InfoHub Logo

امەريكالىق كومپانيا ادامدى گيبەرناسيا كۇيىنە ەنگىزەتىن تەحنولوگيانى جاساۋ ۇستىندە. ول عارىش ساپارىندا جۇمسالاتىن شىعىن كولەمىن قىسقارتۋعا مۇمكىندىك بەرەدى.

2006 جىلى جاپونيا تۇرعىنى ميسۋتاكا ۋچيكوشي دوستارىمەن بىرگە تاۋعا ساياحاتتاپ بارعان. ول ساياحاتتان قايتار كەزدە سەرۋەندەمەك بولىپ، تاۋدان تومەن قاراي بەتتەگەن. جولاي اداسىپ قالعان ميسۋتاكا ابايسىزدا اياعى تايىپ، تاۋدان سىرعىپ كەتەدى. سالدارىنان جامباس سۇيەگىن سىنىپ، سول جەردە ەستەن تانىپ قالادى. ارادا 24 كۇن وتكەننەن كەيىن الپينيستەر كەزدەيسوق ميسۋتاكانى تاۋىپ العان. ونىڭ دەنە تەمپەراتۋراسى 22°C-گە دەيىن تومەندەپ، جۇرەك سوعىسى مۇلدەم باسەڭدەگەن، ال اعزاداعى زات الماسۋ پروسەسى توقتاپ قالعان دەۋگە بولادى.

دەسە دە ىشكى اعزالارىنىڭ زاقىمدالىپ، كوپ قان جوعالتقانىنان قاراماستان، ۋچيكوشي ساۋىعىپ، دەنساۋلىعى قالپىنا كەلگەن. بۇل وقيعا ادامنىڭ گيبەرناسياعا ەنگەنىن سيپاتتايتىن الەمدەگى ەڭ ءبىرىنشى قۇجاتتاندىرىلعان جاعداي رەتىندە تىركەلىپ وتىر. جانە ءدال وسى وقيعا Spaceworks كومپانياسىنىڭ پرەزيدەنتى دجون برەدفوردتىڭ ساناسىندا گيبەرناسيا كۇيىن عارىش ساپارىندا قولدانۋ جونىندە وي تۋىنداۋىنا سەپ بولعان-دى.

«مەن عىلىمي-فانتاستيكالىق ادەبيەتتى جانىممەن سۇيەمىن، سوندىقتان ونى شىندىققا اينالدىرۋ جونىندە ءاردايىم ارماندايتىنمىن. ءبىراق مەن – عارىش ينجەنەرىمىن. ادام بالاسىنىڭ مارس جانە كۇن جۇيەسىنەن تىس وزگە دە جەرلەرگە ساپار شەگۋىن شىندىققا اينالدىرۋ ماقساتىندا تەر توگۋدەمىن. بۇل تۇرعىدان العاندا، ادامنىڭ  گيبەرناسيا كۇيىنە ەنۋى ۇلكەن ماڭىزدىلىققا يە»، - دەيدى برەدفورد.

بۇگىنگى ۋاقىتتا كومپانيا قىزمەتكەرلەرى الەمنىڭ بارلىق كلينيكالارىندا قولدانىلىپ جۇرگەن تەراپيەۆتىك گيپوتەرمياعا باسا نازار اۋدارۋدا. ول جۇرەگى توقتاپ قالعان جانە ميى زاقىمدالعان ناۋقاستارعا كومەكتەسۋ ماقساتىندا قولدانىلادى. بۇل تەحنولوگيانىڭ نەگىزىندە ادامنىڭ دەنە تەمپەراتۋراسىن 32-34 °C-گە دەيىن تومەندەتۋ جاتىر. ادەتتە ناۋقاستىڭ گيبەرناسيا كۇيىنە ەنۋى بىرنەشە كۇنگە جالعاسادى. 

برەدفوردتىڭ سوزىنشە، Spaceworks كومپانياسىنىڭ ماقساتى – گيبەرناسيا كۇيىنىڭ مەرزىمىن بىرنەشە ايعا ۇزارتۋ. كومپانيا گيبەرناسيالىق كامەرانىڭ جوباسىن جاساپ قويعان. وندا ادام دەنەسىن توڭازىتۋ جانە جىلىتۋ جۇيەلەرى بار. سونىمەن قاتار روبوتتاندىرىلعان قولدار، عارىشكەرلەردىڭ گيبەرناسيا كۇيىندەگى احۋالىن باقىلاۋ ءۇشىن قولدانىلاتىن مونيتورينگ جۇيەسى قاراستىرىلعان. كومپانيا جانۋارلارعا جۇرگىزىلەتىن العاشقى سىناقتى 2018 جىلى وتكىزۋدى جوسپارلاپ وتىر. مۇنان كەيىن ادامعا جۇرگىزىلەتىن تاجىريبەلەردى قولعا الۋ مۇمكىن بولماق.

بىلتىرعى جىلى SpaceX جانە Tesla كومپانيالارىنىڭ نەگىزىن سالۋشى يلون ماسك مارستى باعىندىرۋ جونىندەگى جوسپارىن ۇسىنعان. جوسپار بويىنشا مارسقا تابان تىرەۋدى كوكسەيتىن جانداردىڭ ءبىرىنشى لەگى قىزىل عالامشارعا 2023 جىلى بىرنەشە رەت قولدانۋعا بولاتىن اۋە كەمەسىمەن اتتانا الادى. ال ءبىر باعىتقا قاراي ساپاردىڭ قۇنى 200 000 اقش دوللارىن قۇرايدى. ال Boeing كومپانياسىنىڭ باسشىسى اتالعان جوبانى يلون ماسكتان بۇرىن جۇزەگە اسىرماق نيەتتە.

---