InfoHub Logo

ادام-تىرشىلىگىنىڭ تۇتقاسى مەن كوركى، اقىل، وي بايلىعىنىڭ قوزعاۋشىسى، ونەر مەن ءبىلىمنىڭ بەسىگى بولعان جەر-انانى كىم اشتى، جەر ۇستىنە ءبىرىنشى قادام باسقان ادام كىم؟ مۇنى تاريحتا ايتپايدى، مەن دە بىلمەيمىن. ءبىراق جەر ۇستىنە سول ءبىر بەلگىسىز ادامنىڭ پايدا بولۋىنان كەيىن بۇكىل تىرشىلىككە، ونەرگە، ءومىردى وزگەرتۋگە بەت بۇرىلعانى انىق. ول بەت بۇرىس ادامنىڭ تاماق تاۋىپ جەۋىنەن باستالادى ما، بولماسا ماڭايىن قورشاعان وزىنەن كۇشتى جىرتقىشتاردان قورعانۋ پروسەسىنەن شىم-شىمداپ ءوربي مە؟ ايتەۋىر جەر ءۇستىن ادام كەلۋىمەن ءبىز جاساپ وتىرعان ءومىردىڭ العاشقى تامشىسى پايدا بولدى دەسەك قاتە ايتپاعان بولارمىز.

بۇدان كەيىپ دە ادامزات ءوز ءوسۋىنىڭ تالاي بيىكتەرىنە كوتەرىلدى، ءوز اقىلىنىڭ، ءوز ونەرىنىڭ، ءوز عىلىمىنىڭ تالاي كەرەمەتتەرىن كوردى. ءبىراق ءدال بۇگىنگىدەي كەرەمەتتى دۇنيە جارالعالى ەشكىم ەستىگەن دە، كورگەن دە ەمەس. ادام مەن عىلىم ءوزىنىڭ اسا بيىك فازاسىنا كوتەرىلگەن شاعىندا كوسموسقا جول سالدى.

بارلىق الەمدە ادام ءۇشىن كوسموس دۇنيەسىنىڭ اشىلعان كۇنى جاريالاندى، كوسموس جولىن اشقان سوۆەت ادامى — سسسر-دىڭ ەرىكتى ازاماتى گاگارين يۋريي الەكسەيەۆيچ.

گاگارين — جەر بەتىنە كەلگەن ءبىرىنشى ادامداي جالاڭاش، ونەر، ءبىلىمسىز قۇر قول كەلگەن جوق، كوسموسقا ونەر، ءبىلىمنىڭ ەڭ بيىك تابىستارىن الا كەلدى. بۇكىل ادامزات ءۇشىن كوسموس كەڭىستىگىن يگەرۋ ەراسى اشىلدى، ونى ۇلى سوۆەت ەلى، سوۆەت ادامى، سوۆەت وقىمىستىلارى اشتى.

ماڭگى جاسا، مەنىڭ سوۆەتتىك وتانىم!

ماڭگى جاسا، مەنىڭ ۇلى كوممۋنيستىك پارتيام!

---