنە، انالار تاعى باتىر ۇل تاپتى،
ەلەمەستەن ولار سۋىق، بۇرقاقتى،
سول الاڭدا تۇرىپ سوندا ۇل مەن قىز
تاعى دا اسقاق ەرلىك جىرىن شىرقاتتى.
XX عاسىردىڭ اناسى ءسوزىن جالعايدى:
XXI عاسىردىڭ انالارى! ءسوزىمدى ەندى سەندەرگە ارنايمىن.
ءبىز ءوز الەمىمىزگە لايىقتى ءومىر سۇرە الدىق. ءبىزدىڭ ۇل-قىزدارىمىز دا ءوز زامانىنا لايىقتى ءومىر سۇرە الدى. ەرلىكتىڭ دە، باتىرلىقتىڭ دا، ءبىلىمنىڭ دە، اقىلدىڭ دا ۇزىلمەس التىن ارقاۋىن ساقتاپ قالۋ - ەندى سەندەرگە امانات!
XXI عاسىردىڭ اناسى ءسوز الادى:
ۋا، XX عاسىردىڭ انالارى!
سىزدەر الدىڭعى تولقىن انالاردىڭ ۇلتىمىزعا ءتان ايرىقشا قاسيەتتەرىن بويعا ساقتاپ قالا العان اناسىزدار! سوعان لايىقتى ءومىر سۇرە الدىڭىزدار. سىزدەردىڭ وزدەرىڭىز دە كەشەگى 1941 - 45-جىلداردىڭ اراسىنداعى سوعىستا ۇلدارىڭىزدى جوعالتتىڭىزدار. بۇل سوعىستا سىزدەردىڭ قىزدارىڭىز دا بولدى. ولار ءوز ۇلتىنا ءتان جاۋىنگەرلەرشە شايقاستى. سول ۇل-قىزدار سىزدەردىڭ قۇرساقتارىڭىزدى جارىپ شىققان پەرزەنتتەرىڭىز ەدى. ءبىز سىزدەرگە باس يەمىز، انا!
سىزدەر ومىرگە ەكى عاسىردىڭ توعىسىنا اكەلىپ قاسيەتتى ازاتتىقتى ۇشتاستىرعان ۇل-قىزداردى الىپ كەلدىڭىزدەر. ءبىز سىزدەرمەن ماقتانامىز!
XXI عاسىر قازاق انالارىنا بۇرىنعىدان دا جاۋاپتى، بۇرىنعىدان دا سەرگەك، بۇرىنعىدان دا باتىلداۋ بولۋدى جۇكتەپ وتىر. سەبەبى ءبىز ءوسىرىپ جاتىرعان پەرزەنتتەر اقپارات مايدانىنىڭ ورتاسىندا ءومىر سۇرۋدە. بۇل مايداننىڭ جەبەسى تانگە ەمەس، ساناعا باعىتتالادى. وسى جولدا بىزدەر، قازاق انالارى، ءوزىمىزدىڭ ۇل-قىزدارىمىزدى ۇلتىنا لايىقتى پەرزەنت ەتىپ تاربيەلەۋ جولىنداعى باعىتتا ۇنەمى سىزدەر قالدىرعان باي تاجىريبەنى بويىمىزعا سەرىك ەتىپ كەلەمىز. ولاردى زامانىنا ساي عىلىم-بىلىممەن قارۋلاندىرا وتىرىپ، ولاردىڭ بويلارىندا ۇلتتىق قۇندىلىقتاردىڭ ساقتالۋىنا ولاردىڭ اناسى رەتىندە سىزدەر قالدىرعان قاسيەتتەردىڭ بيىگىنەن ءمان بەرمەكپىز.
ءبىزدىڭ وتانىمىز - الەم تانىعان تاۋەلسىز قازاقستان. ءبىزدىڭ پەرزەنتتەرىمىز ونى ۇنەمى ماقتانىش ەتەدى. ولار ءوزىنىڭ قاسيەتتى كوك تۋىن اسقاقتاتا بەرەدى. ولار ازاتتىقتى تۇعىرلى ەتۋ جولىنداعى كۇرەسكە ءوز بىلىمىمەن ۇلەسىن قوسا الادى. وسى جولداعى ءبىلىم جارىستارىنىڭ "جۇزدەن جۇيرىك، مىڭنان تۇلپارلارى" - ءبىزدىڭ وسىرگەن ۇل-قىزدارىمىز. ءبىز ولاردىڭ ۇستازدارىمەن بىرگە اناسى رەتىندە مۇنى دا ماقتانىش ەتەمىز.
قازاق ارۋلارى قاشاندا ءوز ۇلتىنا لايىقتى ءومىر سۇرە العان. بۇگىنگى ارۋلار - ەرتەڭگى انا. ولار دا اسىل انالار سالعان التىن ءىزدى جالعاستىرا بەرەدى.
بولاشاق سويلەيدى:
كەلەشەگى كەلەدى ءوسىپ كۇنبە-كۇن،
ىرگەلى ىسپەن ارتقا تاستادى كۇندەرىن.
ءدال وسىنداي انالارى بار كەزدە،
مەن دە ۇنەمى وسى جۇرتپەن بىرگەمىن.
تەك وسىنداي ارۋلارى بار ساتتە،
وسى ەلمەن بىرگە وتپەكشى كۇندەرىم!
You Might Also Like
-
«ءبىر قىزىمنان ءبىر قىزىم سوراقى» دەگەندەي ءبىر وقۋلىعىمىزدان ءبىر وقۋلىعىمىز سوراقى بولىپ بارادى. وتكەن جىلى عانا قامبار باتىردى «القاش» ەتكەن بعم بيىل 5 سىنىپ وقۋشىلارىنا سول ...
